Read Ngaju YESAYA 65 Bible Online

YESAYA 65 - Ngaju bible

YESAYA 65

¹ TUHAN hamauh, “Aku batatap tombah auh ungkup-Ku, tapi ewen dia balakudoa intu Aku. Aku manatap arep-Ku mangat ewen manyondau Aku, tapi ewen dia manggau Aku. Bangsa te dia mantehau Aku, aloh Aku tatap tombah: Toh Aku!

² Aku harajur batatap manyambut ungkup-Ku tapi ewen rajin mandarhaka. Bangsa te mawi kapapa tuntang manumon rencana ayue kabuat.

³Ewen harajur mawi Aku sangit awi maluput parapah intu kare kabon akan kare dewa[86] tuntang manotong manyan intu hunjun mesbehe.

⁴Hamalem ewen haguet akan kare goha tuntang kubur uka balaku nasehat kare liau oloh matei. Ewen kuman isin bawoi tuntang manyurop danum joho bara isin meto je pali.

⁵Ewen hamauh, ‘Akan kanih ela manigong ikei, awi ikei barasih tuntang imisah bara keton!’ Aku dia tahan mite ampin ewen! Kasangit-Ku dengan ewen sama kilau apui je dia puji belep.

⁶Hukuman akan ewen jari inyurat intu taharep-Ku. Toto Aku dia akan tetep benyem. Aku akan mambaleh kapapan ewen

⁷tagal dosan ewen tuntang dosan tato hiang ewen. Ewen mahina Aku tuntang manotong manyan akan kare dewa hong eka manyembah intu bukit. Aku akan mambaleh mawi ewen tumon gawin ewen hong katika je jari halau.”

⁸TUHAN hamauh, “Bua anggor je magon aton danume dia inganan, tapi iawi jadi danum anggor. Kalote kea dengan bangsa aing-Ku, ewen dia imbinasa urase, awi marak ewen magon aton je manempo Aku.

⁹Belahe oloh Israel bara suku Yuda akan imberkat-Ku, tuntang turonan ewen akan tempon petak bukit ayung-Ku. Kare oloh intih-Ku je manempo Aku akan melai intu hete.

¹⁰ Ungkup-Ku akan manyembah Aku; tabiri tuntang sapi ain ewen akan kuman oru intu petak rampar Saron tuntang Janah Akhor.

¹¹Tapi dia kalote kajarian kare oloh je malihi Aku, je dia paduli Sion, bukit-Ku je barasih,[87] je maluput parapah akan Gad tuntang Meni, kare dewa ontong-tuah tuntang kajarian olon.

¹²Keton samandiai akan uras matei awi katulas olon. Awi, katika Aku mantehau, keton dia tombah, tuntang katika Aku hakotak keton dia mahining. Keton labih rajin malawan Aku tuntang mawi taloh papa.

¹³Toto haliai, oloh je manyembah Aku akan kuman, tapi keton balau. Ewen akan mihop, tapi keton teah belai. Ewen akan hanjak, tapi keton impahawen.

¹⁴Toto haliai, ewen akan basasurak hanjak, tapi keton manangis rundu-rundu.

¹⁵Kare oloh intih-Ku akan mahapan aran keton akan hapae manyapa; ‘Keleh TUHAN Je Pangkahai mampatei keton sama kilau ewen!’ Tapi oloh je manumon auh-Ku akan inenga-Ku aran taheta.

¹⁶Genep bitin oloh intu lewu te je balaku berkat, akan balaku berkat bara Hatalla je baketep. Genep bitin oloh je handak sumpah, akan sumpah tagal aran Hatalla je baketep. Awi kapehe je jari halau jari nihau tuntang ingalapean.”

¹⁷ TUHAN hamauh, “Aku akan manjapa langit je taheta tuntang petak je taheta. Kare taloh je manjadi helo akan ingalapean tuntang dia oloh mingate tinai.

¹⁸Keleh hanjak rantang sampai katatahie tagal taloh je injapa-Ku. Aku manjapa Yerusalem taheta kontep kahanjak, tuntang oloh lewue hanjak rantang.

¹⁹ Aku kabuat akan hanjak tagal Yerusalem, tuntang sanang hanjak tagal oloh lewue. Intu lewu te jaton tinai tangis, tuntang jaton tinai auh kariak balaku dohop.

²⁰Kare anake jaton je matei metoh korik, tuntang oloh bujang akan sampai umur kabakase. Oloh je umure saratus nyelo akan ianggap tabela, tuntang je matei helo bara te akan ianggap buah hukuman bara Aku.

²¹Oloh akan mamangun huma tuntang melai hete kabuat; oloh beken dia akan melai hete. Ewen akan mimbul kabon anggor tuntang mangkeme kamangat danum anggor; oloh beken dia akan mihope. Ungkup-Ku akan panjang umur sama kilau batang kayu, tuntang mangkeme hasil gawin ewen.

²³Uras taloh je ilalus ewen akan mimbit hasil, tuntang kare anak ewen dia akan matei nyalenga. Ewen tuntang turonan ewen akan imberkat sampai katatahie.

²⁴Helo bara ewen balaku, Aku jari tombah; helo bara ewen hapus balakudoa, Aku jari manarima lakudoan ewen.

²⁵ Sarigala tuntang anak tabiri haya-hayak kuman oru; singa kuman tampilai kilau sapi, tuntang handipe dia mawi bahaya tinai. Intu hapus bukit aing-Ku je barasih, jaton tinai oloh je mamparugi tuntang je mawi kapapa.”