Read Ngaju YEREMIA 2 Bible Online

YEREMIA 2 - Ngaju bible

YEREMIA 2

¹TUHAN manyoho aku

²mansanan barita toh akan hapus oloh intu Yerusalem. “O Israel, ingat-Ku kapaham kaketepm metoh ikau tabela; kapaham sintam metoh itah magon panganten taheta. Akan padang pasir inuntutm Aku mahalau petak je keang kamahau.

³Israel, ikau ayung-Ku kabuat, eka huang-Ku tuntang eka kasayang-Ku. Aku mawi calaka akan uras oloh je mangapehe ikau, Aku, TUHAN jari hakotak.”

⁴Hining peteh TUHAN, o ungkup turonan Yakob, kare suku Israel!

⁵TUHAN hamauh, “Kasalan en je sondau tato hiangm intu Aku, sampai ewen mandarhaka dengang-Ku? Ewen manggoang hampatong dewa je dia barega tuntang kajariae ewen kabuat asi-asi.

⁶Aku ingalapean; Aku jari mangagalan ewen hong jalan, tuntang mimbit ewen balua bara Misir, mahalau padang pasir, eka je tunis benyem are lewak-lewaue, tuntang je keang hayak bahaya — padang je dia oloh melaie tuntang dia oloh mahalaue!

⁷Akan lewu je basiwoh iagah-Ku ewen akae mangkeme kare hasil tuntang kare taloh je bahalap intu hete. Tapi intu hete petak ayung-Ku imapa ewen tuntang je ayung-Ku iawi ewen jadi taloh je bakajile-jilek.

⁸Kare imam jaton je misek intu kueh Aku, TUHAN ayue. Kare oloh je mimbing atoran dia katawan eweh Aku, kare oloh kuasa je marentah malawan Aku. Huang aran Baal kare nabi hakotak, tuntang manyembah hampatong dewa je dia baguna.”

⁹TUHAN hamauh, “Toh ungkup-Ku imbit-Ku basara tinai, tuntang turonae akan ihakim awi-Ku.

¹⁰Keleh mahoroi pasisir Siprus hila barat, ngirim oloh akan timor akan lewu Kedar, riksa intu hete titi-titip, en puji aton taloh je kilau te?

¹¹Hindai puji ije bangsa manakiri hatalla aloh jete dia Hatalla je toto. Ungkup-Ku jari manakiri Aku, ije eka katamam ewen dengan taloh je dia tau mawi en-en.

¹²Awi te, o langit, keleh hagolak! Jungun tuntang hagenjeh!

¹³Ungkup-Ku mawi due macam dosa: ewen manalikut Aku, je tahasak danum pambelom akan olon; ewen mawi akan arepe talaga je jalanen je dia olih manahan danume.”

¹⁴Israel dia rewar, dia kea turonan rewar. Tapi mbuhen ie jadi panginan musohe?

¹⁵Musohe manyakungkong mawi ikau kilau singa, petake iawi keang kamahau tuntang buang, kare lewue lepah kinan apui, inalua rusak jaton ielai.

¹⁶O Israel, balau takolokm inggunting awi oloh Mempis tuntang Tahpanhes.

¹⁷Ikau kabuat je mawi buku uras taloh je manjadi hong arepm, awi metoh ikau ingagalan awi-Ku hong jalanan, ikau manalikut Aku, TUHAN Hatallam.

¹⁸Narai ontonge ikau akan Misir? Handak mihop danum Sungei Nil? Narai ontonge ikau akan Asur? Handak mihop danum Sungei Euprat?

¹⁹Kapapam kabuat mahukum arepm, ikau kapehe awi manolak Aku, Hatallam. Toh keme angat kapaham kapait tuntang kapehe amon ikau manalikut Aku tuntang dia mahormat Aku. Aku, TUHAN, Hatalla jari hakotak; aku TUHAN, Hatalla Pangkahai tuntang Je Jaton Tikas Kuasae.”

