Read Ngaju YEREMIA 11 Bible Online

YEREMIA 11 - Ngaju bible

YEREMIA 11

¹TUHAN hamauh dengangku,

²“Ingat kare auh janji je inampa-Ku dengan ungkup-Ku. Suman akan oloh Yuda tuntang oloh Yerusalem iete

³Aku, TUHAN, Hatallan Israel, manyapa eweh bewei je dia manumon kare auh janjing-Ku te.

⁴Janji te jari inampa-Ku dengan tato hiang ewen metoh ewen imbit-Ku balua bara Misir, lewu je sama kilau naraka akan ewen. Aku manyoho ewen manempo Aku tuntang malalus uras kare taloh je jari irentah-Ku. Toh jari insanang-Ku kea akan oloh Yuda tuntang oloh Yerusalem iete amon ewen manempo Aku, ewen akan jadi ungkup-Ku tuntang Aku jadi Hatallan ewen.

⁵Amon ewen malalus uras taloh te, Aku akan malalaus janjing-Ku dengan tato hiang ewen iete tanah je basiwoh tuntang jaton bara katapas, je metoh toh ewen melaie, akan inenga-Ku akan ewen.” Aku tombah, “Yoh, TUHAN.”

⁶Palus TUHAN hamauh dengangku, “Keleh haguet akan kare lewu intu Yuda, tuntang akan kare jalan intu Yerusalem. Keleh haguet manyampai peteh-Ku toh akan kare oloh intu kanih. Nyoho ewen mahining tuntang malalus kare auh janjing-Ku.

⁷Metoh Aku mimbit tato hiang ewen bara Misir, hapan auh je tarang Aku mampingat ewen uka manempo Aku. Sampai andau toh Aku harajur mampingat ungkup-Ku tahiu taloh te,

⁸tuntang manyoho ewen manumon janjing-Ku te. Tapi ewen dia maku mahining tuntang dia maku manumon. Ewen tetep marisang haream kilau bihin. Awi te uras hukum je aton intu janji te jari inusoh-Ku akan ewen.”

⁹Limbah te TUHAN hamauh tinai dengangku, “Oloh Yuda tuntang oloh Yerusalem jari pakat malawan Aku.

¹⁰Ewen jari mawi dosa je iawi tato hiang ewen je dia maku manempo Aku, ewen manyembah kare hatalla beken tuntang dia maku manumon parentah-Ku. Aloh Israel atawa Yuda malanggar janji je jari inampa-Ku dengan tato hiang ewen.

¹¹Awi te, Aku, TUHAN, mampingat iete Aku akan mampadumah calaka akan ewen tuntang ewen dia olih mahakae. Amon ewen mangkariak balaku dohop dengang-Ku, Aku dia maku mahininge.

¹²Palus oloh Yuda tuntang oloh Yerusalem haguet balaku dohop dengan kare hatalla beken je inara ewen dengan parapah. Kare hatalla te dia baka tau manyalamat ewen metoh calaka te dumah.

¹³Kare hatallan oloh Yuda are toto, sama kilau kare lewun ewen. Oloh Yerusalem mampendeng kare mesbeh sama kilau kare jalan intu lewu Yerusalem indu maluput parapah akan kare Dewa Baal.

¹⁴Tagal te, Yeremia, ela balakudoa akan ewen atawa balaku dohop dengang-Ku akan ewen! Amon ewen hong kasusah tuntang balaku dohop dengang-Ku, Aku dia handak mahining auh ewen.”

¹⁵TUHAN hamauh, “Ungkup-Ku je inyinta-Ku jari malalus kare taloh papa. Ewen jaton hak melai Humang-Ku. Ewen manyangka dengan manampa kare janji, tuntang dengan maluput parapah meto, ewen olih mambalang calaka. En tau dengan jete ewen sanang?

¹⁶Puji Aku manggare ewen batang saitun labat, kontep dengan kare bua je bahalap. Tapi, toh dengan auh gotok je hai Aku akan mangehu kare dawee tuntang mamelek uras patinge.

¹⁷Aku je mampendeng Israel tuntang Yuda, Aku, TUHAN Je Jaton Tikas Kuasae. Tapi, toh Aku jari handak mampadumah calaka akan ewen. Ewen kabuat je mawi buku uras akan taloh te, awi ewen jari mawi kapapa, iete maluput parapah akan Baal sampai Aku sangit.”

¹⁸TUHAN mansanan akangku tahiu rencana papa kare musohku mawi aku.

¹⁹Aku kilau tabiri je balinek imbit akan eka impatei. Aku dia katawan tahiu aku je jadi tintun kahandak ewen je papa. Ewen hamauh, “Keleh itah maneweng batang kayu toh sarai ie tau mamua; itah manganae uka arae ingalapean oloh.”

²⁰Palus aku balakudoa, “O TUHAN Je Jaton Tikas Kuasae, Ikau hakim je adil; Ikau je mariksa tirok tuntang atei olon. Perkarangku toh inyarahku Akam. Keleh amon aku tau mite Ikau mambaleh gawin kare oloh te.”

²¹Kare oloh lewu Anatot[7] handak uka aku matei. Ewen hamauh, “Amon Ikau harajur ih manyampai kare peteh TUHAN akan ikei, ikau akan impatei ikei.”

²²Awi te TUHAN Je Jaton Tikas Kuasae hamauh, “Aku akan mahukum ewen! Kare oloh tabela ain ewen akan matei hong parang, kare anak ewen matei balau.

²³Aku jari manukas katikae akan mampadumah calaka akan kare oloh Anatot. Amon katika hukum akan ewen te sampai, jaton ije je liwus.”