Read Ngaju LEWITIKUS 24 Bible Online

LEWITIKUS 24 - Ngaju bible

LEWITIKUS 24

¹TUHAN manyoho Moses

²manenga kare parentah toh akan bangsa Israel: imbit undus saitun je tulen tuntang je pangkahalape akan sumbo intu Kemah TUHAN, mangat tau imbelom tuntang hanyala harajur.

³Aron maharago kare sumbo te bara halemei sampai hanjewu intu eka TUHAN dumah, intu luar dinding benang je mahelat Patin Janji huang Kamar Ije Barasih Haliai. Parentah te musti ilalus sampai katatahie.

⁴Aron patut manantuani kare sumbo intu tantahan sumbo bara amas tulen mangat tetep hanyala huang Kemah TUHAN.

⁵ Duan due walas kilogram tepong je pangkahalape tuntang tampa due walas rote bulat, je genep rote te bara ije kilo tepong.

⁶Andak rote te jadi due susun, jahawen rote genep susue. Andak intu hunjun meja je ingalukop amas tulen je aton intu Kemah TUHAN.

⁷Andak manyan tulen intu genep susun rote akan mananda je rote te parapah taloh kinan akan TUHAN.

⁸Genep andau Sabat patut aton rote je inenga intu huang Kemah TUHAN. Jete je musti ilalus awi bangsa Israel sampai katatahie.

⁹ Rote jete akan Aron tuntang turonae. Ewen kumae intu eka barasih, awi rote te parapah je paham barasih bara kare parapah taloh kinan je iluput akan TUHAN akan kare imam.

¹⁰Hong kemah oloh Israel aton ije biti oloh hatue. Bapae oloh Misir tuntang indue oloh Israel arae Selomit, anak Dibri bara suku Dan. Sinde andau oloh te habantah, ie manyapa Hatalla. Tagal te oloh Israel mimbit ie manaharep Moses.

¹²Ie inahan sambil mentai putusan TUHAN tahiu taloh je patut ilalus akae.

¹³TUHAN hamauh dengan Moses,

¹⁴“Imbit oloh te balua watas kemah. Genep oloh je mahining ie manyapa, patut mandak lengee intu hunjun takolok oloh te uka manyaksi je ie sala. Palus hapus ungkup mamedak ie hapan batu sampai matei.

¹⁵Limbah te sanan jetoh akan bangsa Israel: Ewe-eweh je manyapa Hatalla musti mananggong kasalae,

¹⁶tuntang ihukum matei. Ewe-eweh je manyapa TUHAN musti imedak hapan batu sampai matei awi hapus ungkup. Hukum te buah akan oloh Israel tuntang oloh bangsa beken je jari manetep intu Israel.

¹⁷ Ewe-eweh mampatei oloh beken musti ihukum matei.

¹⁸Ewe-eweh mampatei meto ain oloh beken musti manggantie. Atorae iete ‘tahaseng ganti tahaseng.’

¹⁹Amon ije biti oloh mawi oloh beken bahimang, en bewei je jari ilalus, patut ilalus kea akae.

²⁰ Amon ie mamelek tulang maka tulange kea musti imelek. Amon ie mawi matan oloh beken babute sila, maka matae kea musti imbute silae. Amon ie mamukul oloh beken sampai bapelek kasingae, kasingae kea musti imelek. En bewei je ilaluse sampai oloh beken rusak biti berenge, musti ilalus kea karusak biti bereng ayue akan balehe.

²¹Ewe-eweh je mampatei meto musti manggantie, tapi ewe-eweh mampatei olon musti ihukum matei.

²² Atoran te buah akan keton urase tuntang kea akan oloh bangsa beken je manetep marak keton, awi aku toh TUHAN, Hatallam.”

²³Limbah Moses manyampai auh te akan bangsa Israel, ewen mimbit oloh je jari manyapa Hatalla te balua watas kemah palus mamedak ie hapan batu sampai matei. Hapan cara te bangsa Israel malalus taloh je jari irentah TUHAN dengan Moses.