Read Ngaju YESAYA 6 Bible Online

YESAYA 6 - Ngaju bible

YESAYA 6

¹ Hong nyelon Raja Usia malihi kalunen, aku mite TUHAN. Ie mondok hunjun padadosan Ayue je gantong tuntang hai. Jubah Ayue manyangkulep hapus Human TUHAN.

²Intu kaliling Aie aton mendeng kare taloh belom je hanyala sama kilau apui, gagenepe aton jahawen palapase. Due palapas manutup baue, due manutup bitie, tuntang due tinai akan hapae tarawang.

³ Ewen hatehau sama arepe koae: “Barasih, barasih, barasih Barasih TUHAN Je Jaton Tikas Kuasae. Hapus petak kontep awi kahain Aie je paham.”

⁴ Auh ewen mawi laseh Human TUHAN hagerek, tuntang Human TUHAN te kabuat kontep asep.

⁵Palus aku hamauh, “Calaka! Jaton kaharap hindai akang-Ku, awi nyamangku kontep dosa, tuntang aku melai marak bangsa je kalote kea. Aloh kalote, hapan matangku kabuat aku jari mite Raja, TUHAN Je Jaton Tikas Kuasae!”

⁶Limbah te ije bara taloh belom te tarawang talih aku mimbit barah apui je induae hapan katip bara mesbeh.

⁷Ie manigong biwihku hapan barah apui te tuntang hamauh, “Barah apui toh jari manigong biwihm. Kasalam jari inganan tuntang dosam jari iampun TUHAN.”

⁸Palus aku mahining auh TUHAN hamauh, “Eweh je akan inyoho-Ku? Eweh je akan mimbit barita ain itah?” Aku tombah, “Toh aku. Soho ih aku!”

⁹ Palus Ie manyoho aku haguet mimbit peteh toh akan ungkup: “Keton akan harajur mahining, tapi dia harati. Keton akan harajur manantuani, tapi dia katawan narai taloh je manjadi.”

¹⁰Palus Ie hamauh dengangku, “Keleh manumpol tirok atei kare oloh te, keleh mawi pindinge badengen tuntang matae babute; uka ewen ela mite, mahining atawa harati, palus mules talih Aku tuntang keleh.”

¹¹Aku misek, “Kilen katahie ampin taloh toh akan manjadi, TUHAN?” Tombah ie, “Sampai kare lewu imbinasa sampai jaton oloe, kare huma dia ielai tinai, tuntang petak buang tuntang keang kamahau,

¹²oloh hong kare lewu te handak iharak-Ku akan eka je kejau sampai hapus petak danum manjadi tunis benyem.

¹³Tinai amon marak sapuluh biti magon aton ije biti je batisa intu lewu te, ie kea akan impatei. Tapi kilau batang cemara amon ineweng magon aton tunggule. Kalote kea magon aton tisan bangsa te je indu tamparan ungkup je barasih.”