Read Ngaju YESAYA 63 Bible Online

YESAYA 63 - Ngaju bible

YESAYA 63

¹ “Eweh ie je dumah bara Bosra intu Edom? bajue bahandang, pakaiae bahalap; ie mananjong[80] marak kagagah kamentenge.” “Aku toh TUHAN je olih manyalamat tuntang dumah mimbit barita kamanang.”

²“Mbuhen pakaiam kilau te kahandange, sama kilau bajun oloh je mahamis anggor?”

³ “Kabuat bewei Aku tame akan eka mahamis anggor bara marak ungkup-Ku jaton ije oloh je mandohop Aku. Kare bangsa ihunje-inandik-Ku huang kasangit-Ku, sama kilau mahunje-manandik bua anggor. Dahan ewen manampurak mambisa bajung-Ku, mamapa hapus pakaiang-Ku.

⁴Aku jari marencana andau uka mambaleh, tuntang wayah kaliwus akan ungkup-Ku.

⁵ Aku manggau, tapi jaton oloh je mandohop, Aku hengan jaton ije je mandohop. Palus kaabas-Ku kabuat mandohop Aku, kasangit-Ku mandohop Aku.

⁶Huang kasangit-Ku je hasep, ihunje-nandik-Ku kare bangsa; imbinasa-Ku ewen, tuntang dahan ewen inusoh-Ku akan petak.”

⁷Aku handak mambarita sintan TUHAN tuntang manara Ie ganan kare gawin Aie. Hakutoh berkat inengae akan ungkup Ayue, awi Ie kontep asi tuntang sintae jaton bara tikas.

⁸TUHAN hamauh, “Toto haliai, ewen te ungkup aing-Ku, kare anak je dia mawi kanyasal.” Palus Ie jadi panyalamat ewen,

⁹Ie kabuat buah kasusah ewen.[81] TUHAN dia manyoho sarohan atawa wakil; Ie kabuat je maliwus ewen tagal sintan Aie tuntang asin Ayue Ie harajur mahaga ewen bara horan.

¹⁰Tapi ewen mandarhaka tuntang mangapehe atei TUHAN. Palus Ie mules likute jadi musoh ewen Ie kabuat parang malawan ewen.

¹¹Palus ewen[82] mingat taloh jaman horan, jaman Moses, rewar TUHAN. Ewen misek, “Intu kueh TUHAN je mangagalan kare pamimpin ungkup Ayue mahalau tasik? Intu kueh TUHAN je manenga kuasan Aie akan ewen?

¹² Intu kueh TUHAN je mampahayak Moses mahapan lengen Ayue je abas menteng, tuntang manyila danum intu taharep baun ewen mangat aran Ayue basewut palus katatahie?

¹³Hong kueh TUHAN je mangagalan ewen mananjong mahoroi danum je handalem? Sama kilau kuda mahoroi padang pasir, ewen dia puji balawo tantarang.”

¹⁴TUHAN mimbit ewen akan eka malayan kaheka, sama kilau meto je ingagalan uka kuman oru hong padang. Tumon te Ie mangagalan ungkup Ayue, uka aran Aie impahai.

¹⁵O TUHAN, keleh tampayah bara sorga, bara eka Ayum je barasih tuntang hai. Hong kueh sintan Aim tuntang kaabas Ayum? Kueh kataun Aim tuntang asin Aim? Ela manahan jete bara ikei.

¹⁶En dia Ikau Bapa ikei? Abraham tuntang Yakob dia kasene ikei. Tapi Ikau o TUHAN, Bapa ikei, Panyalamat ikei bara jaman horan.

¹⁷O TUHAN, mbuhen Ikau manalua ikei layang? Mbuhen Ikau manekang atei ikei sampai ikei dia mikeh dengan Ayum? Keleh haluli tagal kare rewar Ayum, tagal ungkup Ayum, oloh baris Aim.

¹⁸Mbuhen Ikau manalua musoh mahunje-manandik Humam, tuntang kare oloh mamapa bukit Ayum je barasih?[83]

¹⁹Ikau mawi ikei kilau jaka Ikau dia puji mimbing kuasa akan ikei; kilau jaka ikei dia puji jadi ungkup Ayum.