Read Ngaju LEWITIKUS 17 Bible Online

LEWITIKUS 17 - Ngaju bible

LEWITIKUS 17

¹TUHAN manyoho Moses

²manenga kare atoran toh akan Aron, kare anake tuntang hapus bangsa Israel.

³Amon ije biti oloh Israel maluput sapi, tabiri atawa kambing akan TUHAN, meto te musti inyambalihe intu hila baun bauntonggang Kemah TUHAN. Amon ie manyambalihe intu eka beken, ie malanggar atoran awi manusoh daha. Ie dia tinai iitong oloh ungkup ain Hatalla.

⁵Parentah te ingahandak mangat bangsa Israel mimbit akan Kemah TUHAN uras meto parapah je bahut inyambalih ewen intu tana. Ewen musti mimbit parapah te akan imam intu baun bauntonggang Kemah TUHAN tuntang manyambalihe intu hete akan parapah hapa badamai.

⁶Imam musti manata dahan meto te intu kare dinding mesbeh baun bauntonggang Kemah TUHAN palus mamapui enyake mangat ewaue manyanang atei TUHAN.

⁷Bangsa Israel musti tetep manumon auh TUHAN tuntang samasinde dia tau manyambalih meto intu kare tana indu parapah akan kare ijin papa. Atoran toh musti inumon palus katatahie.

⁸Amon ije biti oloh Israel atawa ije biti oloh bangsa beken je melai manetep marak oloh Israel maluput parapah je ingehu atawa parapah beken,

⁹akan TUHAN, ie musti malupute intu baun bauntonggang Kemah TUHAN. Amon ie malupute intu eka beken, ie dia tinai iitong ungkup Hatalla.

¹⁰ Amon ije biti oloh Israel atawa ije biti oloh bangsa beken je manetep marak oloh Israel kuman daha, ie akan ihukum TUHAN tuntang dia iitong oloh ungkup Ayue.

¹¹ Tahaseng genep taloh belom aton intu dahae. Tagal te TUHAN marentah mangat uras daha inata akan hunjun mesbeh mangat kare dosan ungkup inganan. Daha te tahaseng, manganan dosa.

¹²Tagal te bangsa Israel atawa oloh bangsa beken je manetep marak ewen ingahana kuman daha.

¹³Amon ije biti oloh Israel atawa ije biti oloh bangsa beken je melai manetep marak bangsa Israel manekap burong atawa meto beken je dia papa, ie patut mampalua dahan meto te tuntang mangawoke hapan petak.

¹⁴Tahaseng genep taloh belom aton intu dahae, awi te TUHAN mangahana bangsa Israel kuman daha. Gagenep oloh je malalus gawi je ingahana te dia tinai iitong oloh ungkup ain Hatalla.

¹⁵Gagenep bitin oloh Israel atawa oloh bangsa beken je kuman isin meto je matei kabuat atawa matei imisak meto basiak, musti mampukan pakaiae atawa mandoi tuntang mentai sampai matanandau belep, harue ie barasih.

¹⁶Amon ie dia malalus taloh te ie musti mananggong kasalae.