Read Ngaju YESAYA 61 Bible Online

YESAYA 61 - Ngaju bible

YESAYA 61

¹ Kuasan TUHAN Je Pangkahai aton intu aku; Ie mintih tuntang manyoho aku uka mimbit barita bahalap akan oloh je belom susah tuntang mampakeleh oloh je jaton bara kaharap; uka mansanan akan oloh je buah tawan je ewen bajeleng iliwus, tuntang akan kare oloh hong penjara je ewen akan ilapas.

² Ie manyoho aku uka mambarita je katikae jari sampai TUHAN manyalamat; uka mampong kakare oloh je kapehe atei, tuntang mambaleh gawin kare musoh ewen;

³uka manenga kahanjak tuntang kasanang akan oloh je buah kajake tuntang kapehe atei; uka mobah kapehen atei ewen jadi nyanyi tara. Ewen akan sama kilau batang kayu je imbul awi TUHAN kabuat. Ewen akan malalus taloh je bahalap tuntang bujur, sampai TUHAN impahai.

⁴Ewen akan mamangun kare lewu je jari tahi baderep tuntang mampendeng kare eka je jari tahi benyem.

⁵O, bangsa ayung-Ku, oloh bangsa beken akan manyang keton; ewen akan manyakatik meto ain keton tuntang manguan tana dengan kabon anggor ain keton.

⁶Keton akan inyewut rewar Hatalla tuntang inggare imam TUHAN itah. Keton mangkeme panatau kare bangsa tuntang mangkeme tamam tagal panatau ewen.

⁷Awi keton jari impahawen due kali lipet, tuntang kapapa hayak kajilek jadi bagin keton, awi keton mandino warisan due lipet into lewun keton tuntang mandino kahanjak je katatahie.

⁸TUHAN hamauh, “Aku sinta kaadilan tuntang basingi dengan gawi je mahenyek tuntang papa. Aku akan manenga upah keton hapan kaketep, tuntang mampendeng janji je katatahie dengan keton.

⁹Turonan keton basewut intu hete-hete, batarong marak kakare bangsa. Palus uras kare oloh je mitee akan mansanan, je bangsa toh imberkat awi-Ku.”

¹⁰ Yerusalem hamauh, “Aku hanjak tagal TUHAN, ateiku hanjak rantang tagal Hatalla. Kilau panganten hatue tuntang bawi mahapan ramo kabungas je uras bahalap, tumon te TUHAN mangkepan intu aku baju salamat tuntang kamanang.

¹¹Kilau binyi je inawor akan lembut jadi taloh imbul, tumon te TUHAN mampalembut salamat tuntang uras kare bangsa akan manara aran Ayue.”