Read Ngaju LEWITIKUS 20 Bible Online

LEWITIKUS 20 - Ngaju bible

LEWITIKUS 20

¹TUHAN manyoho Moses

²mansanan taloh toh akan bangsa Israel, “Genep bitin oloh marak keton atawa oloh bangsa beken je manetep bentok keton je mampatei anake akan Molokh, musti imanting hapan batu sampai matei awi oloh are.

³Oloh je maluput anake akan Molokh, mamapa kemah-Ku tuntang manawah arang-Ku je barasih. Ie akan ihukum tuntang dia tinai iitong-Ku kilau oloh ungkup-Ku.

⁴Amon oloh are dia paduli gawin oloh te tuntang dia malalus hukum matei akae,

⁵Aku kabuat je mahukum ie, hapus keluargae, uras oloh je omba ie malihi Aku manyembah Molokh. Ewen dia tinai iitong-Ku oloh ungkup-Ku.

⁶Oloh je haguet balaku tirok bara tabit je mantehau kare roh oloh matei akan ihukum-Ku.

⁷Jaga mangat keton tetep barasih, awi aku TUHAN, Hatallam.

⁸Numon kare parentah-Ku, karana aku TUHAN je tantai mangabeken keton akang-Ku.”

⁹ TUHAN manenga kare atoran toh, “Oloh je manyapa bapae atawa indue musti ihukum matei awi kasalae kabuat.

¹⁰ Amon ije biti oloh Israel habandong dengan sawan oloh sama bangsae, ie tuntang oloh bawi te musti ihukum matei.

¹¹ Ije biti oloh hatue je marantep ije biti oloh bara sawan bapae, manduan hak bapae, hatue tuntang bawi te musti ihukum matei.

¹² Amon ije biti oloh hatue marantep manantue bawi, due-due oloh te musti ihukum matei. Ewen jari habandong, tuntang matei awi kasalan ewen kabuat.

¹³ Amon ije biti oloh hatue marantep oloh hatue beken, ewen malalus gawi papa tuntang randah. Kadaduee patut ihukum matei. Ewen matei awi kasalan ewen kabuat.

¹⁴ Amon ije biti oloh hatue kawin dengan ije biti oloh bawi hayak dengan indu oloh bawi te, katelo-teloe patut imapui sampai matei, awi ewen malalus gawi je dia sanunoh. Gawi macam te dia tau aton marak keton.

¹⁵ Amon ije biti oloh hatue marantep meto, ie dengan meto te musti impatei.

¹⁶Amon ije biti oloh bawi marantep meto, ie tuntang meto te musti impatei. Ewen matei awi kasalan ewen kabuat.

¹⁷ Amon ije biti oloh hatue marantep paharie bawi atawa paharie ije bapa beken indu atawa ije indu beken bapa, ewen dia tinai iitong oloh ungkup-Ku. Ewen jari mawi gawi je dia sanunoh tuntang musti mananggong kasalae.

¹⁸ Amon ije biti oloh hatue marantep ije biti oloh bawi je metoh dumah bulae, ewen dia tinai iitong oloh ungkup-Ku.

¹⁹ Amon ije biti oloh hatue marantep minae, kadaduee musti mananggong kasalae awi kalangkah te.

²⁰Amon ije biti oloh hatue marantep sawan mamae, ie manawah mamae. Hatue tuntang bawi te musti mananggong hukumae. Sampai matei ewen dia dinon anak.

²¹ Amon ije biti oloh hatue marampas sawan paharie, ie manawah paharie tuntang malalus taloh je dia sanunoh. Sampai matei ewen dia mandino anak.”

²²TUHAN hamauh, “Numon uras atoran tuntang parentah-Ku, magat keton dia iharak bara lewu Kanaan, je akan hete aku mimbit keton.

²³Ela manyonto hadat bangsa je melai hete. Ewen mawi Aku bajilek dengan kare gawi papa. Tagal te ewen iharak-Ku, mangat keton tau tame lewu te.

²⁴Lewu je tatau tuntang basiwoh te jari injaji-Ku akan jadi ain keton. Aku TUHAN, Hatallam je mamisah keton bara kare bangsa beken.

²⁵Awi te keton patut tau toto mambaris kueh meto je papa bara je dia papa. Ela kuman meto je papa. Meto te insanang-Ku papa, amon keton kumae, keton papa.

²⁶Keton imisah-Ku bara kare bangsa beken mangat jadi ayung-Ku. Keton musti barasih awi Aku TUHAN, tuntang Aku barasih.

²⁷Genep oloh hatue atawa bawi je misek kare liau oloh matei musti imanting hapan batu sampai matei. Oloh te patut matei awi kasalae kabuat.”