Read Ngaju LEWITIKUS 26 Bible Online

LEWITIKUS 26 - Ngaju bible

LEWITIKUS 26

¹ TUHAN hamauh, “Ela mawi tamonan taloh atawa mampendeng hampatong atawa tihang batu je baukir akan inyembah. Aku toh TUHAN Hatallan keton.

²Haga kare andau Sabat tuntang kare andau hai agama je beken, hormat eka je inukas akan manyembah Aku. Aku TUHAN.

³ Amon keton belom manumon kare atorang-Ku tuntang manumon kare parentah-Ku,

⁴Aku kareh manenga ujan intu katikae, sampai petak manenga hasil tuntang kare upon bua mamua.

⁵Hasil petak keton akan malabien, maka amon jari sampai katikae uka mamutik bua anggor, keton magon manggetem gandom. Tuntang amon jari sampai katikae mimbul gandom, keton magon mamutik bua anggor. Keton mingkes taloh kinan je sukop tuntang belom sanang intu lewun keton.

⁶Aku akan mahaga lewun keton sampai keton tau batiroh mangat tuntang dia mikeh dengan eweh bewei. Kare meto basiak akan impalomos-Ku bara tanah te, tuntang dia akan aton tinai parang kalahi huang lewun ayum.

⁷Keton akan olih mampakalah kare musoh keton;

⁸Hapan lime biti keton olih mampakalah saratus biti; hapan saratus biti keton olih mampakalah sapuluh koyan biti.

⁹Aku akan mamberkat keton tuntang manenga are anak eso akan keton. Taloh je jari injaji-Ku dengan keton, batantu ilalus-Ku.

¹⁰Hasil petak keton akan malabien, sampai sukop akan ije nyelo. Keton tarapaksa haream mampalua kalabien bara getem je helo mangat aton eka mingkes getem je taheta.

¹¹Aku akan melai marak keton huang kemah-Ku, tuntang Aku akan dia manolak keton.

¹² Aku akan mampahayak keton; Aku akan jadi Hatallan keton tuntang keton jadi ungkup-Ku.

¹³Aku TUHAN, Hatallan keton, je mimbit keton balua bara Misir mangat keton dia jadi jipen tinai. Kuasa je mahenyek keton jari imelek-Ku. Keton iawi-Ku oloh je mardeka.”

¹⁴ TUHAN hamauh, “Amon keton dia mahining auh-Ku tuntang dia malalus parentah-Ku,

¹⁵amon keton malanggar janji je iawi-Ku dengan keton tuntang dia maku manumon kare tukas tuntang kare atorang-Ku,

¹⁶keton akan ihukum-Ku. Aku akan mampadumah calaka akan keton, peres tuntang darem je dia tau keleh, sampai matan keton babute tuntang keton belom asi-asi. Keton akan mambulan tapi dia kuman hasile. Awi kare musoh keton akan dumah mampakalah keton tuntang mampalepah taloh je imbul keton.

¹⁷Keton akan ihukum-Ku, sampai keton akan impakalah kare musoh keton, tuntang inguasa kare oloh je manyingi keton. Keton akan paham mikeh, sampai keton hadari, aloh jaton je manggoang.

¹⁸Amon limbah mangkeme uras hukuman te keton dia kea manumon auh-Ku, hukuman keton akan indahang-Ku uju lipet.

¹⁹Keton paham bajoho, tapi Aku akan mamparandah keton. Ujan akan dia mohon, sampai petak keton keang tuntang batekang kilau sanaman.

²⁰Uras kahekan keton jaton gunae, awi petak keton akan dia manenga hasil tuntang kare taloh imbul keton dia mamua.

²¹Amon keton tantai magon kea malawan Aku tuntang dia maku manumon auh-Ku, maka hukumang-Ku akan keton kareh akan indahang-Ku uju lipet karee.

²²Aku akan mampadumah kare meto basiak akan marak keton. Kare meto te akan mamisak kare anak keton, mampatei meto ain keton tuntang mampalepah keton. Sampai jumlah keton jari isut toto, tuntang kare jalan intu lewun keton benyem.

²³Amon limbah mangkeme uras hukum te keton dia kea mahining auh-Ku, tapi magon harajur malawan Aku,

²⁴maka Aku akan mawi keton tuntang mahukum keton uju lipet labih babehat bara je jadi-jadi.

