Read Ngaju YESAYA 62 Bible Online

YESAYA 62 - Ngaju bible

YESAYA 62

¹Tagal Yerusalem aku akan hakotak, tagal Sion aku dia akan benyem, sampai ie inyalamat tuntang kamanange mamancar kilau solok apui amon hamalem.

²O Yerusalem, kare bangsa mite kamanangm, kare raja manampayah kahaim. Ikau akan inyewut hapan aran taheta, TUHAN kabuat je akan manenga aran te.

³Ikau jadi sama kilau makota bahalap intu lengen TUHAN, makota karajaan intu lengen Hatallam.

⁴Aram dia tinai ‘Je Ilihi’, lewum dia tinai ‘Je Ungi-ungin’. Ikau akan inyewut ‘Je Inyayang Hatalla’, tuntang lewum inggare ‘Je Jari Kawin,’ awi TUHAN mangilak ikau, Ie sama kilau panganten hatue akan lewum.

⁵Sama kilau ije biti oloh hatue tabela manduan oloh bawi bujang, kalote Ie je manjapa ikau akan manduan ikau akan kabalie,[78] Kilau ije biti panganten hatue hanjak mite kabalie, kalote ampin Hatalla akan marajin ikau.

⁶Intu dinding Yerusalem aku mandak oloh jaga; handau hamalem ewen dia tau benyem, tapi musti harajur mingat Hatalla tahiu janji je jari indehee.

⁷Ewen dia tau manalua Ie mambenyem helo bara Ie mamangun haluli Yerusalem, tuntang mawi ie batarong hong hapus kalunen.

⁸TUHAN je hajanji hapan sumpah tuntang akan malaluse hapan kuasan Ayue: “Aku dia tinai manenga gandom aim akan musoh; oloh bangsa beken dia tinai mihop anggor ayum je ihasilm hapan kare kaheka.

⁹Tapi keton je manampunan taloh je inggetem, akan kuman hasile tuntang manara aran TUHAN; tuntang keton je mamutik bua anggor akan mihop danume intu parantaran Humang-Ku.”

¹⁰Oloh lewu Yerusalem, keleh balua mahalau lawang lewu, natap jalan akan oloh je buli. Tampa jalan hai, nyare kare batue, pendeng kare bandera akan kare bangsa.

¹¹ TUHAN manenga peteh toh akan oloh hapus kalunen, “Sanan akan oloh lewu Sion, ‘Item, TUHAN Panyalamat dumah! Ie impahayak awi kare oloh je jari iliwus Awie.’ ”[79]

¹²Ewen akan inggare ‘Ungkup ije barasih; ‘Ungkup je inyalamat TUHAN’. Yerusalem akan inyewut ‘Lewu je inimang TUHAN’, Lewu je dia tinai ilihi TUHAN’.