Read Ngaju LEWITIKUS 14 Bible Online

LEWITIKUS 14 - Ngaju bible

LEWITIKUS 14

¹TUHAN manenga akan Moses kare atoran toh

² tahiu upacara mamparasih limbah keleh bara panyakit kulit je bakaike-ikeh. Intu andau oloh te indu insanan barasih, ie musti imbit akan imam,

³tuntang imam mimbite akan luar watas kare kemah. Amon manumon je jari iriksae oloh te jari keleh,

⁴ie manyoho oloh te mimbit due kongan burong belom je dia pali, dengan ije katetek kayu alau, ije lawai bahandang tuntang ije pating hisop.

⁵Burong je ije kongan inyambalih intu hunjun balanai petak je inyuang danum barasih bara tahasak danum.

⁶Burong je ije kongan tinai dengan kayu alau, lawai bahandang tuntang ije pating hisop insulop akan huang dahan burong je jari inyambalih.

⁷Imam mambirik dahan burong te uju kali akan oloh je jari keleh, tuntang mansanan ie barasih. Palus burong je magon belom ilapas intu janah.

⁸Limbah te oloh te musti mampukan pakaiae, manggundul takoloke, palus mandoi. Ie jari barasih tuntang tau tame akan watas kare kemah. Tapi katahin uju andau ie hindai tau tame akan huang kemah ayue kabuat.

⁹Intu andau je kaujue ie musti manggundul takoloke, janggute kea, bulun kininge tuntang uras bulu je aton intu bitie. Balalu ie musti mampukan pakaiae tuntang mandoi. Harue limbah te ie barasih.

¹⁰Intu andau je kahanya oloh te musti mimbit due kongan anak tabiri hatue tuntang ije kongan anak tabiri bawi je umure ije nyelo, uras jaton cacate. Tinai telo kilo tapung je jari iewoi dengan undus saitun, tuntang ije per telo liter undus saitun.

¹¹Palus imam musti mimbit ie tuntang parapahe te akan baun bauntonggang Kemah TUHAN.

¹²Imam manduan anak tabiri hatue je ije kongan tuntang ije per leto liter undus saitun akan parapah gantin karugi, tuntang malupute indu parapah panenga akan TUHAN.

¹³Anak tabiri te inyambalihe intu eka je tantai akan eka manyambalih meto indu parapah ampun dosa tuntang parapah je ingehu. Tabiri te inyambalih intu hete awi parapah gantin karugi tuntang parapah ampun dosa te paham barasih tuntang indu bagin imam.

¹⁴Imam manduan isut dahan tabiri palus mohose intu bumbong pinding gantau, intu tunjuk indu lenge gantau tuntang intu tunjuk indu pai gantaun oloh je handak insanan barasih.

¹⁵Limbah te imam manduan isut undus saitun tuntang mohose intu lokap lengee hila sambil ayue kabuat.

¹⁶Limbah te ie mansulop tunjok lengee gantau akan huang undus, tuntang mambirike uju kali akan huang Kemah TUHAN.

¹⁷Palus isut undus je aton intu lengee balalu iohose hong kare eka je jari iohos daha, iete intu bumbong pinding gantau intu tunjok indu gantau, tuntang tunjok indu pai gantaun oloh je handak insanan barasih.

¹⁸Undus je kalabie musti inusoh akan hunjun takolok oloh te. Kalote imam malalus upacara mamparasih oloh te intu taharep TUHAN.

¹⁹Limbah te imam musti maluput parapah ampun dosa mangat oloh je papa te jadi barasih. Limbah te ie musti manyambalih meto akan parapah je ingehu

²⁰tuntang malupute hayak dengan parapah taloh kinan intu hunjun mesbeh. Kalote imam mawi upacara mamparasih akan oloh te, tuntang ie jadi barasih.

²¹Amon oloh te belom susah tuntang paham kasusahe, maka akan parapah panenga gantin karugi ie tau mimbit ije kongan anak tabiri hatue bewei akan parapah iayun akan TUHAN. Tinai ije kilo tepong iewoi dengan undus saitun akan parapah taloh kinan, tuntang sapertelo liter undus saitun.

²²Ie musti kea mimbit due kongan burong dara tabela atawa burong kuku tabela: ije akan parapah ampun dosa tuntang ije tinai akan parapah je ingehu.

²³Uras parapah te iimbite akan imam intu hila baun bauntonggang Kemah TUHAN intu andau kahanya upacara mamparasih arepe.

²⁴Imam manduan anak tabiri tuntang undus saitun te tuntang malupute indu parapah panenga akan TUHAN, tuntang jete indu bagin imam.

