Read Ngaju LEWITIKUS 13 Bible Online

LEWITIKUS 13 - Ngaju bible

LEWITIKUS 13

¹TUHAN manenga akan Moses tuntang Aron kare atoran toh:

²Amon ije biti oloh pupuse mambatal, kilau buhit, atawa habintik baputi, intu upak bitie je tau jadi panyakit kulit je bakaike-ikeh, ie musti iimbit akan imam turonan Aron.

³Imam mariksa hila je pehe intu upak bitin oloh te. Amon bulu je aton intu hila hete jari baputi, tuntang hila je pehe ampie labih handalem bara hakalilinge, oloh te buah peres papa je mawi upak bitie, imam musti mansanan oloh te papa.

⁴Tapi amon hila je pehe ampin pupuse baputi tuntang dia labih handalem bara upak bitie hakalilinge, hayak bulu hila hete dia kea baputi, oloh te ingurong katahin uju andau.

⁵Intu andau je kaujue, imam musti mariksa ie tinai. Amon manumon tiroke panyakit te magon sama ih ampie tuntang dia tayap, oloh te ingurong katahin uju andau tinai.

⁶Hong andau je kaujue imam mariksae haluli, tuntang amon hila je pehe jari keleh tuntang dia tayap, imam balalu mansanan oloh te barasih. Jete dia panyakit je mawi upak biti je bakaike-ikeh. Oloh te musti mampukan pakaiae tuntang ie jadi barasih.

⁷Tapi amon limbah insanan barasih awi imam panyakit oloh te tayap, ie musti haluli manaharep imam.

⁸Imam mariksae tinai, tuntang amon perese te puna jari tayap, oloh te musti insanan papa: ie buah panyakit kulit je bakaike-ikeh.

⁹Ije biti oloh je buah panyakit kulit je bakaike-ikeh musti imbit manalih imam.

¹⁰Amon manumon je iriksa awi imam intu pupus oloh te aton kembang baputi je mambuhit tuntang bulu intu hila hete jari baputi,

¹¹oloh te buah panyakit kulit je bakaike-ikeh. Imam musti mansanan oloh te papa. Dia usah mangurong ie, awi jari batantu je ie papa.

¹²Amon imam mite taloh je baputi te jari tayap bara takolok sampai pai,

¹³tuntang manumon je jari iriksae panyakit te jari tayap akan hapus biti tuntang lepah pupuse jadi baputi, oloh te insanan barasih.

¹⁴Tapi amon lembut buhit, imam musti mariksae tinai.

¹⁵Amon jete toto buhit, oloh te musti insanan papa, awi ie buah panyakit kulit je bakaike-ikeh.

¹⁶Tapi amon buhit te keleh tuntang haluli baputi tinai, oloh te musti manaharep imam

¹⁷uka iriksa haluli. Amon buhit te puna jadi baputi, imam mansanan oloh te barasih.

¹⁸Amon ije biti oloh je aton baluyong je jari keleh,

¹⁹tapi intu awae lembut kembang baputi randa-randang, oloh te musti manaharep imam

²⁰uka iriksa. Amon taloh harintik ampie handalem bara upak hakalilinge, hayak bulu intu hila hete jari baputi kea, imam musti mansanan oloh te papa. Baluyong te tamparan panyakit kulit je bakaike-ikeh.

²¹Tapi amon imam jari mariksae je kare bulu intu hete dia malik baputi, tuntang hila hete dia handalem bara upak bitie kalilinge, baya labih kalas ampie, oloh te musti ingurong uju andau katahie.

²²Amon bintik baputi te tayap, imam musti mansanan oloh te papa awi ie buah panyakit kulit je bakaike-ikeh.

²³Tapi amon bintik baputi te dia malik tuntang dia tayap, jete baya awan baluyong, maka oloh te insanan barasih.

²⁴Amon ije biti oloh balopak, palus upak bitie intu lopak te malik baputi atawa baputi handa-handang,

²⁵imam musti mariksae. Amon bulu intu hila hete jadi baputi hayak lupake labih handalem bara upak bitie kalilinge, maka panyakit kulit je bakaike-ikeh jari jakit intu lupak te; imam musti mansanan oloh te papa.

²⁶Tapi amon bulu intu eka te dia malik baputi tuntang hila hete dia labih handalem bara upak bitie kalilinge, oloh te musti ingurong katahin uju andau.

²⁷Intu andau je kaujue imam mariksae tinai. Amon rintik baputi te tayap, oloh te buah panyakit kulit je bakaike-ikeh; ie musti insanan papa.

²⁸Tapi amon rintik baputi te dia malik tuntang dia tayap, baya labih baputi ampie, jete dia panyakit kulit je bakaike-ikeh. Imam musti mansanan oloh te barasih, awi ampin upak bitie je baputi te baya awan balupak.

