Read Ngaju LEWITIKUS 27 Bible Online

LEWITIKUS 27 - Ngaju bible

LEWITIKUS 27

¹TUHAN manenga akan Moses

²Kare atoran toh akan bangsa Israel. Amon ije biti oloh inenga akan TUHAN hapa manewus ije janji je inantu, oloh te tau inewus hapan duit.

³Manumon rega je aton intu Kemah TUHAN: — intu hunjun 60 nyelo: hatue 15 duit perak bawi 10 duit perak — helat 20-60 nyelo: hatue 50 duit perak bawi 30 duit perak — helat 5-20 nyelo: hatue 20 duit perak bawi 10 duit perak — penda 5 nyelo: hatue 5 duit perak bawi 3 duit perak

⁸Amon oloh je bajanji lalau belom susah akan mambayar rega je inukas, ie patut mimbit oloh je jari inenga akan TUHAN te akan imam. Imam patut manukas rega je labih randah manumon kaolih oloh te.

⁹Amon janji te tahiu meto dia pali je tau inarima kilau parapah akan TUHAN, oloh je bajanji te dia tau manakirie dengan meto beken. Karana je iluput akan TUHAN jadi ayun TUHAN. Amon ie manakiri kea, kadue-due kongan meto te jadi ayun TUHAN.

¹¹Tapi amon janji te tahiu meto papa je dia tau inarima jadi perapah akan TUHAN, oloh je bajanji patut mimbit meto te akan imam.

¹²Imam akan manukas regae manumon ampin meto te. Tinai rega je jari inukas iete rega matei.

¹³Amon oloh te handak manewus metoe, ie patut mambayar regae indahang dengan due puluh persen.

¹⁴Amon aton ije biti oloh manyarah humae akan TUHAN, regae te musti inukas awi imam manumon kapatut ampin huma te. Rega je jari inukas jete dia tau imbalang tinai.

¹⁵Amon oloh te handak manewus humae, ie patut mambayar regae indahang dengan due puluh persen.

¹⁶Amon ije biti oloh maluput belahe bara petake akan TUHAN, regae patut inukas manumon kare binyi je ihapan akan mimbul petak te. Akan genep due puluh kilo gandom regae sapuluh duit perak.

¹⁷Amon petak te iluput manampara bara Nyelo Halalian, regae patut imbayar urase.

¹⁸Amon petak te iluput limbah Nyelo Halalian, imam manaksir rega amon imbayar kontan manumon jumlah nyelo je magon aton sampai Nyelo Halalian je rahian, palus manukas rega je lebih murah.

¹⁹Amon oloh je maluput tana te handak manewuse, ie patut mambayar regae indahang dengan due puluh persen.

²⁰Amon ie manjual tana te dengan dia labih helo manewuse bara TUHAN, ie dia bara hak tinai manewus tanae.

²¹Hong Nyelo Halalian limbah te, tana te jadi ayun TUHAN sampai katatahie, tuntang inega akan kare imam.

²²Amon ije biti oloh maluput akan TUHAN ije tana je jari imilie,

²³Imam manaksir regae manumon jumlah nyelo je magon aton sampai Nyelo Halalian limbah te. Palus oloh te musti mambayar regae andau te kea. Duit te jadi ayun TUHAN.

²⁴Hong Nyelo Halalian, tana te patut ilian akan tempoe je solake atawa akan turonae.

²⁵Uras rega patut inukas manumon rega je aton intu Kemah TUHAN.

²⁶Meto je solake inakan iete ayun TUHAN, dia tau iluput indu parapah kahias atei. Anak sapi, anak tabiri atawa anak kambing je solake inakan jete ayun TUHAN.

²⁷Tapi meto papa je solake inakan tau inewus manumon rega je aton intu Kemah TUHAN, indahang due puluh persen. Amon dia inewus, meto te tau injual akan oloh beken manumon rega je aton intu Kemah TUHAN.

²⁸ Jaton ije biti oloh tau manjual atawa manewus taloh je jari ingabeken samasinde [10] akan TUHAN, aloh jete olon, meto atawa petak. Jete ayun TUHAN sampai katatahie.

²⁹Mahi-mahi tinai olon je jari ingabeken akan TUHAN uka imbinasa dia tau inewus; ie musti impatei.

³⁰ Sapersapuluh bara hasil petak, en gandom atawa bua, jete akan TUHAN.

³¹Amon ije biti oloh handak manewus belahe bara hasil te, ie musti mambayar rega je jari inukas, indahang due puluh persen.

³²Ije bara genep sapuluh kongan meto jete ayun TUHAN. Amon meto te ireken, sining kongan meto je kasapuluh jadi ayun TUHAN.

³³Tempon meto te dia tau minti-mintih kueh je bahalap kueh je papa. Ie kea dia tau manakirie. Amon ie manakirie kea, due-due kongan meto te jadi ayun TUHAN tuntang dia tau inewus.

³⁴Jete kare parentah je inenga TUHAN intu hunjun Bukit Sinai akan Moses akan bangsa oloh Israel.