Read Ngaju LEWITIKUS 16 Bible Online

LEWITIKUS 16 - Ngaju bible

LEWITIKUS 16

¹Limbah Kadue-due anak Aron matei metoh maluput apui je dia tumon kanahuang TUHAN, TUHAN hakotak dengan Moses,

² koae, “Nyampai akan paharim Aron, baya intu katika je inukas ie tau tame Kamar Ije Barasih Haliai, je imisah awi dinding benang, awi hete Aku mamparahan arep-Ku intu baunandau intu hunjun Patin Janji. Amon Aron malanggar parentah te, ie akan matei.

³ Baya dengan cara maluput sapi hatue tabela akan parapah ampun dosa tuntang ije kongan tabiri hatue akan parapah je ingehu, Aron tau tame Kamar Ije Barasih Haliai.”

⁴Limbah te Aron musti manantuani kare atoran toh. Helo bara tame Kamar Ije Barasih Haliai ie musti mandoi tuntang mahapan pakaian imam, iete baju, salawar pandak, panding tuntang saruban je uras bara benang lena.

⁵Palus ungkup Israel manjulok akan Aron due kongan kambing hatue akan parapah ampun dosa tuntang ije kongan tabiri hatue akan parapah je ingehu.

⁶Aron musti maluput ije kongan sapi hatue indu parapah ampun dosae kabuat tuntang keluargae.

⁷Kadue-due kongan kambing hatue bara ungkup Israel imbite akan baun bauntonggang Kemah TUHAN.

⁸Intu hete ie manenong hapan due batu, je ije inanda “akan TUHAN”, tuntang je beken “akan Asasel”. [5]

⁹Kambing je iintih akan TUHAN musti iluput akan parapah ampun dosa.

¹⁰Kambing je iintih akan Asasel iandak belo-belom intu taharep TUHAN limbah te iharak akan padang pasir akan Asasel, mangat dosan bangsa Israel iempas.

¹¹Limbah Aron maluput tuntang manyambalih sapi hatue indu parapah ampun dosa akae kabuat tuntang akan keluargae,

¹²ie patut manduan eka apui bara mesbeh tuntang manyuange kontep hapan barah apui tuntang due karakop garo je jari halus palus mimbite akan Kamar Ije Barasih Haliai.

¹³Garo te imapuie intu hila baun Patin Janji, sampai asepe manyangkulep tutup pati te. Aron dia olih mitee, awi amon ie mitee, ie akan matei.

¹⁴Palus Aron manduan isut dahan sapi, tuntang hapan tunjoke imbirike daha te akan hila baun tutup Patin Janji tuntang uju kali akan baun Pati.

¹⁵ Limbah te Aron manyambalih kambing indu parapah ampun dosan ungkup Israel. Dahan kambing te iimbite akan Kamar Ije Barasih Haliai. Palus imbirike daha te akan silan hila baun tutup Patin Janji; jete kilau je jari ilaluse dengan dahan sapi hatue.

¹⁶Hapan cara te ie mamparasih Kamar Ije Barasih Haliai bara kapapan bangsa Israel tuntang bara kare dosan ewen. Kemah TUHAN musti imparasih awi Kemah te aton intu marak kare kemah bangsa Israel tuntang buah kapapan ewen.

¹⁷Nampara bara metoh Aron tame Kamar Ije Barasih Haliai akan malalus upacara mamprasih sampai ie balua, ije biti mahin dia tau aton intu huang Kemah te. Limbah jari malalus upacara akae kabuat, akan keluargae tuntang akan hapus bangsa Israel,

¹⁸Aron balalu balua tuntang haguet akan mesbeh parapah je ingehu indu mamprasih mesbeh te. Ie manduan isut dahan sapi tuntang dahan kambing, tuntang mohose intu kare tandok hong puting mesbeh.

¹⁹Hapan tunjoke ie mambirik isut daha te uju kali akan hunjun mesbeh. Dengan cara te ie mamparasih mesbeh bara kapapan bangsa Israel, mangat jadi barasih.

²⁰Limbah mawi upacara mamparasih Kamar Ije Barasih Haliai tuntang kare eka beken hong Kemah TUHAN dengan mesbehe, Aron musti maluput akan TUHAN kambing je belom je intih akan Asasel.[6]

²¹Ie mandak due-due lengee intu hunjun takolok kambing te hayak mangaku kare kasalan, dosa tuntang kalangkah bangsa Israel. Kalote uras kasalan bangsa Israel indah akan hunjun takolok kambing te. Palus ije biti oloh je jari tantai inyoho, musti maharak kambing te akan padang pasir.

²²Kambing te mimbit lepah uras dosan bangsa Israel akan tanah je dia ielai olon tuntang ie patut ilapas intu padang pasir.

²³ Limbah te Aron balalu tame akan huang kemah, mengkak pakaian imam je ihapae metoh tame akan Kamar Ije Barasih Haliai, tuntang mempelai pakaiae intu hete.

²⁴Palus ie musti mandoi intu eka je tantai inyadia tuntang mahapan pakaiae kabuat. Limbah te ie musti balua tuntang maluput parapah je ingehu indu ampun dosae kabuat tuntang dosan bangsa Israel.

²⁵Enyak meto akan parapah ampun dosa musti imapui intu mesbeh.

²⁶Oloh je malapas kambing akan Asasel intu padang pasir musti mampukan pakaiae tuntang mandoi helo bara ie buli akan kare kemah.

²⁷ Sapi hatue tuntang kambing akan parapah ampun dosa, je dahae imbit tame akan Kamar Ije Barasih Haliai akan ampun dosa, musti iimbit balua bara watas kemah tuntang imapui. Upak, isin meto tuntang kanain kadue-due meto te musti imapui urase.

²⁸Oloh je mimbite musti mampukan pakaiae tuntang mandoi helo bara buli akan kare kemah te.

²⁹ Kare atoran toh musti inumon palus katatahie. Intu tanggal sapuluh bulan uju, oloh Israel tuntang kare oloh bangsa beken je manetep marak ewen musti puasa tuntang ingahana bagawi, awi andau toh andau je paham barasih. Hong andau te musti ilalus upacara uka mamparasih bangsa Israel bara kakare dosan ewen mangat ewen barasih.

³²Imam Hai, je jari tuntang ingabeken tantai akan Hatalla indu mangganti bapae, musti malalus upacara mamparasih te. Ie musti mahapan pakaian je inantu.

³³Palus mawi upacara mamparasih Kamar Ije Barasih Haliai, kare eka beken bara Kemah TUHAN, mesbeh, kare imam tuntang hapus bangsa Israel.

³⁴Upacara te musti ilalus sinde ije nyelo akan mamparasih bangsa Israel bara kare dosan ewen. Jete kare atoran je musti inumon palus katatahie. Moses malalus tumon je irentah TUHAN akae.