Read Ngaju YESAYA 64 Bible Online

YESAYA 64 - Ngaju bible

YESAYA 64

¹Keleh mindai langit palus mohon, o TUHAN, keleh mawi kare bukit hongge intu taharep Aim,

²sama kilau apui mampanyala kayu tuntang mawi danum manara. Parahan kuasan Ayum akan kare musoh Aim, sampai kare bangsa hagenjeh intu taharep Aim.

³Ikau puji mawi taloh hai, je dia inyangka ikei. Ikau mohon, tuntang intu taharep Aim kare bukit hongge.

⁴ Hindai puji aton oloh je mahining, tuntang hindai puji aton oloh je mite je beken bara Ikau aton hatalla je bagawi, akan oloh je harap dengae.

⁵Ikau manambang oloh bujur ateie tuntang belom tumon kahandak Aim. Ikau sangit dengan ikei, tapi ikei tetep badosa puna bara bihin ikei sala.[84]

⁶Ikei samandiai uras oloh papa, aloh gawin ikei je bahalap mahin sala tuntang papa. Ikei akan lilap awi kapapan ikei sama kilau dawen balayu inarawang riwut.

⁷Jaton ije je balakudoa intu Ikau, atawa balaku dohop Dengam, awi Ikau manyahokan baun Ayum bara ikei, tuntang manalua[85] ikei imbinasa awi dosan ikei.

⁸Tapi Ikau, o TUHAN, Bapa ikei, ikei toh puna petak liat, tuntang Ikau je manampa ikei; ikei uras tampan lengen Aim.

⁹Awi te ela pahalau sangit, o TUHAN, ela tinai mingat kare dosan ikei; tampayah, ikei ungkup Ayum.

¹⁰Kare lewun Ayum je barasih manyarowa padang pasir, Yerusalem jadi padang keang je tunis benyem.

¹¹Human Hatalla je barasih tuntang hai eka tato hiang ikei manara aran Aim, jari nihau awi apui; uras eka je ingilak ikei jadi eka tuyok taloh baderep.

¹²Ikau mite uras taloh te, o TUHAN, lalehan Ikau tetep mambenyem? En Ikau akan manalua ikei buah kapehe je paham manyangit?