Read Ngaju LEWITIKUS 19 Bible Online

LEWITIKUS 19 - Ngaju bible

LEWITIKUS 19

¹TUHAN manyoho Moses

² manyampai akan bangsa Israel parentah toh, “Keleh keton barasih, awi aku TUHAN, Hatallam puna barasih.

³ Genep bitin oloh musti mahormat indu bapae tuntang mahaga andau Sabat kilau je irentah-Ku. Aku TUHAN, Hatallam.

⁴ Ela manyembah dewa. Ela manoang hampatong tuntang manyembah jete. Aku TUHAN, Hatallam.

⁵Amon keton maluput meto indu parapah hapa badamai, numon kare atoran je inenga-Ku, mangat parapah te inarima awi-Ku.

⁶Isin metoe kinan hong andau meto te inyambalih atawa andau jewue. Isin metoe je magon batisa intu andau je kateloe musti imapui lepah, awi isin meto te papa.

⁷Amon isin meto te kinan kea, parapah te dia inarima awi-Ku.

⁸Ewe-eweh je kuman isin meto te buah kasalan awi dia manenga taloh je tantai ingabeken akang-Ku. Oloh te dia tinai iitong oloh ungkup-Ku.

⁹ Amon keton manggetem, ela manetek gandom je belom intu kare saran tanam. Ela manangkaluli mamumpong gandom je batisa limbah getem.

¹⁰Ela haluli akan kabon anggorm indu manampunan kare bua anggor je batisa limbah keton mamutik bua je solake. Kalote kea kare buae je jari manjato ela keton manduae. Nalua jete akan oloh je belom susah atawa oloh bangsa beken. Aku TUHAN, Hatallam.

¹¹ Ela manakau, manipu atawa mananjaro.

¹² Ela hajanji mahapan arang-Ku amon keton dia handak manggenep janji te, awi hapan te keton manawah arang-Ku. Aku TUHAN, Hatallam.

¹³ Ela mamaksa oloh atawa marampas ramoe. Upah oloh je bagawi akam ela manahae, aloh baya ije alem.

¹⁴ Ela manyapa oloh badengen tuntang ela mandak taloh patarang intu baun oloh babute. Keleh keton hormat tuntang mikeh dengang-Ku, awi Aku TUHAN, Hatallam.

¹⁵ Keton musti bujur amon mamutus; ela milang oloh je belom susah tuntang ela mikeh dengan oloh tatau.

¹⁶Ela manampa dawa je dia toto marak kare oloh bangsa keton, mangat keton dia manjadi sabab pampatei oloh. Aku TUHAN.

¹⁷ Ela mingkes kasingi dengan eweh bewei. Keleh badamai dengan eweh bewei, mangat keton dia badosa awi oloh beken. [7]

¹⁸ Ela mambaleh kasingin oloh dengam tuntang ela manyingi oloh beken; tapi keleh sinta oloh kilau arepm kabuat. Aku TUHAN.

¹⁹ Numon kare parentah-Ku. Ela mangawin meto je hakabeken macame. Ela mimbul due macam binyi intu tanam. Ela mahapan pakaian je inampa bara due macam lawai.

²⁰Amon ije biti oloh hatue hajanji handak manjual jipee je bawi akan oloh hatue beken akan gundike, tuntang oloh je handak mamili jipen te hindai mambayare, palus tempoe je solake marantep jipen te, ewen due musti ihukum; [8] tapi dia tau ihukum matei, awi aloh kilen ampie kea oloh bawi te magon jipee.

²¹Oloh hatue musti mimbit ije kongan tabiri hatue akan bauntonggang Kemah-Ku indu parapah gantin karugi.

²²Imam maluput tabiri te intu upacara mamparasih, mangat dosan oloh te iampun. Aku, Hatallam akan mampun ie.

²³Amon keton jari tame akan tanah Kanaan tuntang mimbul kare macam batang bua intu hete, maka katahin telo nyelo je solake kare bua iitong awi keton papa tuntang dia tau keton kumae.

²⁴Intu nyelo kaepat uras buae patut inenga indu mamparahan tarima kasih akang-Ku, TUHAN.

²⁵Intu nyelo je kalime harue keton tau kuman buae. Amon keton malalus uras atoran te, batang bua ain keton akan mamua labih are tinai. Aku TUHAN Hatallam.

²⁶ Ela kuman daha. Ela mahapan kare karohei.

²⁷ Ela manggundul hila balikat takolokm atawa manggunting janggutm.

²⁸Ela mawi totang intu upak bitim atawa mampahimang bitim kilau tanda kapehen atei dengan oloh matei. Aku TUHAN.

²⁹ Ela mamapa kare anakm je bawi awim mawi ewen jadi lontei intu human dewa.[9] Jete mamapa lewum, palus kare gawi je dia sanunoh akan sabak intu hete.

³⁰ Haga andau Sabat tuntang hormat eka je ingabeken akan manyembah Aku. Aku TUHAN.

³¹ Ela haguet balaku tirok bara kare tabit je misek kare liau oloh matei. Amon keton mawi jete keton jadi papa. Aku TUHAN, Hatallam.

³²Rega tuntang hormat kare oloh bakas. Keleh keton hormat tuntang mikeh dengang-Ku, awi Aku TUHAN.

³³ Ela mawi taloh je dia bahalap akan oloh bangsa beken je melai intu lewum.

³⁴Keleh mawi akae kilau keton mawi oloh sama bangsam tuntang sinta ie kilau ikau sinta arepm kabuat. Ingat je keton puji belom kilau oloh bangsa beken intu Misir. Aku TUHAN, Hatallam.

³⁵ Ela manipu oloh beken hapan ukur, timbangan atawa takar je dia bujur.

³⁶Keleh mahapan ukur, timbangan tuntang takar je bujur. Aku TUHAN, Hatallam; Aku jari mimbit keton balua bara Misir.

³⁷Numon kare parentah tuntang atorang-Ku. Aku TUHAN.”