Read Ngaju LEWITIKUS 21 Bible Online

LEWITIKUS 21 - Ngaju bible

LEWITIKUS 21

¹TUHAN manyoho Moses manyampai parentah toh akan kare imam turonan Aron, “Ije biti imam dia tau mamapa arepe awi omba upacara mangubur jalahae,

²kacuali amon je matei te indue, bapae, anake, paharie hatue,

³atawa paharie bawi je hindai kawin, tuntang melai ije kahuma dengae.

⁴Ie dia tau mamapa arepe awi omba upacara mangubur jalahan sawae.

⁵ Ije biti imam dia tau manggundul belahe balaue tuntang dia tau manggunting janggute atawa mampahimang bitie hapan taloh banyihi akan mamparahan je ie metohe pehe atei.

⁶Ie ayong-Ku je jari tantai ingabeken tuntang dia tau mamapa arang-Ku. Ie maluput parapah taloh kinan akang-Ku, maka ie patut barasih.

⁷Ije biti imam dia tau kawin dengan ije biti oloh bawi awan lontei atawa ije biti oloh bawi je dia bujang atawa je jari hatolang, awi imam te ayung-Ku.

⁸Bangsa Israel patut mangaku imam kilau oloh je tantai ingabeken akangku awi ie maluput parapah taloh kinan akang-Ku. Aku TUHAN; Aku toh barasih tuntang Aku mamparasih ungkup-Ku.

⁹Amon anak bawi ayun ije biti imam jadi lontei, ie manawah bapae, ie musti imapui sampai matei.

¹⁰Imam Hai jari intahbis dengan cara manusoh minyak hapan upacara akan hunjun takoloke tuntang mahapan pakaian Imam Hai. Awi te ie dia tau manalua balaue dia inyarak atawa marabit pakaiae kilau tanda kapehen atei.

¹¹Ie jari inenga akang-Ku jadi oloh ayung-Ku, awi te ie dia tau mamapa arepe. Ie dia tau kea mamapa Kemah-Ku awie balua bara hete palus tame huma je aton hantue, aloh jete hantun bapae atawa indue kabuat.

¹³Ie baya tau kawin dengan ije biti oloh bawi bujang bara suku ayue kabuat. Ie dia tau kawin dengan ije biti balo atawa ije biti oloh bawi je inganan banae, atawa ije biti oloh bawi awan lontei.

¹⁵Amon ie malanggar atoran te, maka kare anake je sapunae barasih, kareh papa. Aku TUHAN, tuntang aku jari mangabeken ie jadi Imam Hai.”

¹⁶TUHAN marentah Moses,

¹⁷uka mansanan taloh toh akan Aron, “Ije biti turonan je bitie dia tinduh barasih, dia tau maluput parapah taloh kinan akang-Ku. Jete taloh je bujur sampai katatahie.

¹⁸Oloh je maluput parapah bitie musti jaton cacate, iete oloh babute atawa kait kejang, oloh je aton karusak baue atawa ramon bitie,

¹⁹je matei lengee atawa batimpang paie.

²⁰Je hajongkong atawa karinge, oloh je buah panyakit mata atawa kare macam panyakit je mawi upak biti tuntang oloh je imbuto.

²¹Genep turonan Aron je bitie cacat dia tau maluput parapah taloh kinan akang-Ku.

²²Tapi ie tau kuman taloh kinan je iluput indu parapah taloh kinan je barasih atawa je paham barasih.

²³Awi oloh te cacat bitie ie dia tau manokep dinding benang helat je mamisah Kamar Ije Barasih atawa mesbeh. Ie dia tau mamapa kare pakakas je jari tantai ingabeken akang-Ku, awi Aku TUHAN; Aku je mangabeken kare pakakas te.”

²⁴Jete kare atoran je inyampai Moses akan Aron tuntang kare anake, tuntang akan hapus bangsa Israel.