Read Ngaju LEWITIKUS 25 Bible Online

LEWITIKUS 25 - Ngaju bible

LEWITIKUS 25

¹ Intu hunjun Bukit Sinai TUHAN hamauh dengan Moses tuntang manyoho

²ie manyampai kare atoran toh akan bangsa Israel. Amon keton tame akan lewu je inenga TUHAN akan keton, keton musti mahormat TUHAN hapan cara toh: Genep nyelo kauju keton dia tau malan.

³Katahin jahawen nyelo keton musti malan, marasih kare kabon anggor keton tuntang manampunan hasil tanan keton.

⁴Tapi genep nyalo je kauju ingabeken akan TUHAN. Maka katahin nyelo te petak patut melai tuntang dia tau ialan. Ela mimbul taloh en-en intu kare tana te tuntang ela marasih kare upon anggor keton.

⁵Gandom je belom kabuate atawa anggor bara upon anggor keton mahin dia tau irasih; dia tau keton manampunae tuntang mingkese, awi nyelo te iete nyelo melai akan petak.

⁶Aloh kalote, petak te akan manenga hasil kea indu iawi jadi taloh kinan akan keton, kare jipen keton, kare oloh je upah keton, tuntang kare oloh bangsa beken je melai marak keton.

⁷Tinai akan kare meto je imbelom keton tuntang kare meto bariar intu tanah keton. Kare je ihasil petak te patut indu kinan.

⁸Ise uju kali uju nyelo, epat puluh jalatien nyelo karee.

⁹Palus hong tanggal sapuluh bulan uju, iete andau ampun dosa, soho oloh mampahiau tarompet hete-hete intu hapus lewu.

¹⁰Keton musti mangabeken nyelo je kalime puluh te. Sanan kaempas akan hapus rayat. Intu nyelo te uras panatau je jari injual musti ilian akan tempoe je solake atawa akan turonae. Eweh je injual kilau jipen musti ilian akan tundah kolae.

¹¹Ela mimbul en-en intu tanan keton. Gandom je belom kabuate atawa bua anggor intu kabon bua anggor keton je dia irasih dia tau keton manampunae tuntang mingkese.

¹²Nyelo te nyelo je barasih akan keton. Keton baya tau kuman taloh je belom kabuate intu tanan keton.

¹³Intu nyelo te uras petak je jari injual musti ilian akan tempoe je solake.

¹⁴Maka amon keton manjual petak akan sama oloh Israel, atawa mamili petak bara ie, ela hajual-hapili dengan dia bujur atei.

¹⁵Regan petak te patut inukas manumon kare nyelo katahin petak te tau manenga hasil sampai Nyelo Halalian je rahian.

¹⁶Amon kare nyeloe are, regan petak te hai. Tapi amon kare nyeloe isut, regan petak te labih murah haream, awi je injual iete samandiai taloh je inggetem.

¹⁷Ela manipu sama arep keton oloh Israel, tapi keleh keton mikeh TUHAN, Hatallan keton.

¹⁸Numon uras atoran tuntang parentah TUHAN, mangat keton belom dengan salamat hong lewu te.

¹⁹Petak lewu te akan manenga hasil sampai keton aton bara taloh kinan je sukop tuntang melai intu hete huang kasanang.

²⁰Tapi mikeh aton je misek narai je akan kinan katahin nyelo kauju metoh petak dia imbul tuntang hasile dia induan.

²¹Hong nyelo kajahawen TUHAN akan mamberkat petak sampai hasile sukop akan telo nyelo.

²²Tuntang metoh keton mimbul tanan keton intu nyelo kahanya, hasil getem bara nyelo kajahawen magon aton akan kinan keton. Hapan tisan hasil getem hong lepau je magon aton keton kareh mahin sukop panginan sampai katikae keton manampunan hasil nyelo te.

²³Petak keton dia tau injual palus dapit; awi petak te dia ayun keton, malengkan ayun Hatalla. Keton baya kilau oloh bangsa beken je inyoho mahapan petak te.

²⁴Amon ije kalambar watas petak injual, musti ingaku hak tempoe je solake akan manewus petak te.

²⁵Amon oloh Israel nyalenga pehe belom sampai ie tarapaksa manjual petake, tundah kolae je tokep musti manewus petak te.

²⁶Amon jaton oloh uka manewuse tapi tempoe te rahian olih tuntang aton kasukop duit hapa manewus petake,

²⁷maka ie musti mambayar akan oloh je jari mamili petake kahain regan hasil petak te katahin kare nyelo je rahian sampai Nyelo Halalian je naharep. Kalote ie dinon haluli petak ayue.

²⁸Tapi amon ie dia olih manewus petake, oloh je mamilie tetep manguasa petak te sampai Nyelo Halalian je rahian tinai. Hong nyelo te petak te musti ilian akan tempoe je solake.

