Read Ngaju YEREMIA 13 Bible Online

YEREMIA 13 - Ngaju bible

YEREMIA 13

¹TUHAN manyoho aku haguet mamili tapih pandak bara lena tuntang mahapae, tapi aku ingahana manculope akan huang danum.

²Palus aku haguet mamili tapih pandak te, balalu mahapae.

³Limbah te TUHAN hakotak tinai dengangku, koae,

⁴“Keleh haguet akan Sungei Euprat, tuntang nyahokan tapih pandak te hong kare helat batu.”

⁵Maka tumon prentah TUHAN aku haguet tuntang manyahokan tapih pandak te tokep Sungei Euprat.

⁶Pire-pire katahie limbah te TUHAN manyoho aku haguet tinai akan Sungei Euprat uka manduan tapih pandak te.

⁷Aku haguet, tuntang mampalua tapih pandak te bara eka aku manyahokae. Ampie tapih te jari kupit, tuntang sama sinde dia baguna tinai.

⁸Palus TUHAN hamauh tinai dengangku, Koae,

⁹“Kalote carae Aku akan mawi oloh Yuda tuntang oloh Yerusalem. Aku akan mamparotek kajohon ewen je tangkalau kahaie te.

¹⁰Bangsa je papa toh paham badungil tuntang dia maku manempo Aku. Ewen sombayang tuntang manempo kare hatalla beken. Jete bukue ewen akan jari sama kilau tapih pandak je dia baguna te.

¹¹Kilau tapih pandak imeteng dehen intu kahang oloh je mahapae; tumon te Aku handak uka ungkup Israel tuntang Yuda tapeteng dehen intu Aku. Tumon te ewen jadi ungkup-Ku je mawi arang-Ku inara tuntang ihormat. Tapi ewen dia maku manempo Aku.”

¹²TUHAN, Hatalla, hamauh dengangku, “Yeremia, nyampai peteh-Ku akan oloh Israel iete genep balanai eka anggor musti inyuang kontep dengan anggor. Ewen akan tombah, ‘En ikei dia katawan je genep balanai musti ingontep dengan anggor?’

¹³Palus sanan akan ewen iete kare oloh tanah toh, kare raja turonan Dawid, kare imam, nabi tuntang hapus oloh Yerusalem akan inyuang-Ku kontep dengan anggor sampai babusau.

¹⁴Palus ewen akan iawi-Ku hagepak sama arepe. Bakas tabela akan iawi-Ku kalote jaton ampun. Ewen akan imbinasa-Ku dengan jaton mangkeme kasayang atawa kamasi. Aku, TUHAN, jari hakotak.”

¹⁵Ungkup Israel, TUHAN jari hamauh! Ela ah bajoho, keleh hining auh Ayue!

¹⁶TUHAN, Hatallam patut impahai awim helo bara Ie mampadumah kakaput, tuntang paim tantarang hong kare bukit, helo bara kalawa je iharapm iobah jadi kakaput.

¹⁷Amon ikau dia maku mahining, aku akan manangis suni-suni. Dengan kapehen atei aku manangis tagal kajohom. Johon matangku akan mahasor awi ungkup TUHAN imbit kilau tawanan.

¹⁸TUHAN hamauh dengangku, “Nyoho raja tuntang indu ain raja mohon bara padadusae, awi makotae je bahalap jari manjato bara takoloke.

¹⁹Kare lewun Yuda intu hila salatan kanjeran ingapong. Jaton je tau manelak kapong te. Uras oloh Yuda jari imbit akan eka tawanan.”

²⁰TUHAN hamauh dengan oloh Yerusalem, “Item! Kare musohm dumah bara utara! Hong kueh kare oloh je musti ingalindongm tuntang je paham inaram te.

²¹Narai je insanam amon kare oloh je iawim kilau sobatm mampakalah tuntang manguasa ikau? Batantu ikau akan mangkeme kapehe sama kilau oloh bawi je metoh luas anake.

²²Olih jadi keton misek, mbuhen urase taloh te buah keton. Mbuhen pakaiam irabit tuntang ikau irayap. Buah ikau katawan je taloh te manjadi awi dosam tangkalau kahai.

²³En tau oloh babilem mobah ampin pupuse, atawa haramaung manganan belange? Batantu dia! Tumon te kea keton je patoh mawi kapapa dia akan tau malalus kahalap.

²⁴Aku akan manaburan keton sama kilau apis parei inambalang riwut bara padang pasir.

²⁵Jete ampin kajarian keton je jari inukas-Ku awi keton jari mangalapean Aku, tuntang jari percaya dengan hatalla je dia toto.

²⁶Aku kabuat akan marabit pakaiam bara bitim mangat ikau halowai tuntang mahamen.

²⁷Aku jari mite keton malalus kare taloh je inyingi-Ku. Aku jari mite keton manggoang kare hatalla beken intu bukit tuntang intu tana, kilau ije biti oloh hatue je paham kipee dengan sawan oloh beken atawa sama kilau kuda hatue paham kipee dengan kuda bawi. O oloh Yerusalem, calaka keton! Hamparea keton tau liwus bara kare kapapa?”