Read Ngaju LEWITIKUS 23 Bible Online

LEWITIKUS 23 - Ngaju bible

LEWITIKUS 23

¹TUHAN manenga akan Moses

²kare atoran tahiu andau hai, je patut insanan kilau andau hai akan sombayang.

³ Aton jahawen andau akan bagawi, tapi andau je kauju andau Sabat, iete andau malayan je tantai ingabeken akan TUHAN. Intu andau te keton musti malalus pumpong sombayang tuntang dia tau bagawi.

⁴Jetoh kare andau hai je inukas TUHAN tuntang je musti insanan intu andau je inantu.

⁵ Andau Hai Paska je imesta akan mahormat TUHAN, nampara metoh matanandau belep intu tanggal epat walas bulan ije.

⁶ Andau jewue, tanggal limewalas, pesta Rote je dia Iragi nampara. Katahin uju andau keton dia tau kuman rote je inampa hapan ragi.

⁷Katahin uju andau te keton musti maluput parapah taloh kinan akan TUHAN. Hong andau je solake tuntang kauju pesta te keton musti malalus pumpong sombayang tuntang dia tau malalus gawi babehat.

⁹Amon keton jari sampai intu lewu je inenga TUHAN akan keton, tuntang manampunan hasil tana, peteng gandom je solake inggetem keton, musti imbit akan imam.

¹¹Hong andau limbah andau Sabat, imam patut maluput gandom akan parapah panenga akan TUHAN, mangat TUHAN rajin dengan keton.

¹²Hong andau keton maluput gandom te keton musti maluput kea akan parapah je ingehu ije kongan tabiri hatue je umure ije nyelo tuntang jaton cacate.

¹³Akan parapah taloh kinan luput due kilo tepong iewoi dengan saitun. Ewau parapah te manyanang atei TUHAN. Hayak te luput kea ije liter danum anggor

¹⁴Helo bara mimbit parapah te akan TUHAN, keton dia tau samasinde kuman bara gandom taheta te, aloh manta, inyehei atawa rote papui. Atoran toh musti inumon awi kare turonam sampai katatahie.

¹⁵ Nampara bara andau limbah Sabat, metoh keton maluput akan TUHAN peteng gandom je solake, keton musti mareken uju minggo genep.

¹⁶Hong andau je kalime puluh, iete limbah Sabat je kauju, keton patut mimbit parapah tarimakasih akan TUHAN.

¹⁷Genep kabali musti maluput due kabawak rote akan parapah panenga akan TUHAN. Genep rote patut inampa bara due kilo tepong halus hapan ragi tuntang inenga akan TUHAN kilau parapah hasil tana je solake.

¹⁸Hayak rote te bangsa Israel musti maluput uju kongan tabiri je ije nyelo umure, ije kongan sapi hatue tabela tuntang ije kongan kambing. Gagenep meto te dia tau je aton cacate, tuntang iluput akan parapah je ingehu akan TUHAN, dengan parapah tarimakasih tuntang parapah danum anggor. Ewau parapah te manyanang atei TUHAN.

¹⁹Luput kea ije kongan kambing hatue akan parapah ampun dosa tuntang due kongan tabiri hatue je umure ije nyelo akan parapah hapa badamai.

²⁰Rote tuntang kadadue anak tabiri te patut awi imam kilau parapah panenga akan TUHAN, tuntang jete bagin imam. Kare parapah te barasih.

²¹Hong andau te keton musti malalus pumpong sombayang tuntang dia tau bagawi babehat. Atoran toh musti inumon awi turonam sampai katatahie, hong kueh bewei ewen melai.

²² Amon keton manggetem, ela manetek gandom je lembut lakau saran tanam; tuntang ela haluli manampunan gandom je batisa limbah getem. Nalua jete akan oloh je belom susah tuntang oloh bangsa beken. TUHAN jete Hatallam.

²³Tanggal ije bulan uju musti imesta kilau andau je inukas uka malayan. Andau te inanda dengan auh tarompet; keton musti mawi pumpong sombayang.

²⁵Luput parapah taloh kinan akan TUHAN tuntang ela bagawi babehat hong andau te.

²⁶ Tanggal sapuluh bulan uju iete andau upacara genep nyelo akan ampun dosan bangsa Israel. Hong andau te keton musti puasa tuntang mawi pumpong sombayang hayak maluput parapah taloh kinan akan TUHAN.

²⁸Ela bagawi, karana andau te andau ampun dosa, mangat keton mandino ampun intu taharep TUHAN, Hatallan keton.

²⁹Ewe-eweh je kuman taloh en-en hong andau te, maka oloh te dia iitong tinai kilau oloh ungkup Hatalla.

³⁰Tuntang ewe-eweh bagawi hong andau te, ihukum awi TUHAN kabuat dengan hukum matei.

³¹Atoran toh buah akan hapus turonam hong kueh bewei ewen melai.

³²Nampara bara matanandau belep hong tanggal jalatien bulan te sampai katika matanandau belep hong tanggal sapuluh, patut ihaga keton kilau andau Sabat, andau je inukas uka malayan. Katahin andau te keton musti puasa.

³³ Pesta Tingkap Dawen nampara tanggal lime walas bulan uju tuntang katahie uju andau.

³⁵Katahin uju andau te, genep andau keton musti maluput parapah taloh kinan. Hong andau je solake tuntang andau kahanya keton musti mawi pumpong sombayang tuntang maluput parapah taloh kinan akan TUHAN. Ela bagawi babehat hong andau te.

³⁷Jete kare andau hai agama je inukas awi TUHAN je musti keton mansanae. Intu kare pesta te keton patut mahormat TUHAN dengan malalus pumpong sombayang tuntang maluput parapah taloh kinan, parapah je ingehu, parapah tarimakasih, parapah meto tuntang parapah danum anggor, tumon kare je imerlu genep andau.

³⁸Kare pesta te kilau pandahang akan kare andau Sabat je bahut. Maka kare parapah te kea pandahang akan panengan keton je bahut, akan parapah keton manewus janji, atawa parapah kahias atei je inenga keton akan TUHAN.

³⁹ Limbah getem, nampara tanggal lime walas bulan uju, keton musti mawi pesta katahin uju andau. Andau je solake tuntang andau je kahanya iete andau je inukas akan andau melai.

⁴⁰Hong andau je solake keton mamutik bua je pangakahalape bara kabon keton, tuntang kea dawen korma tuntang pating bara kare kayu je labat dawee, balalu manampara pesta kahanjak akan mahormat TUHAN, Hatallan keton.

⁴¹Pesta te musti ilalus katahin uju andau. Atoran te musti ilalus awi turonan keton sampai katatahie.

⁴²Uju andau katahie hapus bangsa Israel musti melai intu huang kare tingkap ewen,

⁴³mangat turonan keton katawan je TUHAN manyoho bangsa Israel melai intu kare kemah, metoh mimbit keton balua bara Misir. Ie TUHAN, Hatallan keton.

⁴⁴Kalote ampie Moses manyampai akan bangsa Israel kare atoran tahiu cara malalus kare pesta andau hai hapa mahormat TUHAN.