²⁹Amon ije biti oloh manjual ije huma hong lewu je ingaliling dinding kota, ie aton hak manewus humae huang katahin ije nyelo nampara bara tanggal ie manjuale.

³⁰Tapi amon huma te dia inewus awie huang katahin ije nyelo, hak ayue manewuse palus nihau. Huma te tetep ayun oloh je mamilie tuntang turonae. Hong Nyelo Halalian, huma te dia ilian.

³¹Akan huma intu kampung je dia ingaliling dinding kota buah atoran je sama kilau akan petak: tempoe je solake aton hak manewuse; huma te musti ilian hong Nyelo Halalian.

³²Tapi oloh Lewi aton hake hamparea bewei manewus ramon ewen intu kare lewu je inukas akan ewen.

³³Amon ije biti oloh Lewi manjual humae hong ije bara lewu te tuntang ie dia manewuse, huma te musti ilian akae huang Nyelo Halalian. Awi human oloh Lewi intu kare lewun ewen iete ayun ewen je tetep intu marak bangsa Israel.

³⁴Tapi padang oru lakau kare lewun bangsa Lewi dia tau injual. Jete ayun oloh Lewi sampai katatahie.

³⁵ Amon oloh sama-sama bara bangsa keton je melai marak keton nyalenga belom susah tuntang dia tau mongkos pambelome, keton patut mandohop ie kilau ije biti oloh bara bangsa beken atawa oloh tamuei, mangat ie harajur tau belom marak keton.

³⁶ Ela balaku anak duit bara taloh je injahaman keton akae, tapi keleh keton mikeh Hatallan keton; nauhe oloh te belom marak keton. Ela kea manduan ontong bara taloh kinan je injual keton akae.

³⁷

³⁸Jete parentah TUHAN, Hatallan keton je jari mimbit keton balua bara Misir akan manenga tanah Kanaan akan keton, mangat Ie jadi Hatallan keton.

³⁹ Amon oloh sama bangsam je melai dengam salenga belom susah sampai ie manjual arepe kilau jipen akam, oloh te dia tau ikau manyoho ie mawi gawin jipen.

⁴⁰Ie patut melai dengam kilau oloh je iupah; ie bagawi akam sampai Nyelo Halalian.

⁴¹Intu katika te ie tuntang kare anake tau malihi humam tuntang haluli akan tundah kolae tuntang akan tanah tato hiange.

⁴²Oloh Israel te uras rewar TUHAN. Ie je mimbit ewen balua bara Misir. Awi te ewen dia tau injual kilau jipen.

⁴³Awi te oloh Israel je manjual arepe akam dia tau ikau kasar dengae. Keleh ikau mikeh Hatallam.

⁴⁴Amon ikau handak mahapan jipen, ikau tau mamilie bara kare bangsa je melai hakalilingm

⁴⁵Keton tau kea mamili kare anak oloh bangsa beken je manetep marak keton. Kare anak oloh bangsa beken je inakan intu lewun keton tau jadi ayun keton.

⁴⁶Ewen tau kea iwaris keton akan kare anak keton indu jadi jipen ewen saumur belom. Tapi sama arep keton oloh Israel dia tau keton kasar dengae.

⁴⁷Amon ije biti oloh bangsa beken je melai marak keton jadi tatau, tuntang aton sama bangsa keton Israel salenga belom susah sampai ie manjual arepe kilau jipen akan oloh bangsa beken te atawae akan tundah kolae,

⁴⁸oloh Israel te tetep aton hak inewus. Ije bara paharie je hatue,

⁴⁹atawa mamae, atawa paharie ije tato atawa ije biti oloh beken bara kolae tokep, tau manewuse. Atawa amon ie kabuat rahian olih, ie tau manewus arepe kabuat.

⁵⁰Jipen te patut barunding dengan oloh je jari mamilie. Ewen patut mareken kare nyelo bara arepe injual kilau jipen sampai Nyelo Halalian je rahian, palus manukas regan tewuse. Rega te patut inukas manumon kahain gajih je inenga akan oloh je duan upah.

⁵¹Jipen te musti malian regan pilin bitie kilau kare gajih ije biti oloh duan upah katahin kare nyelo je hindai ihalaue.

⁵²

⁵³Kila-kilau ie jari bagawi kilau oloh duan upah je jari inggajih genep nyelo. Tuan ayue dia tau mawi ie dengan kasar.

⁵⁴Amon ie dia tau inewus hapan ije bara cara te, ie tuntang kare anake musti imbebas Nyelo Halalian je rahian.

⁵⁵Ije biti oloh Israel dia tau jadi jipen saumur belom basa bangsa Israel te uras rewar TUHAN. TUHAN je mimbit ewen balua bara tanah Misir. Ie TUHAN, Hatallan keton.