²⁵Aku akan mampalembut kalahi intu marak keton indu mahukum keton tagal keton jari malanggar janjing-Ku dengan keton. Tuntang amon keton hapumpong intu lewun keton uka manggau eka bakalindong, Aku akan mampadumah peres je dia olih impakeleh sampai keton tarapaksa manyarah akan musoh keton.

²⁶Keton kareh lepah taloh kinan, sampai sapuluh biti oloh bawi baya perlu ije eka mamampui rote bewei akan mamapui kakare rote je aton intu ewen. Panginan te akan imbagi, tuntang limbah keton kumae, keton magon kea mangkeme balau.

²⁷Amon limbah mangkeme uras hukuman te keton harajur kea malawan Aku tuntang dia maku manumon auh-Ku,

²⁸maka hayak kasangit-Ku Aku akan mawi keton, tuntang mahukum keton uju lipet labih babehat bara je helo-helo.

²⁹Keton akan balau, sampai kuman kare anak keton kabuat.

³⁰Aku akan mamusit kare eka keton manyembah dewa intu hunjun kare bukit, manduroh kare mesbeh keton eka mamapui garo. Aku akan manjakah kare hantun keton akan hunjun kare tamunan taloh je jari baderep te. Hayak kajilek

³¹kare lewun keton iubah-Ku jadi kare toyok derep huma, kare eka manyembah dewa impahancor awi-Ku tuntang kare parapah keton dia Aku tarimae.

³²Lewun keton akan impalomos-Ku samasinde, sampai kare musoh je manguasa lewu te tarewen mite kapaham kabinasa te.

³³Aku akan mampalembut kalahi intu lewun keton tuntang manaburan keton akan kare lewun bangsa beken. Kare tanan keton akan inalua, kare lewun keton inalua jadi tisan kare derep huma.

³⁴Intu katika te, metoh keton magon huang eka tawanan intu lewun kare musoh keton, petak keton je dia keton manaluae malayan metoh keton belom hete, akan inalua tuntang mandino katika uka malayan.

³⁶Kakare oloh ayun keton je aton huang eka tawanan intu lewu beken, akan iawi-Ku paham mikeh; sampai auh dawen je ihimon riwut mahin mawi ewen hadari. Keton akan hadari kilau inggoang huang parang, palus manjato aloh jaton musoh tokep keton.

³⁷Keton akan hadari tuntang tantarang sama arep keton, aloh jaton oloh je manggoang. Tinai keton akan dia olih malawan kare musoh keton.

³⁸Keton akan matei huang eka tawanan, imbinasa awi oloh hong eka kare musoh keton.

³⁹Baya isut bewei bara keton je magon belom intu lewun musoh keton, tapi pambelome asi-asi awi dosan keton kabuat tuntang dosan tato hiang keton.

⁴⁰Tapi turonan keton akan mangaku dosan ewen tuntang dosan tato hiang ewen je jari malawan Aku tuntang marisang bara Aku;

⁴¹sampai Aku malawan ewen tuntang maharak ewen akan eka tawanan intu lewun kare musoh ewen. Kajariae, amon turonan keton jari kalah, tuntang jari mangkeme angat hukuman awi dosa tuntang karisang ewen,

⁴² Aku akan mingat janjing-Ku dengan Yakob, Isaak tuntang Abraham. Aku akan manaheta janjing-Ku akan manenga tanah te akan bangsa-Ku.

⁴³Tapi tanah te musti helo imbuang bara oloh huange mangat toto-toto malayan. Tinai ungkup-Ku musti toto-toto manjalan kare hukuman je jari impanjato-Ku akan ewen tagal dia maku manumon kare atoran tuntang parentah-Ku.

⁴⁴Tapi metoh ewen magon melai intu lewun musoh, ewen mahin dia akan ilihi-Ku atawa imbinasa-Ku samasinde. Karana amon ewen imbinasa-Ku, rimae Aku manggeto janjing-Ku dengan ewen; padahal Aku toh TUHAN, Hatallan ewen.

⁴⁵Aku akan manaheta janji je iawi-Ku dengan tato hiang ewen, metoh Aku mamparahan kuasang-Ku akan hapus bangsa tuntang mimbit ungkup-Ku balua bara Misir, mangat Aku, TUHAN, jadi Hatallan ewen.”

⁴⁶Jete kare parentah tuntang kare atoran je inenga TUHAN intu hunjun Bukit Sinai akan Moses balalu akan bangsa Israel.