Read Ngaju YESAYA 7 Bible Online

YESAYA 7 - Ngaju bible

YESAYA 7

¹ Raja Ahas jete anak hatue ain Yotam tuntang eson Usia. Metoh ie marentah Yuda, maka lembut parang. Resin raja Siria, tuntang Pekah anak Remalya raja Israel, dumah manyarang Yerusalem. Tapi ewen dia olih marabut lewu te.

²Katika raja Yuda mahining pasukan Siria jari tame akan wilayah Israel kilau pakat ain musoh, ie tuntang bangsae paham mikeh, sampai ewen hagenjeh kilau batang kayu je iongge awi riwut.

³TUHAN hamauh dengan Yesaya, “Imbit anakm Sear Yasub[8] tuntang lius manyondau Raja Ahas. Ikau akan sondau ie intu tapakan balur talaga hila hunjun, eka kare binatu bagawi.

⁴Suman akan raja je ie musti manatap arepe tapi tetep sanai. Ie dia usah mikeh atawa bingung. Kasangit Raja Pekah tuntang Raja Resin dengan tantarae kare oloh Siria te dia labih bahaya bara due pandok apui je hasep.

⁵Siria jari pakat dengan Israel tuntang rajae.

⁶Ewen handak manyarang Yuda tuntang mampikeh oloh lewue mangat omba pihak ewen, palus mangkat anak hatue ain Tabeel jadi raja.

⁷Tapi aku, TUHAN mansanan je taloh te dia akan manjadi.

⁸Awi Siria dia labih abas bara Damaskus lewun rajae, tuntang Damaskus dia labih abas bara Raja Resin. Sadang hong katika jahawen puluh lime nyelo, Israel akan pisah darai sampai dia olih kilau bangsa.

⁹Israel dia labih abas bara Samaria, lewun rajae, tuntang Samaria dia labih abas bara Raja Pekah. Amon keton dia toto-toto percaya dengang-Ku, pasti keton dia olih tahan.

¹⁰TUHAN manyampai peteh beken akan Ahas:

¹¹“Laku mangat TUHAN, Hatallam manenga ije tanda akam, en jete bara oloh matei intu penda atawa bara langit intu hunjun.”

¹²Ahas tombah, “Aku dia maku balaku tanda. Aku dia maku mancoba TUHAN.”

¹³Palus Nabi Yesaya hamauh, “Amon kalote, hining o turonan Raja Dawid! Dia sukup keton mancoba kasabar olon, sampai keton mancoba kasabar Hatallangku kea?

¹⁴ Toh TUHAN kabuat akan manenga tanda akan keton: Ije biti bawi[9] je batihi akan manak hatue je inggare Imanuel.[10]

¹⁵Metoh ie sukup kahaie akan manukas kabuat, lewu te akan makmur.[11]

¹⁶Awi helo bara katika te dumah, due lewu je inenga awi kare raja je ingikehm te akan ilihi buang.

¹⁷TUHAN akan mampadumah raja Asur, palus ikau tuntang hapus keluargam hayak rayatm akan mangkeme kare andau kontep kapehe je labih tamam bara je puji ingkeme keton bara metoh kapusit karajaan Israel tuntang Yuda.

¹⁸Intu wayah te TUHAN akan mantehau Misir tuntang Asur, palus due bangsa te dumah sama kilau kawan langau tuntang bajanyi je mangarimbong kare tiwing mendeng tuntang kare helat batu karang. Ewen akan mangalukop genep rowut baduhi tuntang genep eka je aton orue.

²⁰TUHAN akan mimbit raja Asur mawi Israel sama kilau ije tukang gunting je manggunting lepah kare balau tuntang bulu intu biti.

²¹Hong wayah te, amon ije biti oloh mahaga ije kongan sapi tabela tuntang due kongan kambing bewei,

²²susu je ihasil meto te labih bara sukup akan kare oloh je batisa hong lewu te. Toto, ewen akan mihop susu tuntang mado.

²³Intu wayah te kare kabon anggor je imbul sakoyan kabatang huang ije kakabon tuntang je barega sakoyan duit perak, akan inumbo rowut baduhi.

²⁴Oloh je haguet akan hete musti mimbit busur tuntang panah, awi hapus lewu te kontep awi kare rowut je baduhi.

²⁵Tuntang daerah habukit gantong je bahut inguan tuntang imbul, kea kontep rowut baduhi, sampai oloh dia bahanyi akan hete. Petak te baya baguna akan eka sapi tuntang tabiri kuman oru.”