Read Ngaju YESAYA 57 Bible Online

YESAYA 57 - Ngaju bible

YESAYA 57

¹Oloh tetek tuntang oloh bahalap matei, tuntang jaton ije oloh je harati atawa manantuanie. Limbah matei ewen lapas bara calaka tuntang melai dengan kasanang.

³Tapi keton, jalahan oloh badosa, kantoh akan pangadilan. Keton dia labih bahalap bara tukang seher, oloh je rajin habandong tuntang malontei!

⁴Eweh je inatawe keton? Eweh je ihababaka keton? En diakah keton turonan oloh pananjaro tuntang tukang mambarontak?

⁵Keton je manyembah kare dewa kasiwoh ganan keton manalua arep keton hong kipen bandong intu penda kare batang kayu karamat eka keton manyembah. Keton mangubur kare anak keton intu petak loau Sungei, into kare helat batu.

⁶Badai ih keton manampunan kare batu malisen bara hete. Jete ie bagin keton! Intu kare batu te kea ikau manusoh anggor tuntang maluput parapah gandom. Keton manyangka Aku mangilak uras kare taloh te?

⁷Ikau haguet akan kare tantan bukit uka maluput parapah tuntang mameda belai kipen bandongm.

⁸Ikau mangkepan kare hampatongm je bakanji intu bauntonggang lawang humam. Keton jari malihi Aku. Ikau mengkak pakaiam tuntang lompat akan ranjang je impalombah dengan oloh je inyintam je iupahm hinje ikau, palus ikau mameda angat kipem.

⁹Ikau mahapan minyak tuntang taloh je mangat ewaue, palus haguet manyembah dewa Molokh. Keton mangirim kare sarohan akan kare lewu kejau, akan lewun oloh matei haream.

¹⁰Sambil jaton mundur keton heka-heka manggau kare dewa. Keton manyangka kare dewa te tau manenga semangat taheta, je mawi keton dia balemo.

¹¹TUHAN hamauh, “Eweh kare dewa te je jari mawi ikau mikeh, sampai ikau mananjaro tuntang dia mingat Aku? En ikau dia manyembah Aku tinai awi Aku tahi manyuni arep-Ku?

¹²Tapi Aku mansanan akam; kahalapm te palsu, tuntang uras gawim te dia baguna akam.

¹³Amon keton mangkariak keleh kare hampatong te manyalamat keton! Ewen akan nihau inambalang riwut tuntang lilap hapan sinde inariup! Tapi oloh je bakalindong intu Aku akan mawaris lewu te tuntang manyembah Aku intu humang-Ku.”

¹⁴Aton je hamauh, “Nampa tuntang natap jalan akan ungkup-Ku, kanan kare taloh je mahalang.”

¹⁵Awi kalotoh koan Hatalla Pangkahai je barasih, je kuasa palus katatahie, “Aku melai intu eka je gantong tuntang barasih, tuntang kea marak kare oloh je randah atei tuntang je manyasal dengan kare dosae uka mahalalian samangat tuntang kaharap ewen.

¹⁶Dia katahie Aku manyalan ungkup-Ku; dia katatahie Aku sangit, uka ewen ela undur, awi Aku je mambelom ewen.[77]

¹⁷Dosa kakohon ewen je mawi Aku sangit, awi te ewen ihukum tuntang ilihi-Ku. Tapi ewen badungil tuntang tetep mintih jalan ewen kabuat.

¹⁸Aku jari mite gawin ewen, tapi ewen akan impakeleh-Ku kea. Aku akan mangagalan tuntang mandohop ewen tuntang mampong oloh je kapehe atei.

¹⁹ Aku akan manenga kasanang akan oloh samandiai, oloh je tokep atawa je kejau. Aku akan mampakeleh ungkup-Ku.

²⁰Tapi oloh je papa atei kilau tasik je hagalombang tuntang dia puji taduh. Dehes mimbit rotik tuntang lumpur.

²¹ Jaton kasanang akan oloh badosa,” koan TUHAN.