²⁰TUHAN hamauh, “Jari tahi ikau dia maku manempo Aku; dia handak manumon tuntang menyembah Aku. Intu hunjun genep bukit je gantong, tuntang intu penda genep kayu je labat dawee, ikau manyembah kare dewa kajewong.

²¹Ikau imbul awiku sama kilau batang anggor je intih-Ku bara paung je bahalap. Tapi toh ikau hobah, basaloh jadi batang anggor layap je dia baguna.

²²Aloh ikau mandoi mahapan sabun are toto tapi kare liken kasalam magon gitang-Ku.

²³Bahanyi toto ikau hamauh je ikau dia papa, tuntang je Baal dia puji inumom! Nanture ampin gawim intu janah, ingat kapapam tuntang ngaku! Ikau kilau onta bawi je metoh kapaham kipee, hadari kanih-kate dia tapatende,

²⁴palus tame akan padang pasir je benyem. Ie dia tau inahan amon metoh kapaham kipee. Je handak dengae dia usah hagau-gilau, awi metoh wayah kawin ie harajur magah arepe.

²⁵Israel, ela ikau hadari manggoang kare dewa, tuntang ela mangkariak mantehau ewen, kareh paim bahimang tuntang balengkongm keang awi teah belai. ‘Dia, aku dia baka haluli,’ koam, ‘awi aku sinta dengan kare dewa, tuntang handak omba ewen.’ ”

²⁶TUHAN hamauh, “Kilau oloh panakau mahamen metoh buah singkap, tumon te kea keton akan uras mahamen, o oloh Israel, kare rajam, kare oloh je iarentahm, kare imam tuntang kare nabim.

²⁷Ikau akan impahawen, awi ije katetek kayu inyewutm bapa tuntang ije kabawak batu inyewutm indu. Ikau dia manalih Aku malengkan malihi Aku. Tapi amon dumah kasusah, Aku je intehaum uka dumah manyalamat ikau.

²⁸Intu kueh kare hatallam je inampam te? Amon aton kasusah, nyoho ewen manyalamat ikau, amon ewen tau! O Yuda, kare dewam tumon kare lewum!

²⁹Narai je dia ingilakm tahiu Aku sampai ikau malawan Aku?

³⁰Ngahus bewei Aku mahukum keton, awi keton dia maku manarima tingak. Sama kilau singa je metoh mamok, kalote lewun keton mampatei kare nabi ain keton.

³¹O ungkup Israel, seneh kare auh-Ku toh. En puji Aku kilau padang pasir akam atawa kilau petak je kaput pijem? Tapi mbuhen ikau hamauh je ikau handak bebas, tuntang dia maku tinai haluli dengang-Ku?

³²En aton oloh bawi bujang je kalapean dengan ramon hiasae, atawa panganten bawi je kalapean dengan baju pangantee? Tapi ikau jari toto kalapean dengang-Ku. Bara katika je dia olih iitong katahie.

³³Ikau pintar toto manggau jalan akan mangatau kare oloh je inyintam. Lontei je paling papa gawie mahin magon tau bajar bara ikau.

³⁴Pakaiam buah tampitik dahan oloh je belom susah tuntang dahan oloh je dia bara kasalan, dia awi buah dahan oloh panakau je buah singkap. Aloh kalote,

³⁵ikau hamauh je ikau dia bara kasalan, tuntang Aku dia sangit tinai dengam. Tapi Aku, TUHAN, akan mahukum ikau, awi ikau dia maku mangaku je ikau puna sala.

³⁶Golong toto ikau manalih kare dewa bangsa beken uka balaku dohop! Ikau batantu akan imunga kaharapm awi bangsa Misir, sama kilau ikau imunga kaharapm awi Asur.

³⁷Ikau akan malihi Misir dengan kapehen atei tuntang mahamen. Aku, TUHAN jari manolak ewen je iandal awim; ikau dia akan dinon kaontong en-en bara ewen.”