Read Ngaju YESAYA 53 Bible Online

YESAYA 53 - Ngaju bible

YESAYA 53

¹ Bangsa te tombah, “Eweh je percaya dengan taloh je jari ihining ikei? Akan eweh kuasan TUHAN jari imparahan?

²TUHAN mangahandak rewar te sama kilau salundik je lembut intu petak je keang kamahau. Jaton taloh je bahalap intu ie akan indu tampayah itah; jaton taloh je mampamangat intu ie akan eka kahandak itah.

³Itah manawah tuntang mangejau ie, oloh je kontep kasusah tuntang patut mananggong kapehe. Jaton oloh je hakon manampayah ie, itah mahin dia paduli dengae.

⁴ Sapunae panyakit itah toh je inanggonge kapehen itah toh je inyarenae. Itah manyangka kapehee te hukuman Hatalla akae.

⁵ Tapi ie impahimang awi kare dosan itah, tuntang imukul awi kapapan itah. Ie ihukum uka itah inyalamat, awi kare awan pukule itah impakeleh.

⁶ Itah handiai uras layang sama kilau tabiri, genep bitie manggau jalae kabuat. TUHAN jari manempak akae kare kapapan itah handiai.

⁷ Ie iawi hapan kakaras, tapi ie mananggonge hapan kasabar. Ie dia marakang nyamae sama kilau anak tabiri je iimbit akan eka manyambalih atawa indu tabiri je inggunting bulue.

⁸Ie inahan tuntang iimbit akan pangadilan, palus iimbit tuntang ihukum matei. Jaton oloh je paduli kajarian pambelome; ie matei awi dosan bangsa ain itah.

⁹ Ie ingubur hayak dengan oloh papa, kubure aton hong marak oloh tatau, aloh ie dia puji malalus kapapa, tuntang dia puji manipu.”

¹⁰TUHAN handak je ie buah kapehe, tuntang manyarah arepe kilau parapah mampuas dosa. Maka ie akan panjang umure tuntang mite turonae mahalau ie kahandak TUHAN akan ilalus.

¹¹Awi te TUHAN hamauh, “Limbah mananggong kapehe ie akan sanang tuntang mangat. Rewar-Ku te je manyanang atei-Ku, jari mananggong hukuman akan oloh are; tagal ie Aku akan mampun ewen.

¹² Dengan kahias ie manyarah pambelome tuntang iitong sama kilau oloh papa. Ie mananggong dosan oloh are tuntang balakudoa mangat ewen iampun.[75] Maka Aku manenga akae oloh are kilau panenga, tuntang dinon bagi hayak dengan kare oloh bujur.”