Read Ngaju YEREMIA 18 Bible Online

YEREMIA 18 - Ngaju bible

YEREMIA 18

¹TUHAN hakotak dengangku,

²“Keleh haguet talih human tukang balanai, intu hete Aku akan manyampai peteh-Ku akam.”

³Palus aku manalih human tukang balanai tuntang gitangku ie metoh nguan gawie hunjun papan bayang je hundi.

⁴Amon balanai je metoh ie manampae te kurang bahalap, ie manampae haluli tinai jadi balanai je beken tumon kahandake.

⁵Palus TUHAN manyoho aku mansanan akan ungkup Israel,

⁶“O ungkup-Ku, en dia tau Aku mawi keton kilau gawin tukang balanai dengan petak liate te? Sama kilau petak liat intu lengen tukang balanai, tumon te kea keton hong lengeng-Ku.

⁷Amon hong ije katika Aku manukas akan marunat, manduroh tuntang mamparotek ije bangsa atawa karajaan,

⁸palus bangsa te hobah bara kare dosae, te Aku akan mambalang kahandak-Ku te.

⁹Tapi katambalike tinai, amon Aku manukas handak mampendeng atawa mandehen ije bangsa atawa karajaan,

¹⁰tapi limbah te bangsa te dia manempo Aku palus malalus taloh je papa, maka Aku akan mambalang kahandak-Ku te.”

¹¹TUHAN hamauh dengangku, “Toh sanan akan kare oloh Yuda tuntang oloh Yerusalem je Aku metoh mawi rencana akan malawan ewen, tuntang manatap hukuman akan ewen. Nyoho ewen tende bara cara pambelom ewen je badosa te hayak mangambuah hadat tuntang gawin ewen.

¹²Tapi ewen akan tombah, ‘Narai gunae? Ikei akan tetep malalus kahandak ikei kabuat! Genep bitin ikei akan malalus kahandak atei ikei je papa!’ ”

¹³TUHAN hamauh, “Isek dengan gagenep bangsa en puji aton taloh je kilau toh. Ungkup Israel jari mawi taloh je bakaike-ikeh!

¹⁴Dia puji salju lilap bara bukit batu hong Libanon. Dia puji danum sadingen je mahasor hong petak habukit balalu teah.

¹⁵Tapi ungkup-Ku jari mangalapean Aku, tuntang mamapui garo akan hampatong dewa. Ewen tantarang intu jalan horan je musti ihoroi ewen, palus mahiwang akan jalan je hindai puji imparata.

¹⁶Tanah toh jari iawi ewen jadi eka je bakaike-ikeh, tuntang katatahie jadi akan ihalalea oloh. Uras oloh je mahalaue akan manggiling takoloke awie mangkeme mangkarieng.

¹⁷Kilau kawo je ihimon riwut timor, kalote ungkup-Ku akan iawi-Ku kasaburan intu taharep musoh. Amon dumah calaka, Aku akan manalikut ewen tuntang dia mandohop ewen!”

¹⁸Oloh hamauh, “Ayo, itah pakat malawan Yeremia. Dia baya ie je tau hakotak akan Hatalla. Harajur akan aton imam je tau majar, aton oloh pintar harati je tau manenga nasehat; tuntang aton nabi je tau manyampai akan itah kare peteh bara Hatalla. Ayo itah mandawa ie akan eka basara tuntang dia tinai mahining kare auhe.”

¹⁹Palus aku balakudoa, “TUHAN, hining lakudoangku; seneh taloh je inahiu musohku tahiu aku!

²⁰En patutkah amon kahalap imbaleh hapan kapapa? Tapi ewen jari mangali lowang uka aku manjato akan huange. Ingat je aku jari mambela ewen intu taharepm, mangat Ikau ela sangit dengan ewen.

²¹Tapi toh, TUHAN, keleh kare anak ewen matei balau atawa matei hong parang. Keleh jaka kare oloh bawi ain ewen nihau banae tuntang anake; keleh jaka kare oloh hatue matei awi panyakit tuntang oloh tabela matei hong parang.

²²Keleh manyoho parampok dumah manyalenga akan human ewen, sampai ewen mangkariak mikeh. Ewen jari mangali lowang mangat aku manjato akan huange. Ewen kea jari manenan jarat hapa manyingkap aku.

²³Tapi Ikau, TUHAN, katawan uras taloh je irencana ewen uka mampetei aku. Awi te ela mampun ewen; ela mampuas kasalan ewen. Mukul ewen sampai balawo. Keleh mawi ewen huang kasangit Aim.”