Read Ngaju YESAYA 58 Bible Online

YESAYA 58 - Ngaju bible

YESAYA 58

¹TUHAN hamauh, “Keleh mangkariak sapire kaolihm! Sanan akan ungkup-Ku kare dosan ewen.

²Ewen manyembah Aku sining andau, tuntang handak mangatawan kahandak-Ku, kilau jaka ewen malalus taloh bahalap, tuntang baketep dengan hukum-Ku. Ewen hamauh je ewen sanang manyembah Aku tuntang rajin dengan parentah-Ku je adil.”

³Bangsa te misek, “Akan en puasa amon TUHAN dia mite? Kanduen itah mamparandah arep itah amon TUHAN dia manampayah?” TUHAN misek, “Toto, katika keton puasa keton manggau ontong kabuat tuntang mangapehe atei oloh je iupah keton.

⁴Metoh puasa, keton hakalahi-kabantah tuntang mawi oloh. Keton manirok hapan jalan puasa keton manggerek atei-Ku uka mahining kare lakoduan keton?

⁵Amon keton puasa, keton mangapehe arep; keton manyontop takolok keton kilau dawen oru. Keton mambirang tapih karong tuntang mambuwor kawo palus menter intu hunjue. En jete je inyewutm puasa? Ikau manyangka Aku sanang dengan gawi te?

⁶Jetoh puasa je irentah-Ku: Lapas kare pasong kapehe tuntang tanggongan tagal taloh je dia adil, tuntang lapas kare oloh je buah henyek.

⁷ Mbagi panginam akan oloh je balau, narima kare oloh je belom susah intu humam. Tenga pakaian akan oloh halowai, tuntang ela manolak paharim je manggau pandohop.

⁸Palus kalawa akan lembut akam kilau andau sawah, tuntang kare himangm kareh keleh. Aku akan mampahayak ikau uka manyalamat ikau. Aku dumah uka mangalindong ikau bara kare musoh hakaliling.

⁹Amon keton balakudoa, Aku akan manarimae. Amon keton mantehau Aku, Aku akan tombah. Ela tinai mangapehe oloh, paterai kamusoh tuntang auh je mamapa oloh.

¹⁰Tenga panginan akan oloh je balau tuntang dohop kare oloh je inindas. Amon ikau mawi taloh te, maka kakaput hakalilingm akan manjadi kalawa kilau handau.

¹¹Aku akan harajur mangagalan ikau tuntang mambesoh ikau intu petak je keang; Aku akan manjaga ikau uka tetep barigas tuntang abas. Ikau akan sama kilau kabon je sukup danume sama kilau tahasak danum je dia puji teah.

¹²Lewu je jari tahi manjadi taloh baduroh baderep akan imangum haluli hunjon galang je solake. Ikau akan inyewut ‘Bangsa je mamangun haluli kare dinding batu tuntang mangambuah kare huma je hancor.’ ”

¹³TUHAN hamauh, “Haga andau Sabat akan TUHAN. Ela nguan gawin pambelom ayum kabuat andau te. Keleh mahaga andau te kilau andau kasanang; haga andau TUHAN tuntang ela nguan jalanan; ela kea bagawi tuntang nguan pander sarita je hayang.

¹⁴Palus ikau akan hanjak awi manempo Aku. Aku akan mawi ikau ihormat hong hapus kalunen. Ikau akan belom sanang dengan hasil pusaka bara Yakob, tato hiangm. Aku, TUHAN jari hakotak.”