Read Ngaju LEWITIKUS 10 Bible Online

LEWITIKUS 10 - Ngaju bible

LEWITIKUS 10

¹Sinde katika Nadab tuntang Abihu, kare anak Aron, manduan sarangan apui ayu-ayue tuntang manyuange hapan barah apui. Palus ewen mambuwor garo akan huang apui te tuntang malupute akan TUHAN. Tapi apui te dia barasih, awi TUHAN dia manyoho ewen malupute.

²Palus TUHAN mampadumah apui je mangehu ewen sampai matei intu Kemah TUHAN.

³Palus Moses hamauh dengan Aron, “Jete je ingahandak TUHAN katika ie hamauh, ‘Uras je bagawi akang-Ku musti mahormat karasih-Ku. Aku akan mamparahan kahaing-Ku akan hapus bangsa ayung-Ku.’ ”[3] Tapi Aron suni ih.

⁴Limbah te Moses mantehau Misael tuntang Elsapan, kare anak Usiel, mama Aron. Koae dengan ewen, “Hetoh, duan hantun paharim ije tato te bara Kemah TUHAN tuntang ingkes intu ruar watas kare kemah.”

⁵Ewen dumah palus mimbit kare hantu je magon hapan pakaian te akan luar watas kare kemah, kilau je irentah Moses.

⁶Palus Moses hamauh dengan Aron tuntang kare anake je beken, iete Eleasar tuntang Itamar, “Ela manalua balau keton dia inyarak, tuntang ela marabit pakaian keton akan mamparahan je keton pehe atei tuntang manatum. Amon keton mawie kalote, keton akan matei, tuntang hapus ungkup Israel ilait TUHAN. Tapi hapus ungkup Israel je beken tau manatum akan kadadue oloh je matei awi apui bara TUHAN.

⁷Ela malihi Kemah TUHAN mangat keton ela matei, awi keton jari inahbis hapan minyak upacara uka bagawi akan TUHAN.” Ewen malaluse kilau je insanan Moses.

⁸TUHAN hamauh dengan Aron,

⁹“Limbah mihop anggor atawa taloh bahari, ikau tuntang kare anakm dia tau tame Kemah-Ku. Amon keton malanggar atoran toh keton akan matei. Parentah-Ku musti inumon awi uras turonam.

¹⁰Ikau musti tau mambeda taloh je tantai akan TUHAN dengan je dia, taloh je papa dengan je dia papa.

¹¹Uras parentah je inenga-Ku akam mahalau Moses, musti ikau olih majare akan bangsa Israel.”

¹² Moses hamauh dengan Aron tuntang dengan kadue-due anake, Eleasar tuntang Itamar, “Duan gandom je tisae bara taloh kinan je iluput akan TUHAN. Bara tepong te tampa rote je dia iragi. Palus kinan jete intu balikat mesbeh, awi parapah te paham barasih.

¹³Rote te baya tau kinan intu eka je barasih, awi bara taloh kinan je iluput akan TUHAN, rote te jadi bagin aim tuntang kare anakm je hatue. Jete parentah TUHAN dengangku.

¹⁴ Tapi keton tuntang kare anak keton hatue bawi tau kuman usok parapah panenga tuntang sapak parapah je ingabeken. Jete bagin kare imam bara parapah hapa badamai akan bangsa Israel. Keton tau kumae intu kare eka je dia papa.

¹⁵Sapak parapah je ingabeken tuntang usok parapah panenga te imbit haya-hayak dengan enyak akan parapah je ingehu kilau parapah panenga akan TUHAN. Kare bagian meto te ayum tuntang kare anakm palus katatahie, kilau je irentah TUHAN.”

¹⁶Limbah te Moses misek tahiu kambing akan parapah ampun dosa. Akae insanan je kambing te jari imapui. Taloh te mawi Moses sangit dengan Eleasar tuntang Itamar. Ie hamauh dengan ewen,

¹⁷ “Mbuhen parapah ampun dosa te dia keton kumae intu eka je barasih? Parapah te paham barasih; TUHAN manengae akan keton mangat dosan ungkup Israel iampun.

¹⁸Dahan kambing te dia imbit akan Kemah TUHAN; jadi sapunae parapah te kinan keton intu hete kilau je irentahku.”

¹⁹Tombah Aron, “Puna andau toh ungkup Israel jari maluput parapah ampun dosa tuntang parapah je ingehu akan TUHAN. Aloh kalote, calaka toh jari buah aku. Amon andau toh aku kuman kea parapah ampun dosa te, en TUHAN akan sanang?”

²⁰Moses mangkeme panombahe te buah.