²⁹Amon ije biti oloh hatue atawa bawi buah panyakit kulit intu takoloke atawa ijange,

³⁰ie musti iriksa awi imam. Amon hila je pehe te ampie labih handalem bara upak bitie kalilinge, tuntang balau atawa janggut intu hila hete malik henda-henda atawa baduroh, maka oloh te buah panyakit kulit je bakaike-ikeh tuntang musti insanan papa.

³¹Amon tumon je jari iriksa imam hila je pehe te dia labih handalem bara upak bitie kalilinge, tapi jaton balau atawa janggut je barigas intu hila hete, oloh te musti ingurong katahin uju andau.

³²Intu andau je kauju, imam mariksa haluli hila je pehe. Amon panyakit te dia tayap hayak jaton balau atawa janggut je henda-henda intu hila hete, tinai ampie dia handalem bara upak bitie kalilinge,

³³oloh te musti manggundul balau atawa janggut hakaliling eka je pehe. Palus ie musti ingurong tinai katahin uju andau.

³⁴Intu andau je kaujue imam mariksae haluli. Amon panyakit te dia tayap tuntang hila hete ampie dia handalem bara pupus kalilinge, oloh te musti insanan barasih tuntang musti mampukan pakaiae.

³⁵Tapi amon jari insanan barasih tapi panyakite tayap,

³⁶imam musti mariksae haluli. Amon panyakit te puna tayap, dia parlu tinai imam mariksa en balau atawa janggut oloh te jari bahenda. Awi jari batantu je ie papa.

³⁷Tapi amon manumon pangkeme imam penyakite dia tayap, tuntang lembut balau atawa janggut je barigas intu eka te, maka peres te jari keleh. Imam musti mansanan ie barasih.

³⁸Amon ije biti oloh hatue atawa bawi aton bintik baputi intu upak bitie,

³⁹imam musti mariksa oloh te. Amon rintik baputi te ampie baputi kawus, ie baya buah kihis, tuntang insanan barasih.

⁴⁰Amon ije biti oloh hatue jari longor silan hila likut atawa silan hila baun takoloke, kalongor te dia mawi ie papa.

⁴¹

⁴²Tapi amon lembut kembang baputi handa-handang intu eka je longor, ie buah panyakit kulit je bakaike-ikeh.

⁴³Imam patut mariksa oloh te, tuntang amon puna aton kembang baputi handa-handang,

⁴⁴imam musti mansanan ie papa tagal buah panyakit kulit je bakaike-ikeh intu takoloke.

⁴⁵Ije biti oloh je buah panyakit kulit je bakaike-ikeh, musti mahapan pakaian je risai-rewei hayak nalua balaue dia hasarak. Ie musti manutup baue hila penda hayak mangkariak, “Papa! Papa!”

⁴⁶Katahian buah panyakit te ie papa tuntang musti melai intu luar kemah, kejau bara kare oloh beken.

⁴⁷Amon tarasondau karebuk[4] intu pakaian atawa benang wol atawa lena,

⁴⁸atawa intu upak meto atawa intu ramo en bewei je bara upak meto,

⁴⁹tuntang ampin eka karebuk te hija-hijau atawa handa-handang, maka taloh je mawi karebuk te tatame macam je tau tayap tuntang musti imparahan akan imam.

⁵⁰Imam musti mariksa ramo te, palus mansahae katahin uju andau.

⁵¹Intu andau je kaujue ie mariksae haluli. Amon karebuk te puna tayap, ramo te papa.

⁵²Imam musti mangehu ramo te, awi karebuk te sama kilau je tayap, awi te musti impalingis jete hapan apui.

⁵³Tapi amon manumon je iriksa awi imam, karebuk te dia tayap intu ramo te,

⁵⁴ie marentah uka ramo te ienyau, palus insahan katahin uju andau tinai.

⁵⁵Palus imam mariksae haluli. Amon karebuk te dia tayap tapi ampin tampayahe tetep sama, ramo te magon papa tuntang musti ingehu, aloh karebuk te baya intu hila baun atawa likute.

⁵⁶Tapi amon manumon je iriksa awi imam, karebuk te jari kalas, maka intu eka karebuk bara upak atawa benang te musti irabit.

⁵⁷Amon rahian lembut tinai, tuntang karebuk te tayap, maka je tempoe musti mamapui ramo te.

⁵⁸Amon jari ienyau balalu ampie karebuk intu ramo te nihau, maka ramo te musti ienyau tinai, harue ramo te barasih.

⁵⁹Kalote atoran tahiu karebuk je aton intu pakaian atawa benang lena atawa wol, atawa en bewei je inampa bara upak meto.