Read Ngaju YESAYA 8 Bible Online

YESAYA 8 - Ngaju bible

YESAYA 8

¹TUHAN hamauh dengangku, “Duan ije batu tulis hai, palus surat hapan kare hurup je tarang:[12] ‘Gawi Marampas je Balinga, Gawi Marampok je Nyalenga.’[13]

²Tehau due biti oloh je tau imercaya kilau saksi, iete Imam Uria tuntang Sakharia, anak Yeberekhya.”

³Pire-pire katahie limbah te kabalingku mimbit arepe. Metoh anak ikei inakan, TUHAN hamauh dengangku, “Keleh manampa arae ‘Gawi Marampas je Balinga, Gawi Marampok je Nyalenga.’

⁴Awi helo bara anak te sukup kahaie tau manyewut ‘Bapa’ tuntang ‘Umai’, hapus panatau Damaskus tuntang uras kare taloh rampas ain Samaria kareh iimbit akan Asur.”

⁵TUHAN hakotak tinai dengangku, Ie hamauh,

⁶“Bangsa toh manolak danum je teneng bara anak Sungei Siloah,[14] tuntang sanang[15] dengan Raja Resin tuntang Raja Pekah.

⁷Tagal te, aku, TUHAN, akan mampadumah raja Asur tuntang hapus tantarae akan manyarang Yuda. Ewen akan miar kilau Sungei Euprat je mangontep tuntang mampaleteng kare tiwinge.

⁸Ewen akan mawi Yuda kilau sohon danum je nyira uyat kagantonge tuntang mampaleteng taloh samandiai.” Hatalla mamapahayak itah![16] Palapas Ayue je hambirang mangalindong lewun itah.

⁹Keleh pumpong hayak kagenjeh, o kare bangsa! Hining o kare tapakan kalunen! Keleh tatap akan parang, tapi marak atei je gaer! Yoh, keleh tatap marak angat je gaer.

¹⁰Tampa rencana, tapi uras taloh te akan balang. Duan kaputusan, tapi jaton gunae, awi Hatalla mampahayak ikei.

¹¹Aku inguasa awi TUHAN tuntang impingat uka ela mahoroi jalan je ihalau bangsa te. Koae,

¹² “Ela manyangka kapakat manumon taloh je inirok ewen kapakat; tuntang ela mikeh dengan taloh je ingikeh ewen.

¹³Keleh mingat, je Aku toh TUHAN, Je Jaton Tikas Kuasae te barasih. Baya Aku bewei je musti ingikeh keton.

¹⁴ Awi Aku paham barasih, Aku jadi batu patarang akan rayat Yuda tuntang Israel, tuntang jarat akan oloh lewu Yerusalem.

¹⁵Are oloh akan balawo tantarang batu tuntang bahimang. Ewen akan tambohos akan huang parangkep.”

¹⁶Keton kare muridku musti mingkes tuntang mahaga kare peteh je inenga Hatalla akangku.

¹⁷ TUHAN jari manyahokan Arep bara turonan Yakob, ungkup Ayue; tapi aku percaya tuntang harap Dengae.

¹⁸ Toh aku dengan kare anak je inenga TUHAN akangku, TUHAN Je Jaton Tikas Kuasae je marentah intu Bukit Sion, manyoho ikei jadi tanda akan ungkup Israel.

¹⁹Tapi kare oloh je handak manyoho keton balaku tirok bara kare dukun je habisik tuntang jumit-jumita. Kare oloh te akan hamauh, “En dia patut itah balaku tirok bara kare roh tato hiang itah tagal kare taloh je inggau awi oloh je belom?”

²⁰Keleh tombah kalotoh, “Keleh mahining auh ajar TUHAN! Oloh je dia hakotak tumon auh ajar te, ie jaton bara kaharap.”[17]

²¹Kare oloh je asi-asi tuntang balau akan kumbang kamba hong lewu te. Awi balau ewen rahas sampai mangotok raja tuntang Hatallan ewen. Akan kueh bewei ewen manampayah, akan hunjun

²²atawa akan penda, ewen dia mite taloh en-en beken bara kapehen huang tuntang kakaput hayak kaderem taloh je mampikeh. Ewen akan inganan akan eka je kaput te.

²³Tapi dia sampai katatahie lewu te mangkeme kapehen angat huange. Daerah je ielai awi kare suku Sebulon tuntang Naptali puji iitong randah awi TUHAN. Tapi hong katika je akan dumah, ie manjadi eka hormat akan hapus wilayah bara Tasik Bentok akan hila timor sampai silan Sungei Yordan, kea sampai Galilea je ielai awi kare oloh bangsa beken.