Read Ngaju LEWITIKUS 8 Bible Online

LEWITIKUS 8 - Ngaju bible

LEWITIKUS 8

¹TUHAN hamauh dengan Moses,

²“Tehau Aron tuntang kare anake tuntang imbit pakaian imam, minyak upacara, ije kongan sapi tabela, akan parapah ampun dosa, due kongan tabiri hatue tuntang ije kusak rote je dia iragi.

³Palus soho oloh hapus ungkup Israel hapumpong intu baun bauntonggang Kemah-Ku.”

⁴Moses malalus taloh je irentah TUHAN. Metoh hapus ungkup jari hapumpong intu eka te,

⁵Moses hamauh dengan ewen, “Je ilalusku toh iete parentah TUHAN.”

⁶Palus ie manyoho Aron tuntang kare anake dumah akan baun tuntang menyau arep.

⁷Limbah te ie mangkepan pakaian imam akan Aron: Kameja, peteng kahang tuntang jubah. Tinai epod[1] je imeteng intu kahange dengan peteng kahang bara benang lamos.

⁸Palus ingkepae tutup usok intu Aron, tuntang akan huang tutup usok te inameae Urim tuntang Tumim. [2]

⁹Palus ingkepae saruban intu takolok Aron. Intu saruban te inyemate hiasan amas, je mananda Aron jadi ayun TUHAN. Uras kare taloh te ilalus Moses manumon parentah TUHAN dengae.

¹⁰Palus Moses manduan minyak upacara tuntang mohose intu Kemah TUHAN tuntang uras kare pakakase. Tumon te uras taloh te ingabeken akan TUHAN.

¹¹Isut bara minyak te imbirike uju kali akan hunjun mesbeh tuntang uras kare pakakase, tinai akan hunjun bak eka danum penyau tuntang lapike. Maka uras taloh te ingabeken akan TUHAN.

¹²Limbah te Moses manahbis Aron dengan manusoh isut minyak upacara te akan hunjun takoloke.

¹³Palus ie manyoho kare anak Aron dumah akan baun. Ingkepae intu ewen kameja tuntang peteng kahang. Palus ingkepae saruban intu takolok ewen kilau je irentah TUHAN dengae.

¹⁴Palus Moses manduan ije kongan sapi hatue tabela akan parapah ampun dosa. Aron tuntang kare anake mandak lengen ewen intu hunjun takolok meto te.

¹⁵Balalu Moses manyambalihe tuntang manduan belahe dahae. Daha te iohose mahapan tunjoke intu kare tandok hong kare puting mesbeh, mangat mesbeh te ingabeken akan TUHAN. Daha je tisae inusohe intu penda mesbeh. Kalote carae mesbeh te imparasih tuntang ingabeken tantai akan TUHAN.

¹⁶Bara sapi je harue inyambalih te, Moses manduan uras banahate, bua kahang tuntang enyake, tuntang bagin je pangakahalape bara ateie. Uras te imapuie intu hunjun mesbeh.

¹⁷Tapi isin sapi te, upake, taloh huang kanaie je batisa tamput bajakah kanaie, jadi hapus bitin sapi te beken bara kare bagian je jari imisah, imapuie intu luar watas kare Kemah kilau je irentah TUHAN.

¹⁸Limbah te Moses manduan tabiri hatue akan parapah je ingehu, palus Aron tuntang kare anake mandak lengen ewen intu hunjun takolok tabiri te.

¹⁹Moses manyambalih tabiri te tuntang dahae inatae intu kaepa-epat dinding mesbeh.

²⁰Palus meto te iragae tuntang ramon kanaie dengan paie ienyaue hapan danum. Takolok, enyak, tuntang tisan daging tabiri hatue te imapuie akan parapah je ingehu intu hunjun mesbeh, kilau je irentah TUHAN dengae. Ewau parapah taloh kinan te manyanang atei TUHAN.

²²Palus Moses manduan tabiri hatue je ije kongan tinai akan parapah imam je inahbis. Aron tuntang kare anak ewen mandak lengen ewen intu hunjun takolok tabiri te,

²³palus Moses manyambalihe. Limbah te induae isut dahan meto te, palus iohose intu bumbong pinding gantaun Aron, intu tunjok indu lenge gantau, tuntang tunjok indu pai gantaue.

²⁴Limbah te ie manyoho kare anak Aron manokep, palus iohose kea isut daha intu bumbong pinding gantaun ewen, intu tunjok indu lenge gantau, tuntang tunjok indu pai gantaun ewen. Tisan daha te inatae intu kaepa-epat dinding mesbeh.

²⁵Moses manduan enyak tabiri te, ikohe je menyak, uras banahate, bagin je pangkahalape bara ateie, bua kahang dengan enyake tuntang paie gantaue.

²⁶Bara kusak je basuang rote dia iragi je jari iluput akan TUHAN, Moses manduan ije rote bakapal je inampa hapan minyak tuntang ije rote banipis. Rote te iandake intu hunjun enyak tuntang sapak gantaun tabiri.

²⁷Uras te iingkese intu lengen Aron tuntang kare anake, palus ewen malupute indu parapah je inenga akan TUHAN.

²⁸Limbah te Moses manduan taloh kinan te bara ewen tuntang mamapuie intu hunjun mesbeh, hayak dengan parapah je ingehu akan parapah hapa manahbis. Ewau parapah taloh kinan te manyanang atei TUHAN.

²⁹Palus Moses manduan usok tabiri te tuntang malupute indu parapah je inenga akan TUHAN. Jete bagin Moses bara tabiri hatue je iluput akan upacara manahbis imam. Urase ilalus Moses kilau je irentah TUHAN dengae.

³⁰Limbah te Moses manduan belah bara minyak upacara tuntang belah daha je aton intu hunjun mesbeh, palus imbirike intu Aron tuntang kare anake intu pakaian ewen. Hapan upacara te Moses mangabeken ewen tuntang pakaian ewen akan TUHAN.

³¹Limbah te Moses hamauh dengan Aron tuntang kare anake, “Pakasak isin meto parapah te intu bauntonggang Kemah TUHAN. Manumon parentah TUHAN, keton patut kumae intu hete dengan rote parapah hapa manahbis je aton intu huang kusak.

³²Isin meto tuntang rote je tisae musti keton mangehue lepah.

³³Katahin uju andau keton dia tau malihi Kemah TUHAN sampai upacara manahbis keton lepah.

³⁴TUHAN marentah mangat taloh je ilalus itah andau toh, ilalus kea palus dapit. Hapan upacara toh kare dosan keton iampun.

³⁵Katahin ujun andau, handau hamalem, keton patut melai intu baun bauntonggang Kemah akan malalus taloh je irentah TUHAN. Amon keton dia malaluse, keton akan matei. Jete je irentah TUHAN dengangku.”

³⁶Palus Aron tuntang kare anake malalus uras je irentah TUHAN mahalau Moses.