Read Ngaju LEWITIKUS 9 Bible Online

LEWITIKUS 9 - Ngaju bible

LEWITIKUS 9

¹Jandau limbah upacara tahbis te lepah, hong andau je kahanya, Moses mantehau Aron tuntang kare anake dengan kare pamimpin bangsa Israel.

²Koan Moses dengan Aron, “Duan ije kongan sapi hatue tabela tuntang ije kongan tabiri hatue, kadue-duee je jaton cacate. Luput kadue-due meto te akan TUHAN, sapi hatue akan parapah ampun dosa, tuntang tabiri hatue akan parapah je ingehu.

³Palus soho bangsa Israel maluput ije kongan kambing hatue akan parapah ampun dosa tuntang ije kongan anak sapi dengan ije kongan anak tabiri je ije nyelo umure, ije jaton cacate akan parapah je ingehu.

⁴Soho ewen maluput kea ije kongan sapi hatue tuntang ije kongan kambing hatue akan parapah hapa badamai. Uras te musti iluput ewen akan TUHAN haya-hayak dengan parapah panenga je iewoi minyak, awi intu andau toh TUHAN dumah manalih ewen.

⁵Uras je imeteh Moses imbit ewen akan hila baun Kemah, tuntang uras ungkup hapumpong intu hete uka sombayang intu TUHAN.

⁶Palus Moses hamauh, “TUHAN manyoho keton malalus jetoh mangat keton tau mite kalawan panumah TUHAN.”

⁷ Limbah te ie hamauh dengan Aron, “Lius akan mesbeh tuntang natap parapah ampun dosa tuntang parapah je ingehu, mangat dosam tuntang dosan ungkup iampun TUHAN. Lalus te kilau je irentah TUHAN.”

⁸Palus Aron manalih mesbeh tuntang manyambalih sapi hatue je handak iluput akan ampun dosae kabuat.

⁹Kare anak Aron manjulok dahan meto te akan Aron, tuntang ie mansulop tunjoke huang daha te, palus mohose intu kare tandok hong kaepa-epat puting mesbeh. Limbah te daha je tisae inusohe intu penda mesbeh.

¹⁰Enyak, bua kahang tuntang bagian meto te je pangkahalape, imapuie intu hunjun mesbeh, kilau je irentah TUHAN dengan Moses.

¹¹Tapi isin meto tuntang upak meto te imapuie intu luar watas kare kemah.

¹²Limbah te Aron manyambalih meto akan parapah je ingehu akae kabuat. Kare anak Aron manjulok dahan meto te akae, palus ie manatae intu kaepa-epat dinding mesbeh.

¹³Limbah te ewen manjulok akae takolok tuntang kare bagian bara meto te je beken, balalu ie mamapauie intu hunjun mesbeh.

¹⁴Limbah te kanaie tuntang sapak meto te ienyau tuntang imapuie hayak dengan parapah je ingehu intu hunjun mesbeh.

¹⁵Limbah te ie maluput kambing akan parapah ampun dosan ungkup. Kambing te inyambalihe tuntang ilupute kilau ampin cara maluput parapah akan indu ampun dosae kabuat.

¹⁶Palus induae kea meto akan parapah je ingehu, tuntang ilupute tumon atoran.

¹⁷Limbah te ilupute parapah panginan; induae tepong ije karakop, tuntang imapuie intu hunjun mesbeh. Jete pandahang akan parapah je ingehu sining andau.

¹⁸ Palus inyambalihe kea ije kongan sapi hatue tuntang ije kongan tabiri hatue indu parapah hapa badamai akan ungkup. Kare anak Aron manjulok dahan meto te akae, palus ie manatae akan kaepa-epat dinding mesbeh.

¹⁹Bagian je menyak bara sapi tuntang kambing te iingkes ewen

²⁰intu hunjun usok kadadue meto te, palus Aron mamapuie intu hunjun mesbeh.

²¹Usok tuntang sapak gantaun meto te ilupute akan indu parapah panenga akan TUHAN. Jete bagin kare imam, kilau je irentah Moses.

²² Limbah maluput uras kare parapah te, Aron manggatang lengee akan hunjun ungkup Israel tuntang mamberkat ewen, limbah te balalu ie mohon.

²³Palus Moses tuntang Aron tame akan huang Kemah TUHAN. Limbah te ewen balua tuntang mamberkat ungkup. Balalu hapus ungkup mite kalawan panumah TUHAN.

²⁴Salenga TUHAN mampamohon apui je mangehu lepah parapah je ingehu, tuntang kare bagian je menyak intu hunjun mesbeh. Metoh ungkup Israel mitee, ewen basasurak palus mahingkep manyembah.