Read Ngaju YEREMIA 16 Bible Online

YEREMIA 16 - Ngaju bible

YEREMIA 16

¹TUHAN hakotak tinai dengangku, Koae,

²“Ela kawin tuntang mandino anak intu eka toh.

³Kareh insumang-Ku akam narai je manjadi dengan kare anak je inakan intu hetoh tuntang dengan oloh bakase.

⁴Ewen akan matei buah panyakit je baka matei, tuntang ewen akan matei hong parang atawa matei balau. Jaton ije je manatum atawa mangubur ewen. Hantun ewen akan hakalampah kilau tain meto intu petak, tuntang kinan burong hayak meto basiak.

⁵Ela manalih human oloh je metoh pehe atei, Yeremia. Ela kapehe atei akan eweh bewei. Aku dia akan mamberkat ungkup-Ku tinai hapan kasanang, tuntang dia akan manyayang tuntang masi ewen.

⁶Oloh tatau tuntang oloh je belom susah hong tanah toh akan matei tuntang jaton oloh je mangubur ewen. Jaton je mangapehe arepe tuntang manggundul takoloke akan tanda kapehe atei dengan ewen.

⁷Jaton kea je handak mawi sombayang hapa mampong oloh je metoh kapehe atei. Jaton oloh je omba kapehe ateie dengan oloh je matei bapae atawa indue.

⁸Ela tame human oloh je metoh mawi pesta. Ela kuman mihop dengan ewen.

⁹ Hining taloh je Aku, TUHAN Je Jaton Tikas Kuasae, Hatallan Israel, handak mansumae akam. Auh kahanjak tuntang karamin pesta kawin akan impatende awi-Ku urase. Taloh te akan gitan awi oloh je belom jaman toh.

¹⁰Amon ikau manyampai kare taloh toh akan ewen, mikeh ewen tau misek mbuhen Aku mahukum ewen kalote kakarase. Ewen akan misek narai kasalan tuntang dosan ewen taharep Aku, TUHAN, Hatallan ewen.

¹¹Sanan akan ewen je Aku hamauh kalotoh, ‘Tato hiang keton jari malihi Aku uka manyembah tuntang sombayang akan kare hatalla beken. Ewen mangalapean Aku tuntang dia maku manumon kare atoran ayung-Ku.

¹²Tapi keton malalus taloh je labih papa hindai. Keton badungil tuntang baya malalus kahandak keton kabuat je papa. Keton dia maku manumon auh-Ku.

¹³Awi te, keton akan iharak tuntang inganan awi-Ku akan tanah oloh beken je samasinde dia ingasene awi keton tuntang awi tato hiang keton. Intu hete keton akan sombayang handau hamalem akan kare hatalla beken, tuntang Aku dia akan masi keton.’ ”

¹⁴TUHAN hamauh, “Kareh dumah katikae oloh dia tinai sumpah tagal Aku, Hatalla je belom, je mimbit ungkup Israel balua bara Misir,

¹⁵malengkan tagal Aku, Hatalla ije belom, je mimbit ungkup Israel balua bara ije tanah intu hila utara tuntang bara uras tanah beken eka ewen jari inaburan awi-Ku. Ewen akan imbit-Ku haluli akan petak danume, tanah je jari inenga-Ku akan tato hiang ewen.”

¹⁶TUHAN hakotak, “Aku handak mantehau are oloh palauk uka manyingkap oloh toh. Limbah te Aku akan mantehau are oloh pamandop uka mandop ewen hong genep bukit tuntang lungkoh, tuntang intu kare goha intu bukit batu.

¹⁷Aku mite narai bewei je jari ilalus ewen. Jaton taloh je basahokan akang-Ku; kare dosan ewen kea jari gitang-Ku.

¹⁸Dosa tuntang kapapan ewen akan imbaleh-Ku dengan hukuman due lipet, awi ewen jari mamapa tanah-Ku hapan are hampatong dewa. Kare hampatong dewa te jaton tahasenge kilau hantu.”

¹⁹TUHAN, ikau te je mangalindong aku tuntang manenga kaabas akangku; Ikau mandohop aku hong wayah kajake. Kare bangsa bara hapus kalunen akan manalih Ikau tuntang hamauh, “Tato hiang ikei baya tempon hatalla je dia toto je samasinde jaton baguna.

²⁰En tau oloh mawi hatallae kabuat? Batantu dia! Je inampae te batantu dia Hatalla.”

²¹“Awi te,” koan TUHAN, “sinde toh Aku akan mawi kare bangsa mangkeme kuasa tuntang kaabas-Ku uka sampai katatahie ewen akan katawan je Aku toh TUHAN.”