Read Ngaju LEWITIKUS 5 Bible Online

LEWITIKUS 5 - Ngaju bible

LEWITIKUS 5

¹Parapah ampun dosa perlu iluput: Amon ije biti oloh jadi saksi intu kantor pengadilan, tapi ie dia manenga katarangan tumon je gitae atawa hininge sampai ie mananggong kasalae.

²Amon ije biti oloh mawi kasalan je dia tantai ihat balalu mawi ie pali, awi jari manigong taloh je pali, paribasae hantun meto, tuntang limbah te ie katawan gawie te sala.

³Amon ije biti oloh mawi kasalan je dia tantai ihat manigong taloh je pali je asale bara olon, tuntang limbah te katawan gawie te sala.

⁴Amon ije biti oloh mawi kasalan awi ie manyewut sumpah baranga-rangai akan hapae malalus en bewei, tuntang limbah te ie katawan gawie te sala.

⁵Intu genep perkara te, oloh je mawi kasalan musti mangaku kasalae.

⁶Akan tewus dosae, ie musti mimbit ije kongan tabiri atawa kambing bawie akan TUHAN. Imam musti maluput parapah te mangat dosan oloh te iampun.

⁷Tapi amon oloh je mawi kasalan dia olih manyadia tabiri atawa kambing akan manewus dosae, ie musti mimbit ije kapasang burong kuku atawa burong dara tabela, ije kongan akan parapah ampun dosa, tuntang ije kongan tinai akan parapah je ingehu.

⁸Kare burong te musti iimbit akan imam. Imam musti labih helo maluput burong je inukas akan parapah ampun dosa. Uyat burong te musti inyopek, tapi dia tau sampai bageto takoloke.

⁹Dahan burong te musti imbirik intu dinding mesbeh, tuntang tisae ihamis intu penda mesbeh akan parapah ampun dosa.

¹⁰Limbah te imam maluput burong je kadue akan parapah je ingehu, tumon atoran. Kalote cara imam maluput parapah akan dosan oloh te, maka ie akan iampun TUHAN.

¹¹Amon oloh je mawi kasalan dia olih manyadia ije kapasang burong kuku atawa burong dara akan parapah ampun dosa, ie musti mimbit ije kilo tepong. Tepong te dia tau iewoi dengan undus saitun atawa manyan, awi parapah te parapah ampun dosa, dia parapah taloh kinan.

¹²Tepong te musti imbit akan imam. Imam manduan ije karakop tepong te kilau tanda je urase jari inenga akan TUHAN. Tepong je ije karakop te patut imapui intu hunjun mesbeh kilau parapah taloh kinan. Jete parapah akan ampun dosa.

¹³Kalote cara imam maluput parapah akan dosan oloh te, maka ie akan iampun TUHAN. Gandom je tisae jete bagin imam, tumon intu parapah gandom.

¹⁴TUHAN manenga akan Moses kare atoran toh.

¹⁵Amon ije biti oloh dia tantai ihat mawi dosa awi salaya hong manjulok kare parapah je inantu akan TUHAN, maka oloh te musti mimbit parapah gantin karugi. Parapah te musti ije kongan tabiri atawa kambing hatue je jaton cacate, tuntang irega manumon rega je aton intu Kemah TUHAN.

¹⁶Oloh te musti mambayar taloh je jari ingalapeae awie laya, indahang dengan duepuluh persen. Limbah te ie musti manjulok meto te akan imam. Imam malupute akan dosan oloh te, maka ie akan iampun TUHAN.

¹⁷Amon ije biti oloh mawi dosa dia tantai ihat, awi malanggar ije bara kare parentah TUHAN, oloh te buah kasalan tuntang musti mananggong kasalae.

¹⁸Akan parapah gantin karugi ie musti mimbit ije kongan tabiri atawa kambing hatue je jaton cacate tuntang irega manumon rega je aton intu Kemah TUHAN. Imam malupute akan dosan oloh te, maka ie akan iampun TUHAN.

¹⁹Jete parapah gantin karugi akan kasalan je ilaluse intu taharep TUHAN.