Read Ngaju YEREMIA 1 Bible Online

YEREMIA 1 - Ngaju bible

YEREMIA 1

¹Buku toh basuang kare auh Yeremia anak Hilkia, ije biti bara kare imam bara lewu Anatot intu tanah Benyamin.

² TUHAN hakotak dengan Yeremia intu nyelo katelo walas metoh raja Yosia anak Amon marentah Yuda.

³ Limbah te TUHAN hakotak tinai pire-pire tingkat dengae, nampara bara jaman raja Yoyakim anak Yosia sampai nyelo kasawalas metoh Sedekia anak Yosia marentah intu Yuda. Hong bulan lime nyelo te kea oloh Yerusalem iimbit jadi tawanan.

⁴TUHAN hamauh dengangku,

⁵“Helo bara Aku manampa ikau huang kanain indum, tuntang helo bara ikau inakan, Aku jari mintih tuntang mangkat ikau jadi nabi akan kare bangsa.”

⁶Aku tombah, “Yoh, TUHAN Pangkahai, aku dia apik bapander awi aku lalau tabela.”

⁷Tapi TUHAN tombah, “Ela manyewut ikau lalau tabela. Amon Aku manyoho ikau manalih eweh bewei, ikau keleh haguet, tuntang uras kare taloh je inyoho-Ku ikau mansanae, musti ikau manyampaie akan ewen.

⁸Ela mikeh dengan ewen, awi Aku akan mampahayak ikau akan mangalindong ikau. Aku, TUHAN jari hakotak!”

⁹Limbah te TUHAN manjuju lengen Ayue, tuntang manigong nayamangku palus hamauh, “Hining tuntang sanan kare auh je ingotak-Ku toh.

¹⁰Andau toh Aku manenga akam kuasa mahunjun kare bangsa tuntang kare karajaan — kuasa akan mampalongkang tuntang mandurohe, akan manggaling tuntang mambinasa, akan mamangun tuntang mimbul.”

¹¹TUHAN misek aku, “Narai je gitam, Yeremia?” Aku tombah, “Edan batang kenari, TUHAN.”

¹²“Buah,” koan TUHAN, “Aku manjaga[1] mangat uras taloh je insanang-Ku manjadi tulus.”

¹³Balalu TUHAN misek aku tinai, “Narai tinai je gitam?” Aku tombah, “Intu hila utara gitangku ije ketel je huange metoh manara tuntang handak tambalik akan hila hetoh.”

¹⁴TUHAN hamauh, “Bara utara calaka akan dumah tuntang mawi uras oloh lewu toh.

¹⁵Aku akan manyoho uras bangsa intu hila utara dumah akan manguasa Yerusalem, kare dinding intu hakaliling lewu toh tuntang kare lawange tuntang uras lewu intu Yuda akan irampas awi ewen.

¹⁶Aku akan mahukum ungkup-Ku, awi ewen badosa tuntang manalikut Aku. Ewen jari maluput parapah akan kare hatalla beken, tuntang mawi kare hampatong dewa tuntang manyembahe.

¹⁷Tata-tatap, Yeremia! Keleh haguet tuntang sanan akan ewen uras taloh je irentah-Ku akam. Ela mikeh dengan ewen, uka ikau ela iawi-Ku labih mikeh tinai amon hataharep dengan ewen.

¹⁸Hining! Ikau akan ilawan awi oloh lewu toh, iete kare raja Yuda, kare oloh je marentah, kare imam tuntang rayat. Tapi andau toh Aku manenga akam kaabas hapa malawan ewen. Ikau akan jadi kilau lewu hadinding batu, kilau jihi sanaman tuntang dinding tambaga. Ewen dia olih akan mampakalah ikau, awi Aku akan mampahayak tuntang mangalindong ikau. Aku, TUHAN jari hakotak.”