Read Ngaju LEWITIKUS 6 Bible Online

LEWITIKUS 6 - Ngaju bible

LEWITIKUS 6

¹ TUHAN manenga akan Moses kare atoran toh.

²Ije biti oloh musti maluput parapah amon ie mawi dosa intu taharep TUHAN awi dia maku malian ramo je iingkes dengae awi sama arepe, atawa manipu oloh, manakau ramoe, atawa jari sondau ramo je nihau, tapi milime hapan sumpah.

⁴Oloh je mawi kasalan te musti mambayar haluli uras taloh je dinoe dengan dia bujur. Metoh ie ingatawan kasalae ie musti mambayar lepah akan tempoe, indahang due puluh persen.

⁶Akan parapah gantin karugi oloh te maluput ije kongan tabiri atawa kambing hatue je jaton cacate tuntang irega manumon rega je aton intu Kemah TUHAN.

⁷Imam malupute akan oloh te, maka ie akan iampun TUHAN.

⁸TUHAN manyoho Moses

⁹manenga akan Aron tuntang kare anake kare atoran toh tahiu parapah je ingehu urase. Imam musti mandak parapah je ingehu te intu hunjun mesbeh tuntang manaluae intu hete ije ale-alem, tuntang apuie harajur hanyala.

¹⁰Limbah parapah te jadi kawo, imam hapakaian salawar pandak tuntang jubah bara benang baputi, tuntang manggatang kawo campur enyak te bara hunjun mesbeh palus mandake intu balikat mesbeh.

¹¹Limbah te ie musti manakiri pakaian tuntang mimbit kawo te akan luar watas kare kemah, akan eka je inukas akan jete.

¹²Sining hanjewu imam musti mandak pandok apui intu hunjun mesbeh, mator parapah je ingehu intu hunjue, tuntang mamapui enyak je bara parapah hapa badamai. Apui intu hunjun mesbeh te musti hanyala harajur dia tau inalua belep.

¹⁴Jetoh kare atoran tahiu parapah taloh kinan akan TUHAN. Parapah te patut imbit akan baun mesbeh awi ije biti bara turonan Aron.

¹⁵Ie manduan ije karakop tonek tepong dengan minyak tuntang kakare manyan, palus mamapuie intu hunjun mesbeh kilau tanda je uras parapah te inenga akan TUHAN. Ewau parapah te manyanang atei TUHAN.

¹⁶Tepong je tisae inampa akan rote je dia iragi tuntang kinan awi kare imam intu eka je inukas, iete intu parantaran Kemah TUHAN. Jete bagin kare imam je inenga TUHAN akan ewen bara parapah taloh kinan. Panginan te paham barasih, kilau parapah ampun dosa tuntang parapah gantin karugi.

¹⁸Palus katatahie genep biti oloh hatue turonan Aron tau kuman rote te; jete bagin ewen je katatahie bara taloh kinan je iluput akan TUHAN. Oloh beken je manigong taloh kinan je jari iluput te, akan mandino calaka tagal kapaham karasihe.

¹⁹TUHAN manenga akan Moses kare atoran toh.

²⁰Iete tahiu parapah metoh mantahbis ije biti imam turonan Aron. Hong andau ie intahbis ie musti maluput parapah ije kilo tepong gandom akan TUHAN. Saparo iluput hanjewu tuntang tisae iluput halemei.

²¹Tepong te musti iewoi dengan minyak, palus imapui intu hunjun eka mamapui, limbah te inyila-nyila tuntang iluput indu parapah taloh kinan. Ewau parapah te manyanang atei TUHAN.

²²Palus katatahie genep turonan Aron je intahbis jadi Imam Hai musti maluput parapah te. Urase imapui indu parapah akan TUHAN.

²³Genep parapah taloh kinan je iluput awi imam musti imapui urase, isut mahin dia tau kinan.

²⁴TUHAN manyoho Moses

²⁵manenga akan Aron tuntang kare anake kare atoran toh, tahiu parapah ampun dosa. Meto akan parapah ampun dosa musti inyambalih intu eka manyambalih meto akan parapah je ingehu. Parapah te paham barasih.

²⁶Imam je maluput parapah te musti kumae intu eka je inukas, iete parantaran Kemah TUHAN.

²⁷Ewe-eweh atawa en bewei je buah isin meto te akan dinon calaka tagal kapaham karasihe. Amon ije kalambar baju buah tampitik dahan meto te, baju te musti impukan intu eka je inukas.

²⁸Ketel bara petak je ihapan maluntoh isin meto parapah te musti imusit. Amon je ihapan ketel sanaman, ketel te patut iisot palus irasih hapan danum.

²⁹Genep bitin oloh hatue huang keluarga kare imam tau kuman parapah je paham barasih te.

³⁰Meto akan upacara ampun dosa je induan belahe dahae indu iimbit akan Kamar Ije Barasih, musti imapui lepah tuntang dia tau kinan.