Read Ngaju LEWITIKUS 15 Bible Online

LEWITIKUS 15 - Ngaju bible

LEWITIKUS 15

¹TUHAN manenga akan Moses tuntang Aron kare atoran toh

²akan bangsa Israel. Amon ije biti oloh hatue buah panyakit balalu hanana taloh kahawee, nana te papa,

³aloh je balua atawa je tangkeng.

⁴Eka je iondok atawa ienter oloh te jadi papa.

⁵Ewe-eweh je manigong oloh je mampalua nana, atawa ekae batiroh, atawa mondok intu awan eka mondok, atawa ilujae, musti mampukan pakaiae tuntang mandoi, ie papa sampai matanandau belep.

⁹Eka mondok hong hunjun kuda, atawa en bewei je iondok oloh je hanana jadi papa.

¹⁰Ewe-eweh manigong taloh je awan iondok oloh te, jadi papa sampai matanandau belep. Genep bitin oloh je manggatang ramo te musti mampukan pakaiae tuntang mandoi, ie papa sampai matanandau belep.

¹¹Amon oloh je hanana dia menyau lengee jari manigong oloh beken, maka oloh je inigonge te musti mampukan pakaiae tuntang mandoi; ie papa sampai matanandau belep.

¹²Balanga petak je inigong oloh te musti imusit tuntang pakakas je imbinge musti ienyau.

¹³Amon oloh te keleh, ie patut mentai uju andau tinai. Limbah te ie musti mampukan pakaiae tuntang mandoi intu tahasak danum, maka ie barasih.

¹⁴Intu andau je kahanya ie mimbit due kongan burong dara tabela atawa burong kuku tabela akan baun bauntonggang Kemah TUHAN palus manjuloke akan imam.

¹⁵Imam balalu maluput burong je ije kongan indu parapah ampun dosa, tuntang je ije kongan tinai indu parapah je ingehu. Kalote imam mawi upacara mamparasih oloh te intu taharep TUHAN.

¹⁶Amon ije biti oloh hatue mampalua danum kiha, ie musti mandoi tapi tetep papa sampai matanandau belep.

¹⁷Ramo en bewei bara benang atawa upak je buah danum kiha musti ienyau. Ramo te papa sampai matanandau belep.

¹⁸Tinai oloh bawi, amon ije biti oloh hatue hinje dengae aton balua danum kihae, maka ewen due musti menyau berenge hapan danum tuntang ewen jadi papa sampai matanandau belep.

¹⁹Ije biti oloh bawi je metoh dumah bulae, papa katahin uju andau. Ewe-eweh je manigong ie jadi papa sampai matanandau belep.

²⁰Narai bewei je iondok atawa ienter awi oloh bawi katahin ie dumah bulae jadi papa.

²¹Ewe-eweh je manigong eka je awan iniroh atawa iondok oloh bawi metoh dumah-bulae, musti mampukan pakaiae tuntang mandoi; ie papa sampai matanandau belep.

²⁴Amon ije biti oloh hatue hinje dengan ije biti oloh bawi je metoh dumah bulae, hatue te kea jadi papa katahin uju andau; genep eka batiroh je ientere kea jadi papa.

²⁵Amon ije biti oloh bawi balua daha katahin pire-pire andau ruar katikae dumah bulae, atawa balua daha harajur limbah dumah bulae, ie papa katahin balua daha te kilau metoh dumah bulae.

²⁶Eka je ienter atawa iondoke katahin te jadi papa.

²⁷Ewe-eweh je manigong eka te jadi papa kea. Ie musti mampukan pakaiae tuntang mandoi; ie papa sampai matanandau belep.

²⁸Limbah balua daha te terai, oloh bawi te patut mentai uju andau tinai: Limbah te ie barasih.

²⁹Intu andau je kahanya ie musti mimbit due kongan burong dara tabela atawa burong kuku tabela akan imam intu hila baun bauntonggang Kemah TUHAN.

³⁰Burong je ije kongan iluput akan parapah ampun dosa, tuntang je ije kongan tinai akan parapah je ingehu. Dengan cara te imam malalus upacara mamparasih oloh bawi te intu taharep TUHAN.

³¹TUHAN manyoho Moses mampingat bangsa Israel uka manantuani hamparea ewen papa, atawa hamparea dia, mangat ewen dia mamapa Kemah TUHAN je aton intu marak kare kemah ewen. Amon ewen mamapa kemah te ewen akan matei.

³²Kalote kare atoran tahiu oloh hatue je hanana kahawe atawa balua danum kiha,

³³tahiu oloh bawi je metoh dumah bulae, tuntang tahiu oloh hatue je hinje dengan oloh bawi je metoh dumah bulae.