Read Ngaju YESAYA 60 Bible Online

YESAYA 60 - Ngaju bible

YESAYA 60

¹Keleh misik tuntang manjadi kalawa, o Yerusalem, awi kalawan salamat aim jari dumah; Hatalla mampalawa ikau hapan kahain Aie.

²Kalunen ingontep awi kakaput, kare bangsa inyangkulep awi taloh kaput pijem; tapi kalawan TUHAN lembut intu hunjun ikau.

³Kare bangsa dumah mero-merong talih kalawam, kare raja mipen kalawa je lembut akam.

⁴Tampayah taloh je manjadi hakaliling keton; rayat hapumpong uka buli talih keton. Kare anakm je hatue dumah bara kejau, kare anakm je bawi ientang.

⁵Mite jete ikau hengan tuntang ampin tampayah baum hasangkowong; ateim inggerek tuntang hengan. Panatau kare bangsa iagah akam, ramo bara hila dipah tasik hakutoh akam.

⁶Lewum ingarimbong awi are onta, ewen dumah bara Midian tuntang Epa. Bara Seba oloh mimbit amas tuntang manyan, sambil manara gawin TUHAN.

⁷Kambing tabiri Kedar iagah akam tabiri hatue bara Nebayot inatap akan gawin sombayangm. Parapah te manyanang atei TUHAN Ie mampahalap Human Ayue je kontep kahai.

⁸Narai te je manari-nari sama kilau baunandau sama kilau burong dara je tarawang buli?

⁹Jete kare kapal je dumah tende huang palabohan mimbit ungkup Hatalla buli bara lewu kejau. Perak tuntang amas jadi bahatae akan manara TUHAN Hatallam; akan Hatallan Israel je Barasih Haliai, je mawi ungkup Ayue ihormat.

¹⁰TUHAN hamauh dengan Yerusalem, “Oloh luar akan mamangun haluli dinding lewum, tuntang kare raja akan manyang ikau. Horan Aku mahukum ikau awi kasangit-Ku tapi toh Aku handak sinta ikau.

¹¹ Handau hamalem lawang lewum akan habangah, mangat panatau kare bangsa tau iagah akam, dengan kare rajan ewen kilau oloh tawanan.

¹²Bangsa tuntang karajaan je dia maku manempo Ikau, akan binasa tuntang lilap.

¹³Katamam himba Libanon akan iimbit akam, batang kayu dardar, cemara tuntang alau akan mawi humang-Ku bahalap, tuntang mambungas eka-Ku bahunjeng.

¹⁴ Kare anak ain oloh je mawi ikau dumah manyembah, je puji manawah ikau akan sontop. Ikau akan inyewut ‘Lewun TUHAN’, ‘Sion, Lewu ain Hatalla je Barasih ain Israel’.

¹⁵Ikau dia akan ilihi tuntang inyingi, tuntang dia inalua ungi-ungin. Ikau iawi-Ku eka katamam palus katatahie, eka kahanjak je harajur bewei.

¹⁶Ikau akan ihaga kare bangsa tuntang kare raja, sama kilau ije biti indu mahaga anake. Palus ikau katawan je Aku TUHAN, panyalamat aim, tuntang Ie te Hatallan Israel je abas je maliwus ikau.

¹⁷Aku mimbit amas kilau gantin tambaga tuntang perak kilau gantin sanaman. Inenga-Ku tambaga kilau gantin kayu tuntang sanaman kilau gantin batu. Lewu humam akan iawi-Ku sanang tuntang landang, tuntang irentah awi kaadilan.

¹⁸Jaton tinai barita tahiu kakaras intu lewum, tahiu karusak tuntang kabinasa intu tanahm. Kilau dinding Aku akan mangalindong ikau, tuntang ikau akan manara Aku kilau panyalamat aim.

¹⁹ Ikau dia usah impalawa matanandau metoh handau, tuntang dia usah impalawa bulan metoh hamalem. Basa Aku TUHAN jadi kalawa katatahie akam, Aku mampalawa ikau hapan kahaing-Ku.

²⁰Akam akan aton matanandau je dia puji belep, tuntang bulan je dia puji kalam. Awi Aku TUHAN jadi kalawa katatahie akam wayah tatum tangism akan hapus.

²¹Oloh lewum akan bagawi bujur, ewen akan tempon lewu sampai katatahie. Ewen sama kilau cangkokan je imbul-Ku kabuat, uka mamparahan kahaing-Ku.

²²Keluarga je korik tuntang asi-asi mahin akan jadi bangsa je hai tuntang abas. Aku TUHAN akan jeleng malaluse hong katika je buah.”