Read Ngaju YESAYA 55 Bible Online

YESAYA 55 - Ngaju bible

YESAYA 55

¹ TUHAN hamauh, “Kantoh keton handiai je teah belai, keleh mihop, danum aton inyadia. Kantoh keton je jaton duit, tarima gandom aloh dia usah imbayar, tuntang keleh kuman! Anggor tuntang susu aton sadia, tarima kakai bewei.

²Kandue mamili taloh je dia mampangat, tuntang bagawi akan taloh je dia manyanang? Numon kare parentah-Ku, maka keton akan kuman taloh je bahalap, tuntang mangkeme panginan je mangat.

³ Hining, o bangsa ayung-Ku, talih Aku, keton akan inenga-Ku pambelom je bujur toto. Tagal sinta tuntang kaketep je injanji-Ku dengan Dawid, Aku mampendeng janji je katatahie dengan keton.

⁴Toto haliai, ie iawi-Ku pamimpin tuntang pangkalima, saksi bara kuasang-Ku akan kare bangsa.

⁵Keton akan mantehau kare bangsa beken, tuntang ewen akan bajeleng manalih keton tagal Aku, TUHAN, Hatallam, Hatalla je barasih ain Israel, awi Aku jari mampahai keton.”

⁶Keleh mules haluli talih TUHAN katahin magon tau; tehau Ie sarai Ie tokep.

⁷Keleh oloh papa mangambuah pambelome, tuntang mobah ampin tiroke. Keleh ie mules haluli talih TUHAN, uka mandino asin Aie. Keleh ie mules manintu Hatallan itah, awi TUHAN mampun dengan kajentan Aie.

⁸TUHAN hamauh, “Kare tirok-Ku dia tirokm tuntang kare jalang-Ku dia jalan aim.

⁹Kagantong langit bara petak, kagantong te kea tirok-Ku intu hunjun tirok ayum, tuntang jalang-Ku into hunjon jalan ayum.

¹⁰ Sama kilau ujan mohon bara langit, tuntang dia haluli tapi mambisa petak, mampajewong tuntang mampalembut taloh imbul, manenga hasil je tau inawor tuntang tau kinan,

¹¹kalote kea auh je insanang-Ku dia haluli talih Aku hayang bewei, tapi bahasil malalus taloh kanahuang-Ku, tuntang mandino uras taloh je ingahandak-Ku.

¹²Keton akan malihi Babel dengan kahanjak, tuntang iagah balua dengan salamat. Bukit tuntang lungkoh akan hanjak basasurak, kare batang kayu intu tana manapuk lokap.

¹³Batang cemara akan mangganti onak duhi, taloh imbul je mangambang akan mangganti rowut. Jete manjadi mangat Aku inarong; kilau tanda katatahie je jaton akan nihau.”