Read Ngaju YESAYA 59 Bible Online

YESAYA 59 - Ngaju bible

YESAYA 59

¹Ela mangira TUHAN pahalau balemo uka manyalamat keton, atawa pahalau badengen uka mahining auh pantehau keton.

²Tagal kapapan keton te maka Ie dia mahining katika keton balakudoa intu Ie. Kare dosan keton ih je mawi buku keton imisah bara Hatalla.

³Keton sala awi mananjaro tuntang dia bujur atei, awi keton mamaksa tuntang mampatei.

⁴Keton mimbit pakara dia bara buku sabab tuntang mahakim dengan dia adil. Keton mananjaro tuntang maandal taloh je hayang; keton mawi rencana uka mancalaka oloh beken tuntang malalus kapapa.

⁵Kare rencana ain keton je papa mimbit pampatei kilau tanteloh hadipe tada. Amon tenteloh te bapusit, handipe te balua. Rencana te dia baguna samasinde akan keton, sama kilau pakaian je benange inampa bara sarangan lalawa!

⁷ Keton raju-rajur marencana taloh je papa, tuntang handak bagulong malaluse. Keton jaton bara kikeh mampatei kare oloh je dia sala. Akan kueh bewei keton haguet, keton mampelai karusak tuntang kabinasa.

⁸Keton dia manggau kahinje, tuntang kare taloh gawin keton dia adil. Jalan keton bakalilit, tuntang oloh je omba jalan te dia akan sanang.

⁹Bangsa te hamauh dengan Hatalla, “Toh ikei katawan mbuhen Ikau dia manyalamat ikei bara oloh je manindas ikei. Ikei mentai kalawa, tapi baya aton kakaput.

¹⁰Ikei manggaya-nggayap sama kilau oloh babute; hong bentok andau ikei tantarang sama kilau hong bentok alem; hong marak oloh belom ikei sama kilau oloh matei.

¹¹Ikei mikeh tuntang pehe atei; ikei manggau kaadilan tapi jaton; ikei maharap salamat tapi hayang.

¹²Toto are kapapan ikei intu Ikau; kare dosan ikei manyalan ikei. Ikei toto-toto kasene kapapan ikei, tuntang mangatawan kare dosan ikei.

¹³Ikei jari mungkir tuntang mandarhaka malawan TUHAN, tuntang dia maku omba Hatallan ikei. Ikei jari manindas oloh belom tuntang mahiwang; tirok ikei layang, tuntang kare auh ikei tanjaro.

¹⁴Hukum je adil jari inyare, tuntang kaadilan ingejau. Kabujur atei inahagampang intu kare eka bentok oloh are, tuntang kabujur atei inganan.

¹⁵Jaton tinai oloh je bujur ateie, tuntang eweh je mangejau kapapa ie kabuat kinan awi taloh papa.” TUHAN jari mitee, tuntang Ie dia sanang je jaton tinai kaadilan.

¹⁶ Ie hengan mite jaton oloh je bahanyi mamparahan arep tuntang jaton je tau milang. Palus Ie mahapan kuasan Aie kabuat uka manyalamat tuntang manenga kamanang akan ewen.

¹⁷ Ie mahapan kaadilan tuntang salamat kilau baju sanaman tuntang tanggoi waja. Ie bahanyi uka mahalalian pambelom tuntang mamaleh taloh je dia adil.

¹⁸Ie mamaleh kare musoh tumon gawin ewen. Kare bangsa intu pulau je kejau mahin dia liwus bara hukum Aie.

¹⁹Kuasa tuntang kahain Aie akan ingikeh uras kare oloh bara timor sampai barat. Ie akan dumah sama kilau sungei je badehes je inggohop awi riwut barat.

²⁰ TUHAN hamauh dengan ungkup Ayue, “Aku akan dumah talih Yerusalem uka maliwus kakare keton je hobah bara kare dosan keton.

²¹Aku mampendeng janji dengan keton: Keton inenga-Ku kuasa tuntang ajar aing-Ku sampai katatahie. Keleh majar kare anak keton uka ewen tau majar jete gilir-manggilir bara toh sampai katatahie.”