Read Ngaju YESAYA 56 Bible Online

YESAYA 56 - Ngaju bible

YESAYA 56

¹TUHAN hamauh dengan ungkup Ayue, “Keleh malalus taloh je bujur tuntang je hakabuah dengan kare parentah-Ku. Awi hanjulo tinai Aku dumah manyalamat keton tuntang kaadilan ayung-Ku imparahan.

²Aku memberkat oloh je mahaga andau Sabat tuntang dia mamapa andau te. Oloh je dia mawi kapapa akan iawi-Ku dengan bahalap.”

³Oloh bangsa beken je tame ungkup TUHAN dia tau hamauh, “TUHAN dia manyoho aku manyembah Ie hayak dengan ungkup Ayue.” Oloh je imbuto dia tau manirok “Aku dia tau omba ungkup TUHAN, awi aku dia tau dinon anak.”

⁴TUHAN hamauh dengan ewen, “Amon keton mahaga andau Sabat, amon keton baketep dengan janjing-Ku tuntang malalus taloh je manyanang atei-Ku,

⁵maka aran keton akan ingenang intu Humang-Ku tuntang intu marak bangsa ayung-Ku. Jete labih bahalap bara mingkes kare anak hatue tuntang bawi. Keton inenga-Ku aran je katatahie je dia akan ingalapean.”

⁶TUHAN hamauh dengan kare oloh bangsa beken je jari itong ungkup TUHAN, je sinta TUHAN tuntang manempo Ie, tuntang je mahormat andau Sabat tuntang baketep dengan janjin Ayue.

⁷ “Keton akan iimbit-Ku akan Sion, akan bukit-Ku je barasih,[76] tuntang inenga-Ku kahanjak intu huma sombayang aing-Ku. Kare parapah je iluput keton intu mesbeh-Ku akan inarima-Ku. Humang-Ku akan inyewut human lakudoa akan kare bangsa.”

⁸Kalotoh koan TUHAN Je Pangkahai je magah Israel buli bara eka tawanan, “Aku akan mimbit kare oloh beken uka omba ewen je jari imumpong.”

⁹TUHAN manyoho kare bangsa beken dumah sama kilau meto basiak uka manangkarap ungkup Ayue.

¹⁰Koan TUHAN, “Kare pamimpin bangsa ayung-Ku uras oloh babute! Ewen dia katawan taloh en-en. Ewen kilau aso bisu je dia tau mangang, baya batiroh ih tuntang nupi. Mangat toto ewen batiroh!

¹¹Ewen kilau aso basulok je dia puji besoh. Kare pamimpin te dia tau harati. Genep bitie manumon kahandak aie tuntang manggau kaontonge kabuat.

¹²Kare oloh pambusau te hamauh, ‘Ayo itah mihop anggor tuntang mihop sampai peda! Andau jewu akan labih bahalap bara andau toh!’ ”