Read Ngaju YESAYA 9 Bible Online

YESAYA 9 - Ngaju bible

YESAYA 9

¹ Bangsa je hong kakaput manampayah kalawa je paha-pahai. Je melai hong kangkalingen pampatei impalawa awi kalawa je paha-pahai.

² TUHAN, Ikau manenga akan ewen kahanjak ije hai,[18] Ikau mawi ewen basasurak. Ewen hanjak awi kahalap Aim, sama kilau oloh je hanjak rantang katika manampunan hasil getem, atawa mambagi taloh rampasan.

³Ikau jari manduan bara ewen tanggongan je babehat tuntang kayu pikul bara hunjun bahae. Ikau mampakalah bangsa je tulas te je mimes ungkup Aim. Sama kilau intu jaman horan katika Ikau mampakalah tantara Midian.

⁴Sapatun tantara je auhe hakarokop tuntang baju je mandoi daha, akan lepah kinan apui.

⁵Ije biti anak jari inakan akan itah; itah inenga ije biti anak hatue. Ie akan jadi pamimpin itah. Ie inggare: “Panasehat Je Pintar Harati”,[19] “Hatalla Je Kuasa”, “Bapa katatahie”, “Rajan Kasanang”.

⁶Ie marentah kilau raja turonan Dawid, kuasan Aie paham hai. Lewun Ayue harajur sanang mangat; Ie marentah hagalang parentah Hatalla tuntang kaadilan bara toh palus katatahie. TUHAN Je Jaton Tikas Kuasae pasti malaluse.

⁷ TUHAN jari manukas hukuman akan karajaan Israel.

⁸Hapus bangsa Israel tuntang oloh lewu Samaria akan katawan TUHAN te je malalus taloh te. Toh ewen bajoho tuntang gantong ateie. Koan ewen,

⁹“Kare huma je imangun bara batu bata jari baduroh, tapi ikei akan mawi kare huma taheta je imangun bara batu. Kare batang sikon jari ineweng, tapi akan ingganti ikei hapan kayu cemara Libanon je paling bahalap.”

¹⁰TUHAN jari manggerek musoh ewen[20] akan malawan ewen.

¹¹Bangsa Siria intu timor tuntang bangsa Pilistin intu barat manguasa Israel. Tapi TUHAN magon sangit tuntang magon mahukum.

¹²Bangsa Israel hindai kea manyasal, aloh jari buah hukum awi TUHAN Je Jaton Tikas Kuasae; ewen hindai kea hobah Akae.

¹³Awi te hong ije andau bewei TUHAN mahukum bangsa Israel tuntang rayate. Ie manetek tuntang manganan takolok tuntang ikohe.

¹⁴Takoloke iete kare oloh bakas je ihormat, ikohe iete kare nabi je manenga auh ajar je mampalayang.

¹⁵Kare pamimpin bangsa te jari mampalayang tuntang manderoh rayat.

¹⁶Bangsa te jari layau tuntang rusak tuntang kare auh ewen uras papa. Awi te bara marak kare oloh tabela jaton ije je iliwus TUHAN. Ie dia masi kare balo tuntang nule. Tapi TUHAN magon sangit tuntang tetep mahukum.

¹⁷Kapapan bangsa te mangehu kare taloh, sama kilau apui je kuman lepah kare rowut haduhi. Nyalae kilau parak kayu je inusul je asepe mangangkewol.

¹⁸TUHAN Je Jaton Tikas Kuasae sangit toto, tuntang hukuman je Awie sama kilau nyalan apui je mangambuar, tuntang bangsa te iete ramon kakehue je lepah lingis kinan apui. Jaton ije biti oloh je masi paharie.

¹⁹Hong hapus lewu te oloh marunap tuntang kuman en bewei je tau ie kumae, tapi dia tau besoh. Ewen mahin kuman kare sobat ewen haream!

²⁰Manase dengan Epraim hasarang, palus haya-hayak malawan Yuda. Tapi TUHAN magon sangit tuntang tetep mahukum.