Read Ngaju YEREMIA 10 Bible Online

YEREMIA 10 - Ngaju bible

YEREMIA 10

¹Ungkup Israel, hining peteh TUHAN dengam.

²Ie hamauh, “Ela omba hadat kare bangsa beken, tuntang ela mikeh mite kare tanda hong langit je ingikeh kare bangsa te.

³Hadat kare bangsa te dia baguna samasinde. Ewen maneweng kare batang kayu intu parak kayu, tuntang manyoho tukang mahapan pakakase manampa hampatong dewa.

⁴Limbah te hampatong dewa te ihias hapan amas tuntang perak, balalu indehen dengan paku mangat dia balongkang.

⁵Kare hampatong dewa te sama kilau hampatong olon hapa mampikeh meto hong kabon tantimon. Ewen dia tau hakotak dia tau mananjong, tuntang musti inggatang. Ela mikeh dengan ewen, awi ewen dia tau mawi ikau; tuntang kea ewen dia tau mandohop.”

⁶TUHAN je hai haliai, Ikau jaton tandinge Aram te pangkahai tuntang kontep kuasa.

⁷ Eweh kea je dia maku sontop manyembah Ikau, rajan kare bangsa? Toto, Ikau patut haliai ihormat. Bara uras oloh pintar marak kare bangsa tuntang bara uras kare rajan ewen, jaton je tau inyama Dengam, o TUHAN.

⁸Paleng tuntang humong ewen urase awi dewae baya kayu bewei, dia tau majar taloh je baguna.

⁹Ie ingalukop hapan perak tuntang amas je imbit bara Spanyol tuntang lewu Upas, uras kare gawin tukang amas. Pakaiae bara benang ungu batue tuntang ungu mangor, inampa bahala-halap awi oloh je apik manantang.

¹⁰Tapi Ikau, TUHAN, Hatalla toto, Hatalla je manenga pambelom, raja katatahie. Amon Ikau sangit petak hongge, amon Ikau balait kare bangsa dia olih manyarenan kalait Aim. (

¹¹Keton, o ungkup, musti mansanan akan ewen iete kare dewa je dia manjapa langit tuntang petak te akan imbinasa. Ewen akan lilap bara kalunen toh.)

¹²TUHAN manjapa kalunen hapan kuasan Aie, manampa kalunen hapan pangatawan tahiu kapintar kaharati tuntang mambirang langit hapan kapintar kaharatie.

¹³Baya hapan auh Aie Ie manenga parentah, maka danum menggotok intu langit.[6] Bara kare tapakan petak Ie mampadumah baunandau, Ie mawi kilat mayabintir huang andau ujan, balalu ingirime riwut bara ekae mingkese.

¹⁴Awi mite taloh handiai te, olon balalu katawan je ie puna humong jaton bara kaharati. Tukang amas buah kahawen, awi hampatong dewa tampan ayue te dia toto tuntang jaton bara hambaruan.

¹⁵Kare hampatong dewa te jaton aton regae, patut ihababaka tuntang ihina. Amon sampai katikae ewen binasa.

¹⁶Hatallan Yakob dia sama kilau kare hampatong dewa te; Ie manjapa kakare taloh handiai. Arae iete TUHAN Je Jaton Tikas Kuasae; Ie jari mintih Israel manjadi ungkup Ayue.

¹⁷O oloh Yerusalem, keton ingapong! Awi te keleh tata-tatap!

¹⁸Sinde toh TUHAN akan mantarik hapus bangsa Yuda akan eka tawanan; keton urase akan imparotek-Ku samasinde. Jete peteh TUHAN.

¹⁹Oloh Yerusalem mantehau, “Ikei bahimang paham tuntang dia tau keleh. Bihin ikei manyangka tahiu kapehe toh olih ikei mananggonge, padahal dia.

²⁰Kemah ikei rusak tuntang kare talie bageto urase. Jaton tinai je tau mampendeng kemah tuntang mangkepan kare benang atepe awi kare anak oloh jari haguet.”

²¹Aku tombah, “Humong kare pamimpin itah te. Ewen dia balaku nasehat bara TUHAN, jete bukue ewen jaton dinon hasil, tuntang itah kasaburan akan hete-hete.

²²Hining! Aton barita iete ije bangsa intu utara mampalembut kageger. Tantarae akan mawi kare lewun Yuda jadi benyem tuntang jaton oloh melaie. Kare aso parak kayu manyahokan intu kanih.”

²³TUHAN, aku katawan jaton aton je kuasa manukas kajarian aie atawa mator jalan pambelom ayue.

²⁴Jara ikei, o TUHAN, tapi ela hapan pukul je lalau mangapehe. Ela kea mahukum ikei amon Ikau kanjeran sangit, awi batantu ikei akan binasa urase.

²⁵Nusoh kasangit Aim akan kare bangsaje dia mangaku Ikau tuntang dia maku manempo Ikau. Awi ewen jari mambinasa ungkup Ayum samasinde tuntang mambinasa tanah ikei.