Read Ngaju LEWITIKUS 22 Bible Online

LEWITIKUS 22 - Ngaju bible

LEWITIKUS 22

¹TUHAN manyoho Moses

²manyampai kare parentah toh akan Aron tuntang kare anake, “Lalus bua-buah taloh je iluput bangsa Israel indu parapah akang-Ku, mangat keton dia mamapa arang-Ku ije barasih. Aku toh TUHAN.

³Amon ije biti bara turonam aton kapapae salenga ie manokep kare parapah barasih je tantai ingabeken bangsa Israel akang-Ku, ie dia tau tinai bagawi intu mesbeh. Atoran toh inumon sampai katatahie. Aku toh TUHAN.

⁴Ije biti turonan Aron je buah panyakit kulit je bakaike-ikeh, atawa panyakit mawi kahawee sampai hanana, ingahana kuman parapah barasih amon ie hindai insanan barasih. Ije biti imam jadi papa amon ie manigong taloh je papa awi buah hantu. Ie kea papa amon kihae balua,

⁵atawa manigong meto atawa oloh je papa.

⁶Ije biti imam dengan cara en bewei jadi papa, tetep papa sampai matanandau belep. Limbah matanandau belep ie hindai tau kuman taloh kinan je iluput akan TUHAN amon ie hindai mandoi.

⁷Limbah matanandau belep ie barasih tuntang tau kumae, awi jete panginae.

⁸Ie ingahana kuman isin meto je matei kabuate atawa matei imisak meto basiak. Amon ie kumae, ie papa. Aku toh TUHAN.

⁹Uras imam patut manumon kare atoran je inenga-Ku. Amon dia, ewen sala, tuntang akan matei, awi malanggar kare atoran je barasih te. Aku TUHAN, Aku je tantai mangabeken ewen akang-Ku.

¹⁰Parapah je tantai ingabeken akang-Ku baya tau kinan awi oloh je baris turonan imam. Oloh beken dia tau, aloh oloh te ije kahuma dengan imam te atawa oloh upahe.

¹¹Tapi kare jipen je imili awi imam te hapan duite kabuat atawa je inakan intu huang humae, tau kuman taloh kinan bagin imam te.

¹²Anak bawi ain ije biti imam je kawin dengan ije biti oloh je dia imam, dia tau kuman parapah te.

¹³Tapi anak bawi ain imam je jari balo atawa je jari hapisah dengan banae tapi jaton anake palus haluli akan human bapae tuntang jadi tanggongae, tau kuman taloh kinan bagin bapae. Baya baris turonan imam bewei tau kuman parapah te.

¹⁴Amon oloh je dia oloh baris turonan imam dia tantai ihat kuman taloh kinan je iluput akan TUHAN, ie musti manenga gantie akan imam inambah dengan due puluh persen.

¹⁵Kare imam dia tau mamapa parapah je puna baya akang-Ku

¹⁶awi ie manalua parapah te kinan awi oloh je jaton hake kumae. Taloh te mawi kasalan akan oloh te tuntang mawi hukuman akae. Aku toh TUHAN, Aku je mamparasih parapah te.”

¹⁷TUHAN manyoho Moses

¹⁸manenga akan Aron, kare anake tuntang hapus bangsa Israel kare atoran toh. Amon ije biti oloh Israel atawa oloh bangsa beken je melai manetep intu Israel maluput parapah je ingehu hapa mambayar janjie atawa parapah kahias, meto te musti je hatue tuntang je jaton cacate.

²⁰ Ela maluput meto je aton cacate, awi TUHAN dia maku manarimae.

²¹Amon ije biti oloh maluput akan TUHAN parapah hapa badamai akan mambayar janjie atawa parapah kahias, meto te dia tau je aton cacate, mangat tau inarima.

²²Ela maluput parapah akan TUHAN meto je babute, je bapelek tulange atawa bahimang, je aton baluyong hanana, je buah panyakit kulit atawa kerai. Meto je kalote ela iluput indu parapah taloh kinan hunjun mesbeh.

²³Akan parapah kahias keton tau maluput meto je dia bahalap ampie; tapi akan mambayar janji meto je kalote dia tau inarima.

²⁴Ela maluput akan TUHAN meto je bawak latake rusak awi hapit, inetek, kembang atawa inganan. Taloh je macam te ela manjadi intu lewun keton.

²⁵Meto je dinon bara oloh bangsa beken dia tau iluput indu parapah taloh kinan. Meto te ianggap aton cacate tuntang dia tau inarima.

²⁶Anak sapi, anak tabiri atawa anak kambing je harue inakan musti melai dengan indue katahin uju andau. Harun limbah te meto te tau inarima akan parapah taloh kinan.

²⁸Ela maluput indu sapi atawa tabiri atawa kambing hayak dengan anake sama andaue.

²⁹Amon keton maluput parapah tarima kasih akan TUHAN, lalus te manumon atoran, mangat parapahm inarima.

³⁰Kinan parapah te andau te kea, ela malihi aloh isut akan andau jewue.

³¹TUHAN hamauh, “Numon kare parentah-Ku. Aku toh TUHAN.

³²Ela mamapa arang-Ku je barasih. Hapus bangsa Israel musti manyembah Aku kilau je Barasih Haliai. Aku toh TUHAN, Aku je mawi keton barasih.

³³Aku mimbit keton balua bara Misir, mangat Aku jadi Hatallam. Aku toh TUHAN.”