Read Ngaju YEREMIA 20 Bible Online

YEREMIA 20 - Ngaju bible

YEREMIA 20

¹Imam Pasur anak Imer iete kapala pangawas Human TUHAN. Sana ie mahining aku mansanan taloh te,

²ie marentah uka aku imukul tuntang imasong intu Lawang Benyamin, lawang hila hunjun hong Human TUHAN.

³Hanjewu jewue limbah Pasur malapas aku bara pasong, aku hamauh dengae, “Aran je inenga TUHAN akam dia Pasur tapi ‘Pampikeh intu hete-hete’.

⁴TUHAN kabuat hamauh, ‘Ikau akan iawi-Ku pampikeh akan arepm kabuat tuntang akan kare sobatm. Ikau akan mite ewen impatei awi kare musoh ewen. Uras oloh Yuda akan inalua-Ku inguasa awi raja Babel; belahe ewen te akan imbit awie jadi tawanan akan Babel, tuntang tisae akan impatei.

⁵Musoh ewen akan inalua-Ku kea marampas tuntang mimbit uras panatau lewu toh akan Babel, tuntang uras ramoe, sampai ramo pusaka ain kare raja Yuda.

⁶Tuntang ikau, Pasur, hayak hapus keluargam kea akan inawan tuntang imbit akan Babel. Intu kanih ikau akan matei tuntang ingubur; tumon te kea uras sobatm je jari mahining kare tanjarom.’ ”

⁷TUHAN, Ikau mangatau aku tuntang aku jari omba kahandakm. Ikau labih abas bara aku tuntang jari mamparundok aku. Aku ihalalea awi genep bitin oloh, ihina bara hanjewu sampai halemei.

⁸Gagenep tingkat aku hakotak, aku musti mangkariak salepah kaabas, “Katulas! Calaka!” TUHAN aku ihalalea tuntang ihinasining katika, awi manyampai peteh Aim.

⁹Tapi amon hong atei aku hamauh, “Nauhe TUHAN ingalapeangku, aku dia handak hakotak tinai hapan aran Ayue,” palus petehm kilau apui je habarah intu huangku. Jari incobaku manahae, tapi ampie dia olihku.

¹⁰Tarahining oloh habisik intu hete-hete, “Sabak kikeh! Ayo lapor ie akan oloh je mimbing kuasa!” Sampi uras sobatku je heret mahin mentai aku manjato. Koan ewen, “Mikeh awi ingatau, ie olih itah mampakalahe, itah tau mampakalah ie, mangat itah tau mambaleh kasingi itah dengae.”

¹¹Tapi Ikau, o TUHAN, intu hila aku; Ikau paham abas tuntang menteng. Ewen je manggoang tuntang mahenyek aku akan manjato tuntang bagalabah. Ewen akan mahamen katatahie, uras dia sampai kahandak ewen. Kahina ewen te akan ingenang harajur.

¹²Tapi, o TUHAN Je Jaton Tikas Kuasae, dengan kaadilan Ikau mauji olon; Ikau katawan atei tuntang tirok ewen. Awi te soho aku mite Ikau mambaleh kapapan musoh, awi Akam aku manyarah perkarangku.

¹³Keleh manyanyi akan TUHAN tuntang tara akan Arae basa Ie maliwus oloh je buah henyek bara kuasan oloh darhaka.

¹⁴ Tarasapa andauku inakan! Keleh ihina katika aku inakan induku.

¹⁵Tarasapa kea oloh je mimbit barita je mawi bapaku paham hanjak, metoh insanan akae, “Ikau mandino ije biti anak hatue!”

¹⁶Nauhe je mimbit barita te kilau kare lewu je imparamok awi TUHAN hayak jaton asi. Keleh ie mahining kariak kapehe katika andau hanjewo, tuntang lahap parang hong bentok andau.

¹⁷Awi ie dia mampatei aku katika aku magon hong kanain induku, mangat aku tetep inihi induku tuntang kanaie akangku jadi kilau kubur.

¹⁸Mbuhen aku musti inakan? En baya akan kapehe tuntang kasusah? Tuntang mangat pambelomku mahalau tantai huang kahawen?