Read Ngaju LEWITIKUS 3 Bible Online

LEWITIKUS 3 - Ngaju bible

LEWITIKUS 3

¹Amon ije biti oloh manenga ije kongan sapi akan parapah hapa badamai, sapi te tau hatue atawa bawie, tapi dia tau je aton kasalae.

²Oloh je malupute musti mandak lengee intu hunjun takolok meto te palus manyambalihe intu baun bauntonggang Kemah TUHAN. Kare imam turonan Aron musti manata dahan sapi te intu kaepa-epat dinding mesbeh.

³Akan parapah hapa badamai dengan TUHAN, imam musti maluput kare bagian bara meto te: Enyak banahate,

⁴bua kahange dengan enyake, tuntang bagian je pangkahalape bara ateie.

⁵Kakare taloh te haya-hayak dengan parapah beken je ingehu, musti imapui intu hunjun mesbeh. Ewau parapah taloh kinan te manyanang atei TUHAN.

⁶Amon taloh je iluput akan parapah hapa badamai te ije kongan tabiri atawa kambing, meto te tau hatue, tau bawie, tapi dia tau je cacate.

⁷Amon oloh maluput ije kongan tabiri, ie musti mimbite akan Kemah TUHAN.

⁸Intu hete ie musti mandak lengee intu hunjun takolok tabiri te palus manyambalihe intu baun Kemah. Palus imam musti manata dahan tabiri te intu kaepa-epat dinding mesbeh.

⁹Akan parapah hapa badamai dengan TUHAN, imam musti maluput kare bagian bara meto te: enyake, hapus ikohe je menyak tuntang inetek tokep tulang likute, enyak banahate,

¹⁰bua kahange dengan enyake tuntang bagian je pangkahalape bara ateie.

¹¹Imam je bagawi musti mamapui kare taloh te intu hunjun mesbeh indu parapah taloh kinan akan TUHAN.

¹²Amon je iluput te ije kongan kambing, oloh je malupute musti mimbite akan Kemah TUHAN.

¹³Intu hete ie musti mandak lengee intu hunjun takolok kambing te palus manyambalihe intu hila baun Kemah. Imam musti manata dahan meto te intu kaepa-epat dinding mesbeh.

¹⁴Akan parapah taloh kinan akan TUHAN, imam musti maluput kare bagian bara kambing te: enyak banahate,

¹⁵bua kahange dengan enyake tuntang bagian bara ateie je pangkahalape.

¹⁶Imam je bagawi musti mamapui kakare taloh te intu hunjun mesbeh. Ewau parapah taloh kinan te manyanang atei TUHAN. Kakare enyak meto te uras akan TUHAN.

¹⁷Oloh Israel dia tau samasinde kuman enyak atawa daha. Atoran te ihapan sampai katatahie, tuntang musti inumon awi gagenep bitin oloh Israel hong kueh bewei ewen melai.