Read Ngaju YEREMIA 21 Bible Online

YEREMIA 21 - Ngaju bible

YEREMIA 21

¹Sedekia raja Yuda manyoho Imam Pasur anak Malkia, tuntang Imam Sepanya anak Maaseya manalih aku. Ie manyoho ewen manyampai akangku palaku toh,

² “Laku nasehat bara TUHAN akan itah, awi Nebukadnesar raja Babel dengan pasukae metoh mangapong lewun itah. Ayau TUHAN tau mawi taloh heran akan itah, tuntang mamaksa Nebukadnesar mimbit pasukae undur.”

³Palus TUHAN hakotak dengangku, balalu aku manyoho kare sarohan te,

⁴mansanan akan Sedekia iete TUHAN, Hatallan Israel hamauh kalotoh, “Sedekia, Aku akan mampakalah pasukam je metoh parang malawan raja Babel tuntang pasukae. Kare pakakas parang tantara ayum akan inuyok awiku intu bentok lewu.

⁵Aku kabuat akan mangalahi Ikau dengan salepah kaabas tuntang dengan kasangit je hasep.

⁶Oloh lewu toh akan impatei-Ku; aloh olon atawa meto akan matei awi panyakit je paham.

⁷Ikau dengan kare pagawai ayum tuntang kare oloh je liwus bara parang, lau tuntang panyakit, uras akan inalua awi-Ku inyingkap awi Raja Nebukadnesar tuntang awi kare musoh je handak mampatei ikau. Nebukadnesar akan mampatei keton urase dengan jaton ampun tuntang jaton asi. Aku, TUHAN, jari hakotak.”

⁸Palus TUHAN manyoho aku hakotak kalotoh akan ungkupe, “Hining! Aku, TUHAN, manenga akan keton ije paintih: jalan je manintu pambelom, atawa jalan je manintu pampatei.

⁹Genep oloh je melai intu lewu akan matei awi parang, lau, atawa panyakit. Tapi ewen je balua tuntang mayarah arepe akan oloh Babel je metoh manyarang lewu toh, akan liwus tuntang dia impatei.

¹⁰Aku jari manukas akan marusak lewu toh, tuntang dia manyayange. Lewu toh akan inyarah akan raja Babel; ie akan manusule sampai lepah sama sinde. Aku, TUHAN, jari hakotak.”

¹¹TUHAN manyoho aku manyampai peteh toh akan raja Yuda, turonan Dawid: “Seneh taloh je Aku, TUHAN, handak ingotak-Ku. Keleh keton sining andau manggau jalan uka malalus gawin kabujur kaadilan. Paliwus oloh je ihamis bara lengen oloh je mahamis ie. Amon dia, maka kapapa je ilalus keton akan mawi kasangit-Ku hagandang kilau apui je dia tarabelep.”

¹³Limbah te TUHAN hamauh dengan Yerusalem, “O Yerusalem! Ekam labih gantong bara kare janah hakaliling ikau. Ikau kilau bukit batu je panjo-panjong gantong hong padang rata tapi Aku malawan ikau. Ikau hamauh koam jaton ije oloh je tau manyarang ikau atawa manelak kare kotam,

¹⁴tapi Aku akan mahukum ikau tagal taloh gawim. Istanam akan inusul awi-Ku, tuntang uras taloh je hakatokep hete akan bakehu kea. Aku, TUHAN, jari hakotak.”