Read Ngaju YEREMIA 17 Bible Online

YEREMIA 17 - Ngaju bible

YEREMIA 17

¹TUHAN hamauh, “O bangsa Yuda, dosam jari tarasurat hong ateim tuntang hong uras puting kare mesbehm dengan pen sanaman je totoke bara intan.

²Kare oloh ayum sombayang intu kare mesbeh tuntang kare jihin hampatong dewa je jari impendeng akan Dewi Asera intu genep batang kayu je bejewong, hong kare tantan bukit,

³tuntang hong kare bukit intu luar lewu. Awi uras eka manyembah hampatong dewa je jari impendeng keton hong hapus lewu tuntang awi kare dosa je jari ilalus keton, palus Aku akan mawi uka kare musoh keton mungkat kare ramo tuntang panatau keton.

⁴Keton akan tarapaksa manyarah tanah je jari inenga-Ku akan keton, tuntang Aku akan mawi keton manempo musoh keton intu tanah je dia keton puji manalihe. Aku malalus uras taloh te awi kasangit-Ku hasep sama kilau apui je hanyala tuntang dia tau imbelep.”

⁵TUHAN hamauh, “Amon oloh malihi Aku, TUHAN ayue, tuntang harap dengan olon hayak bahapang intu kaabase, maka Aku akan mahukum ie.

⁶Ie sama kilau taloh imbul je tumbo intu padang pasir, intu petak keang kamahau, tunis benyem tuntang are uyahe dia puji mangkeme taloh bahalap.

⁷Tapi oloh je harap Aku akan imberkat-Ku harajur.

⁸ Ie kilau batang kayu saran sungei je mahasor; uhate manyalantar sampai danum. Ie dia mikeh wayah pandang, dawee harajur bahijau. Aloh hapus petak keang kamahau, ie dia balisah awi ie harajur mampalembut bua.

⁹Atei olon dia olih ingatawan, paling bakalilit bara kare taloh handiai tuntang lalau paham panyakite.

¹⁰ Aku, TUHAN, mariksa atei, taloh huang olon iuji-Ku. Aku akan mambaleh genep oloh tumon ampin pambelome tuntang manenga akae tumon kare taloh gawie.”

¹¹Kilau burong je maherem tanteloh je dia ie tempoe, tumon te kea oloh je dia bujur mandino panataue. Hong benteng pambelome, kare panataue lepah nihau. Hong lawin pambelome haron gitan je ie te oloh je paling humong.

¹²Human TUHAN itah sama kilau padadusan kahai, intu hunjun bukit gantong bara solake.

¹³TUHAN, Ikau kaharap Israel, ungkup Ayum; uras oloh je malihi Ikau mangkeme mahamen. Ewen akan lilap bara kalunen toh tuntang haguet akan lewun oloh matei. Awi, Ikau tahasak danum pambelom jari ilihi ewen, o TUHAN.

¹⁴TUHAN, pakeleh aku, maka aku akan barigas. Keleh manyalamat aku, maka aku akan salamat. Ikau bewei je impahai awiku!

¹⁵Oloh hamauh dengangku, “Intu kueh ie kare ancaman TUHAN te? Keleh jete ilalus katika toh kea!”

¹⁶Tapi, o TUHAN, diapuji aku mahajajuan uka Ikau mawi calaka akan ewen. Aku dia kea handak uka ewen buah kajake. Ikau katawan taloh te TUHAN. Ikau katawan narai taloh je inyewutku.

¹⁷Ela Ikau jadi taloh je mampikeh ateiku. Ikau ekaku mandari arepku amon dumah kasusah.

¹⁸Keleh jaka oloh je manggoang tuntang tulas dengangku impahawen tuntang iamok kikeh awim. Tapi ela Ikau mawi taloh kalote dengangku, o TUHAN. Padumah calaka mawi ewen sampai ewen rusak binasa.

¹⁹TUHAN hamauh dengangku, “Yeremia, keleh haguet akan Lawang Rayat je ihalau kare rajan Yuda amon ewen tame balua lewu. Talih kea akan kakare lawang je beken hong Yerusalem.

²⁰Nyampai petehku akan kare raja tuntang uras oloh Yuda hayak hapus oloh Yerusalem je mahalau hong kare lawang te.

²¹ Keleh sanan kalotoh: ‘Amon keton dia handak matei, ela mimbit ramo hong andau Sabat, atawa mimbit tame mahalau kare lawang Yerusalem.

²² Ela bagawi atawa mimbit ramo en kea balua bara humam hong andau Sabat. Ngabeken andau te tantai akangku kilau je jari irentah-Ku akan tato hiangm.

²³Tapi tato hiangm dia maku mahining tuntang dia paduli taloh je insanang-Ku. Ewen badungil tuntang dia maku manumon atawa iningak.

²⁴Keleh manumon uras kare parentah-Ku. Ela mimbit ramo en bewei mahalau lawang lewu toh hong andau Sabat. Haga andau Sabat te barasih akang-Ku tuntang ela aton oloh je mawi taloh en-en hong andau te.

²⁵Amon keton toto-toto malalus kare parentah-Ku, maka kare raja tuntang kare pagawai pamarentah je marentah sama kilau Dawid akan tame kare lawang lewu Yerusalem. Ewen hayak oloh Yuda tuntang oloh lewu Yerusalem akan mondok hunjun kareta kuda sampai lewu Yerusalem rami toto.

²⁶Kare oloh akan dumah bara kare lewun Yuda, tuntang bara kare kampong kaliling Yerusalem; ewen akan dumah bara tanah Benyamin, bara pain bukit, bara kare bukit tuntang bara Yuda hila salatan. Ewen akan mimbit akan Humang-Ku kare meto parapah, aloh je akan ingehu atawa je dia, kea parapah gandom tuntang manyan tuntang parapah tarimakasih.

²⁷Uras taloh te akan manjadi amon keton manempo Aku tuntang mengabeken andau Sabat tantai akang-Ku. Ela mimbit ramo en bewei mahalau kare lawang lewu Yerusalem hong andau te. Amon keton malanggar kare parentah-Ku te, maka kare lawang Yerusalem tuntang kare istanae akan inusul awi-Ku lepah lingis tuntang apui te dia olih imbelep.’ ”