Read Ngaju LEWITIKUS 7 Bible Online

LEWITIKUS 7 - Ngaju bible

LEWITIKUS 7

¹Jetoh kare atoran tahiu parapah ganti rugi. Parapah te paham barasih.

²Meto je akan iluput musti inyambalih intu eka manyambalih meto akan parapah je ingehu, palus dahae inata intu kaepa-epat dinding mesbeh.

³Imam musti maluput intu hunjun mesbeh uras enyak meto te, iete: ikohe je menyak, banahate, bua kahange dengan enyake, tuntang hila je pangkahalape bara ateie.

⁵Uras te musti ingehue intu hunjun mesbeh kilau parapah taloh kinan akan TUHAN.

⁶Genep bitin oloh hatue huang keluarga kare imam tau kuman isin meto parapah te, tapi ewen patut kumae intu hunjun eka je inukas, awi parapah te paham barasih.

⁷Akan parapah ampun dosa tuntang parapah ganti rugi ilalus atoran je sama, iete: Isin meto je iluput iete bagin imam je malupute.

⁸Upak meto te kea akan imam.

⁹Genep parapah taloh kinan je imapui intu eka mamapui atawa impakasak huang rinjing atawa imanggang, jadi bagin imam je malupute.

¹⁰Tapi parapah taloh kinan je dia impakasak, aloh je iewoi dengan minyak atawa je keang, urase akan kare imam turonan Aron, tuntang musti imbagi rata marak ewen.

¹¹Jetoh kare atoran tahiu parapah hapa badamai je iluput akan TUHAN.

¹²Amon parapah te iluput akan tarimakasih, maka hayak dengan meto te musti iluput kea rote je dia iragi. Rote te tau je bakapal bara kupeh tepong dengan undus saitun, tau kea rote keang banipis je iohos dengan minyak, atawa wadai tepong je inampa dengan undus saitun.

¹³Beken bara te musti iluput kea rote je inampa hapan ragi.

¹⁴Bara genep macam rote, belahe musti iluput akan TUHAN, tuntang jete bagin imam je manduan dahan meto te tuntang manatae intu mesbeh akan parapah hapa badamai.

¹⁵Isie patut kinan hong andau meto te iluput, isut mahin dia tau ilihi sampai hanjewu jewue.

¹⁶Amon ije biti oloh mimbit parapah hapa badamai indu manulus janjie, atawa parapah kahias ateie, dia usah kinan urase andau te kea. Tisae tau kinan andau jewue.

¹⁷Amon hong andau je kateloe magon aton tisae, isin meto te musti imapui lepah.

¹⁸Tapi amon andau je kateloe isin meto te kinan kea, maka parapah te dia baka inarima tuntang dia mimbit berkat akan oloh te, tinai jadi papa haream. Oloh je kumae basala tuntang musti mananggong hukumae.

¹⁹Isin meto je buah taloh papa musti imapui lepah tuntang dia tau kinan. Isin meto parapah hapa badamai baya tau kinan awi oloh je dia papa.

²⁰Amon oloh kuman isin meto te metoh ie magon papa, ie dia tinai iitong oloh ungkup ain Hatalla.

²¹Amon ije biti oloh kuman isin meto ramon parapah te jari manigong taloh je papa, aloh je balua bara kalunen atawa bara meto, ie kea dia tinai iitong ungkup ain Hatalla.

²²TUHAN manenga akan Moses kare atoran toh

²³akan bangsa Israel. Enyak sapi, tabiri tuntang kambing dia tau kinan.

²⁴Enyak meto je matei kabuate atawa imisak meto basiak, dia tau kinan tapi tau ihapan akan kaperluan beken.

²⁵Oloh je kuman enyak meto je tau iluput akan parapah taloh kinan akan Hatalla, dia tinai iitong oloh ungkup ain Hatalla.

²⁶ Oloh Israel hong kueh bewei ie melai, dia tau kuman dahan burong atawa dahan meto je beken.

²⁷Ewen je malanggar atoran toh dia tinai iitong oloh ungkup ain Hatalla.

²⁸TUHAN manenga akan Moses kare atoran toh

²⁹akan bangsa Israel. Ewe-eweh je mimbit parapah hapa badamai, musti mamisah belahe akan parapah je tantai akan TUHAN.

³⁰Ie kabuat patut mimbit parapah taloh kinan te. Enyak tuntang usok meto te musti iluput indu parapah je inenga akan TUHAN.

³¹Imam musti mamapui enyak meto te intu hunjun mesbeh, tapi usoke bagin kare imam.

³²Sapak gantaue musti inenga kilau panenga je tantai

³³akan imam je maluput daha tuntang enyak parapah hapa badamai te.

³⁴Usok tuntang sapak gantaue iete panenga je ingabeken je induan TUHAN bara parapah panenga bangsa Israel tuntang inenga akan kare imam palus katatahie.

³⁵Bara taloh kinan je inenga akan TUHAN, jete je inengae akan Aron tuntang kare anake hong andau ewen intahbis jadi imam.

³⁶Hong andau te TUHAN marentah bangsa Israel uka bara kare panengan ewen, jete akan kare imam. Atoran toh musti inumon bangsa Israel palus katatahie.

³⁷Kalote kare atoran tahiu parapah je ingehu, parapah taloh kinan, parapah ampun dosa, parapah gantin karugi, parapah akan pangkat tuntang parapah hapa badamai.

³⁸TUHAN manenga kare parentah te akan Moses intu Bukit Sinai metoh ie manyoho bangsa Israel maluput parapah intu padang pasir Sinai.