Read Ngaju YESAYA 52 Bible Online

YESAYA 52 - Ngaju bible

YESAYA 52

¹ Keleh misik, o Yerusalem, keleh misik! Pabas ateim! Kepan pakaian kahaim! O Yerusalem, lewu je barasih, oloh papa dia akan tame tinai mahalau lawang lewum.

²Keleh harikas bara kawo, o Yerusalem, birik kawo je leket intu ikau. Engkak rantai je mameteng uyatm, o oloh lewu Sion je buah tawan!

³TUHAN hamauh dengan ungkup Ayue, “Keton injual kakai bewei, jadi toh iliwus kakai bewei kea.

⁴Horan keton haguet akan Misir tuntang melai intu hete kilau oloh tamuei. Limbah te Asur minyop keton jaton bara buku sabab.

⁵ Toh narai urusang-Ku intu hetoh? Oloh Babel manawan keton kalote bewei. Ewen je mangapehe keton, oloh balecak tuntang raju-rajur manawah Aku.

⁶Awi te keton akan mangaku je Aku Hatalla, tuntang katika te keton akan katawan Aku toh je hakotak dengan keton.”

⁷ Lalehan kasanang angate mite panumah sarohan; je mananjong mahalau kare bukit tuntang mimbit barita bahalap, barita kamangat, barita salamat akan Sion; koae, “Hatallam te Raja!”

⁸Hining lahap kahanjak bara oloh je manjaga lewu, ewen basasurak haya-hayak! Awi hapan matan ewen kabuat ewen mite TUHAN haluli akan Sion.

⁹Keleh basasurak o kare awan duroh derep Yerusalem, awi TUHAN mampong ungkup Ayue tuntang maliwus Yerusalem.

¹⁰TUHAN mamparahan kuasan Aie intu taharep matan kakare bangsa. Palus hapus kalunen akan mite salamat bara Hatallan itah.

¹¹ Lius! Lihi lewu Babel, o keton je mimbit pakakas Human Hatalla! Ela manigong ramo je papa:[73] Parasih arep keton helo bara haguet.

¹²Keton dia akan kaje-kajeng tinai tuntang dia sama kilau oloh hadari. Awi TUHAN akan mangagalan keton; Hatallan Israel mangalindong keton bara kakare eka.

¹³TUHAN hamauh, “Toto haliai, rewar-Ku akan bahasil; ie akan inyanjung tuntang inggatang.[74]

¹⁴Bihin are oloh tarewen mite ie, ampin baue rusak sampai dia sama kilau ampin olon tinai.

¹⁵ Tapi toh are bangsa hengan awie, kare raja benyem awi jungun. Ewen akan mite tuntang harati, taloh je helo bara te dia ewen katawae.”