Read Ngaju YESAYA 66 Bible Online

YESAYA 66 - Ngaju bible

YESAYA 66

¹ TUHAN hamauh, “Langit jete padadusang-Ku, tuntang kalunen jete eka tatap paing-Ku. Palus huma je kilau en je handak imangun awim akang-Ku, tuntang eka en taloh je handak iawim akan eka-Ku melai?

²Langit tuntang petak jete tampan lengeng-Ku, maka taloh handiai te injapa awi-Ku. Tapi taloh je eka karajingku iete oloh je randah atei, je manyasal tagal kare dosae, je mikeh tuntang manumon auh-Ku.

³Tapi bangsa te bagawi mana koae; ewen rajin sombayang mahapan cara je bakajile-jilek. Akan ewen jaton kabekee: maluput parapah mahapan sapi hatue tuntang maluput parapah mahapan olon, maluput parapah anak tabiri tuntang mamelek uyat aso; maluput parapah gandom tuntang maluput parapah dahan bawoi, manotong manyan tuntang manyembah hampatong.

⁴Awi te Aku kea bagawi mana koang-Ku tuntang mantakan ewen dengan kare calaka je injilek ewen. Awi metoh Aku mantehau, jaton ije je tombah; katika Aku hakotak, jaton je manyeneh. Ewen labih rajin malawan Aku tuntang malalus taloh papa.”

⁵Seneh taloh je insanan TUHAN, o keton je mikeh tuntang manumon Auhe, “Awi keton baketep dengang-Ku, aton marak bangsa ain keton je basingi dengan keton, tuntang dia maku hinje dengan keton. Ewen hababaka keton awie hamauh, ‘Keleh TUHAN mamparahan kahaie, mangat ikei mite kahanjakm.’ Tapi ewen kabuat je mandino kahawen.

⁶Hining! Aton auh je hagotok intu lewu; aton auh bara Humang-Ku; jete auh-Ku je metoh mambaleh mawi musoh!

⁷ Lewu barasih ayung-Ku kilau ije biti indu je luas helo bara mangaliat kapehe; je manak anak hatue helo bara mangkeme kapehe awi manak.

⁸Eweh puji mahining taloh je sama kilau te? Eweh puji mite kajadian je macam te? Tapi bangsa Israel jari inakan metoh Sion nampara mangkeme kapehe awi luas anake.

⁹Ela manyangka Aku mimbit ungkup-Ku sampai katika inakan tuntang dia manalua ewen inakan.” Koan TUHAN.

¹⁰Keleh hanjak hayak dengan Yerusalem, o kakare oloh je sinta ie. Keton je kapehe atei tagal ie, toh tau hanjak rantang.

¹¹Keton akan mangkeme kasanang kamangate, sama kilau ije biti anak manuso indue.

¹²Awi TUHAN hamauh, “Keton akan mangkeme kasanang sama kilau sungei je mahasor; panatau kare bangsa akan iagah akan keton sama kilau sungei je soho. Keton sama kilau anak je impatuso tuntang ientang indue, hayak imasu-masut intu huang pangkuae.

¹³Aku akan mampong keton hong Yerusalem, sama kilau ije biti indu mampong anake.

¹⁴Mite jete, keton akan hanjak, tuntang tau barigas hayak abas sama kilau oru je bahijau. Palus kare rewar-Ku akan mangkeme kuasang-Ku tuntang musoh-Ku akan mangkeme kasangit-Ku.”

¹⁵Toto, TUHAN akan dumah huang apui; Ie akan lompat karetae sama kilau riwut barat uka manusoh kasangite, tuntang malait hapan auh karas.

¹⁶Awi kakare oloh je tarasondau sala akan ihukum Awie hapan apui tuntang padang, tuntang are je ihukum matei.

¹⁷TUHAN hamauh, “Kakare oloh je mamparasih arep uka babaris akan kare kabon tagal kare dewa[88] tuntang manyembah kare dewa te, akan binasa hayak kare oloh je kuman isin bawoi tuntang balawau hayak panginan beken je eka kajilek.

¹⁸Aku katawan[89] tirok tuntang gawin ewen. Aku dumah[90] uka mamumpong kare oloh bara kakare bangsa. Hong katika ewen hapumpong, ewen akan mite kuasang-Ku.

¹⁹Aku akan mingkes ije tanda intu bentok ewen. Isut bewei bara ewen te je akan inyalamat-Ku. Ewen akan inyoho-Ku manalih kare bangsa intu lewu kejau je dia puji mahining tahiu Aku atawa mite kahai tuntang kuasang-Ku: akan Spanyol, Libia,[91] tuntang Lidia dengan kare oloh pamanahe je apik, akan Tubal tuntang Yunani. Ewen akan mambarita kahaing-Ku marak kare bangsa te.

²⁰Bara kare lewu te ewen akan mimbit haluli kare paharin keton sama ije bangsa kilau panenga akang-Ku. Ewen te akan mimbit kare oloh te akan bukit-Ku ije barasih[92] intu Yerusalem hayak manongkang kuda, kalidai tuntang onta, tuntang dengan kareta hayak garobak, kilau bahut oloh Israel mimbit akan Human TUHAN parapah gandom huang sarangan je barasih.

²¹Belahe ewen akan iawi-Ku jadi imam tuntang oloh Lewi.

²² Sama kilau langit taheta tuntang petak taheta akan dehen awi kuasang-Ku, tumon te kea turonan tuntang aran keton tetep dehen.

²³Genep bulan taheta tuntang andau Sabat hapus ungkup oloh kalunen akan dumah uka manyembah Aku intu Yerusalem.

²⁴ Katika haguet, ewen akan mite hantun kare oloh je jari mandarhaka malawan Aku. Uret je kuman hantun ewen dia akan matei, tuntang apui je mangehu ewen dia akan belep; taloh tampayah je bakaike-ikeh akan oloh handiai.”