²⁵Palus imam manyambalih anak tabiri te tuntang mohos dahae isut intu bumbong pinding gantaue, tunjok indu lenge gantau tuntang tunjok indu pai gantaun oloh je handak insanan barasih.

²⁶Imam manusoh isut undus akan lokap lengee je sambil

²⁷tuntang dengan tunjok lengee gantau mambirik undus te uju kali intu huang Kemah TUHAN.

²⁸Palus isut undus je aton intu lengee musti iohos intu kare eka je jari iohos daha, iete intu bumbong pinding gantau, tunjok indu lenge gantau tuntang tunjok indu pai gantaun oloh je handak insanan barasih.

²⁹Tisan minyak musti inata akan hunjun takolok oloh te akan upacara mamparasih arepe intu taharep TUHAN.

³⁰Limbah te imam maluput ije kongan burong dara tabela atawa burong kuku tabela

³¹akan parapah ampun dosa; ije kongan je beken akan parapah je ingehu hayak parapah taloh kinan. Kalote imam mawi upacara uka mamparasih oloh te intu taharep TUHAN.

³²Jete atoran tahiu upacara mamparasih oloh je limbah buah panyakit kulit je bakaike-ikeh akan oloh je belom susah.

³³TUHAN manenga akan Moses tuntang Aron

³⁴kare atoran tahiu huma je jakit buah lumut je tayap. Kare atoran toh ilalus limbah bangsa Israel tame Kanaan, lewu je inenga TUHAN akan ewen.

³⁵Ewe-eweh je sondau intu huang humae, ie musti mansanan taloh te akan imam.

³⁶Helo bara imam dumah mariksa lumut te, ie musti bajeleng manyoho mampalua uras kare ramoe bara huma te. Amon dia, narai bewei je aton intu huang huma te uras jadi papa. Imam musti dumah

³⁷uka mariksa karebuk te. Amon aton rintik hija-hijau atawa handa-handang je ampie timben tame intu dinding,

³⁸imam musti malilihi huma te tuntang manaluae ingunci katahin uju andau.

³⁹Hong andau je kauju ie dumah tuntang mariksae tinai. Amon lumut te tayap,

⁴⁰ie marentah mangat kare batun dinding je buah lumut te ingepak tuntang hapus dinding hila huang ingikis. Taloh je baduroh awi buah kikis tuntang kare batu je buah lumut musti ingepak tuntang inganan akan ije eka je papa hong luar lewu.

⁴¹

⁴²Palus kare batu je ingepak te ingganti hapan kare batu je taheta. Sahapus dinding huma te musti ingalukop mahapan plester je taheta

⁴³Amon lumut te lembut tinai, padahal kare batun huma te jari ingganti tuntang kare dindinge jari ingikis tuntang ingalukop hapan plester haluli,

⁴⁴maka imam musti dumah tuntang mariksa huma te tinai. Amon lumut te jari tayap maka huma te papa,

⁴⁵tuntang musti ingarak. Kare batu, kare kayu tuntang hapus plestere musti iimbit akan eka je papa intu luar lewu.

⁴⁶Helo bara te eweh bewei je tame akan huang huma te jari papa sampai matanandau belep,

⁴⁷Ewe-eweh je batiroh atawa kuman intu huang huma te musti mampukan pakaiae.

⁴⁸Tapi amon imam dumah tuntang manumon ie je jari mariksae jaton lembut lumut tinai limbah huma te ingalukop plester, ie musti mansanan huma te barasih awi lumut jari nihau urase.

⁴⁹Akan mamparasih huma imam manduan due kongan burong, kayu alau, lawai bahandang tuntang ije kapating dawen hisop.

⁵⁰Burong je ije kongan inyambalih intu hunjun balanai je inyuang hapan danum taheta bara tahasak danum.

⁵¹Palus kayu alau, lawai bahandang, hisop tuntang burong je magon belom insulop akan huang dahan burong je jari inyambalih, tuntang akan huang danum je taheta. Limbah te huma te imbirike uju kali.

⁵²Burong je magon belom ilapase intu janah huang luar lewu. Kalote imam malalus upacara mamparasih huma, tuntang huma te jari barasih.

⁵³

⁵⁴Jete atoran tahiu panyakit kulit je bakaike-ikeh,

⁵⁵tahiu upak biti je mambatal, buhit atawa upak biti harintik baputi atawa kembang intu biti, tuntang tahiu karebuk intu pakaian atawa huma.

⁵⁶

⁵⁷Kare atoran te gunae uka tau manukas en taloh te barasih atawa papa.