Read Ngaju YEREMIA 15 Bible Online

YEREMIA 15 - Ngaju bible

YEREMIA 15

¹ TUHAN hamauh dengangku, “Aku dia akan sinta bangsa toh, aloh Moses tuntang Samuel mendeng intu hetoh akan balaku asing-Ku akan ewen. Soho bangsa toh haguet, Aku dia handak mite ewen.

² Amon ewen misek dengam akan kueh ewen musti haguet, tombah kalotoh, ‘TUHAN hamauh, je inukas akan matei awi haban nauhe ie matei awi panyakit Je inukas matei hong parang nauh ie matei hong parang. Je inukas matei awi balau nauh ie matei balau! Je inukas akan inawan nauh ie imbit kilau tawanan!’

³Aku, TUHAN, jari manukas epat hukuman je bakaike-ikeh akan manjadi mawi ewen: ewen akan matei hong parang; hantun ewen akan ihir aso kinan burong, tuntang impalepah awi meto basiak.

⁴ Aku akan mawi uras bangsa hong kalunen mangkarieng mite ewen. Uras te ilalus-Ku awi gawin Manase anak Hiskia intu Yerusalem metoh ie jadi raja Yuda.”

⁵TUHAN hamauh, “O oloh Yerusalem, eweh je handak masi keton? Eweh je handak kapehe atei dengan keton? Eweh je handak tende ekam misek kilen ampim?

⁶Keton jari manolak tuntang malihi Aku, awi te Aku manjuju lengengku akan mamparamok keton, awi Aku jadi peda manahan kasangit-Ku. [10]

⁷Hong genep lewu intu tanah toh keton akan inganan awi-Ku kilau tampilai. Aloh keton te ungkup ayung-Ku tapi Aku akan mambinasa keton tuntang kare anak keton awi keton dia maku mobah cara pambelom keton.

⁸Tanah keton akan kontep balo, malabien bara baras hong saran tasik karee. Kare oloh akan impatei-Ku metoh katabelae, sampai indu ewen mangkeme kasusah. Handau Aku mampadumah akan ewen ije biti oloh je mambinasa sampai ewen mikeh tuntang balisah.

⁹Indu je nihau uju anak hatue tujah awi seke tahasenge. Andau pambelome palus derem, ie mangkeme ihina tuntang impahawen. Kare musohm inyoho-Ku mampatei je magon belom marak keton. Aku, TUHAN, jari hakotak.”

¹⁰Toto aku toh basial! Kanduen induku manak aku? Dengan genep biti oloh hong lewu toh aku musti hakapaut tuntang habantah, aloh aku dia puji mahanjaman atawa minjam, tapi aku inyapa awi oloh are.

¹¹TUHAN, amon aku puna dia malalus gawingku dengan bahalap, tuntang dia mandohop kare musoh intu taharep Aim metoh ewen mandino calaka tuntang susah, nauhe sapan kare oloh te toto-toto manjadi. (

¹²Jaton ije je tau mamelek sanaman, je mambatang sanaman bara utara je jari iewoi dengan tambaga.)

¹³TUHAN hakotak dengangku, “Aku akan manyoho musoh akan mamungkat panatau tuntang ramo ain ungkup-Ku. Jete kilau hukuman akan kare dosa je jari iawi ewen intu hapus tanah toh.

¹⁴Hong tanah bangsa beken je dia ingasene awi ewen, Aku akan mawi ewen indu rewar kare musoh ewen, awi kasangit-Ku jari hasep kilau apui je ganda-gandang tuntang dia maku belep.”

¹⁵Palus aku hamauh, “TUHAN Ikau harati. Ingat tuntang dohop aku. Baleh ewen je manggoang tuntang mahenyek aku. Ela lalau sabar dengan ewen sampai ewen kareh olih mampatei aku. Ingat je tagal Ikau aku ihina.

¹⁶Ikau hakotak dengangku, tuntang aku manyeneh genep bawak kotakm. Aku Ayum, o TUHAN, Hatalla Je Jaton Tikas Kuasae. Tagal te kare auh Aim manyanang tuntang mampangat aku.

¹⁷Aku dia omba hanjak-hanjak dengan oloh je hapumpong baya akan hureh. Awi baketep intu Ikau palus aku mangabuat marak angat kasangitku.

¹⁸Mbuhen aku harajur buah kapehe? Mbuhen himangku paham tuntang dia kele-keleh? En Ikau handak manyusah aku kilau sungei je keang metoh wayah pandang?”

¹⁹TUHAN tombah, “Amon ikau mules haluli, Aku akan manarima ikau. Ikau akan jadi rewar-Ku tinai. Amon ikau mambarita kare taloh je baguna tuntang dia mangamburau, ikau tau jadi nabi aing-Ku tinai. Kare oloh akan manalih ikau tinai, tuntang dia perlu ikau haguet manalih ewen.

²⁰Ikau akan iawi-Ku kilau kota tambaga akan ewen. Ewen akan manyarang ikau, tapi dia akan tau mampakalah ikau. Aku akan mampahayak ikau uka mangalindong tuntang manyalamat ikau.

²¹Aku akan maliwus ikau bara kuasan kare oloh papa je karas tuntang tulas. Aku, TUHAN, jari hakotak.”